Sikatayo so Nengneng a Walaan na Pananisia

Pangiyopresi ed Mensahe na Ligliwa Diad Italya

SI Jehova so “Dios na ami ligliwa.” Diad pangalig ed sikato, saray lingkor to so ‘makaligliwa ed saramay walad antokaman a nengneng na kairapan.’ (2 Corinto 1:3, 4; Efeso 5:1) Sakey iya ed saray manunan gagala na panagpulong a kimey a gagawaen na Tastasi nen Jehova.

Impanulong ed Biin Mankaukolan

Nagkalautla diad agano niran taon lapud kairapan, bakal, tan pilalek a mananap na magmaong a bilay, dakel so inmalis pian manayam ed lalon mayaman iran bansa. Balet mairap so pibagay ed balo iran kaliberliber. Kaiban manaayam nen Manjola iray kaparan taga-Albania diad Borgomanero. Lapud ilegal so panaayam to ed Italya, sikatoy masuyat a mitongtong ed si Wanda, sakey ed saray Tastasi nen Jehova. Anggaman kuan, apitongtongan a siansia nen Wanda si Manjola, a tampol ya angipanengneng na pirmin interes a manaral ed Salitay Dios, anggaman say problema et say pandumaay lenguahe ra. Balet, kayari pigaran imbisita, anggapo lay asabi nen Wanda ed abung. Anto kasi agawa? Akabatan nen Wanda ya amin a manaayam ed saman ya abung so tinmaynan lapud sakey ed sikara​—say inaro nen Manjola​—et wanted lapud akapatey!

Apat bulan ed saginonor et apitongtongan lamet nen Wanda si Manjola. “Ampusisaw tan mabeng, say itsura to et talagan walaay problema,” nanonotan ni nen Wanda. Insalaysay nen Manjola a say datin inaro to so apriso tan saray kakaaro ton tinuplegan to parad tulong so pirmin anismaya ed sikato. Diad inkaandiay ilalo, sikatoy nampikasin tulongan na Dios. Insan to anonotan si Wanda, ya akatongtong to la nipaakar ed Biblia. Agaylay liket nen Manjola a napinengnengan to lamet si Wanda!

Nituloy lamet so panagaral na Biblia, tan ag-abayag et inmatendi lay Manjola ed saray pantitipon na Kristiano. Sikatoy tinmalona ed impakala na legal a permiso a mansiansia ed Italya. Kayari sakey taon, nagmaliw a bautismadon Tasi si Manjola. Lapud aligliwa ed saray sipan na Dios, sikatoy sinmempet ed Albania pian inabang so makaligliwan mensahe na Biblia ed saray kapara ton manaayam ed bansa ra.

Panagtasi ed Panayaman a Kampo na Immigrant

Inyuksoy na dakel a kongregasyon ed Italya a pulongan iray immigrant a singa si Manjola. Alimbawa, inyuksoy na sakey a kongregasyon ed Florence pian ombisitan regular ed panayaman a kampo na saray immigrant. Saray residenti na kampo​—a dakel ed sikara  so nanlapud Mamabukig a Europa, Macedonia, tan Kosovo​—so manasagmak na nanduruman kairapan. Arum so walaan na saray problema nipaakar ed druga tan alkohol. Lelegpeten na dakel so inkasikara panamegley na panagtakew.

Sakey ya angat so panpulong ed sayan komunidad. Balet, sakey a sigpot-panaon ya ebanghelisador a manngaran na Paola so akitongtong ed si Jaklina, sakey a biin taga-Macedonia. Kayari pigaran impantongtong, pinaseseg nen Jaklina so kaaro ton si Susanna ya usisaen so Biblia. Ontan met, intongtong nen Susanna ed arum a kakanayon to. Ag-abayag, limaran membro na pamilya to so regular a manaaral na Biblia, onaatendi ed saray Kristianon miting, tan iyaaplika ra la so naaaralan da. Anggaman ed saray problema ya aarapen da, naliligliwa ira manlapud si Jehova tan ed say Salita to.

Inawat na Sakey a Madre so Ligliwa a Manlapud si Jehova

Diad baley na Formia, sakey a sigpot-panaon ya ebanghelisador a manngaran na Assunta so akitongtong ed sakey a biin walay problema to’d panag-akar. Say bii et sakey a madre a kabiangan na relihyoson ulopan ya ontutulong ed saray mansasakit tan mabeblay diad saray ospital tan pribadon ayaman.

Inkuan nen Assunta ed madre: “Walay problemam, agta ontan? Makapaermen, amin tayo so walaay problema a sungdoan.” Lapud satan et akalua so madre tan insalaysay ton maletey so laman to. Pinaseseg nen Assunta so madre, ya inkuanton say Dios ya asalambit ed Biblia so manligliwa ed sikato. Angawat na saray nibase’d Biblia a magasin so madre ya inyopresi nen Assunta ed sikato.

Diad tinmumbok ya impantongtong da, inako na madre, a manngaran na Palmira, a pirmi so problema to. Sikatoy abayag a nanayam ed sakey ya organisasyon ya ipapakurang na saray madre. Sanen sikatoy temporaryon manbakasyon lapud kakapuyan na laman, sikatoy agda la pinapawil. Anggaman kuan, liknaen nen Palmira a walay obligasyon to ed Dios lapud impansamba to bilang madre. Sikatoy tinmupleg ed saray managtambal pian “patambal” balet ta sikatoy pirmin agonigon lapud asagmak to. Impaiyaralan na Biblia si Palmira, tan sikatoy inmatendi ed saray Kristianon miting ed loob na sakey taon. Insan sikatoy inmalis ed sananey a lugar, tan agla akatongtong na Tasi. Kayari na duay taon et sikatoy aromog lamet nen Assunta. Asagmak nen Palmira so pirmin isusumpa na pamilya to tan say klero. Anggaman kuan, intuloy to lamet so panagaral toy Biblia, inmaligwas ed espiritual, tan abautismoan bilang sakey ed Tastasi nen Jehova.

On, dakel so napapaseseg lapud mensahe na ‘Dios a mangitatarya na ligliwa.’ (Roma 15:4, 5) Kanian, determinado iray Tastasi nen Jehova ed Italya ya itultuloy ya aligen so Dios diad pangiyopresi’d arum ed alay abig a mensahe na ligliwa to.