IBhayibhili Liyamntshintsha Umuntu

KUYINI okwenza indoda eyatshiya ukukhonza uJehova isakhula yaphinda yabuyela? Kuyini okwanceda elinye ijaha labona uJehova enguBaba? Bala uzizwele ukuthi bathini abantu laba.

“Ngasengifuna Ukubuyela KuJehova.”—U-ELIE KHALIL

UMNYAKA WOKUZALWA: 1976

ILIZWE AZALELWA KULO: ECYPRUS

IMBALI: INDODANA YOLAHLEKO

KUDALA KWAMI: Ngazalelwa eCyprus kodwa ngakhulela e-Australia. Abazali bami bangoFakazi bakaJehova futhi benza konke abangakwenza ukuthi bangincedise ngithande uJehova kanye leLizwi lakhe iBhayibhili. Kodwa ngathi sengileminyaka engu-15 ngaqalisa ukuba lihlongandlebe. Ngangibaleka ebusuku ngihambe labangane bami. Sasitshontsha izimota njalo sisenza zonke nje izinto ezimbi.

Ekuqaliseni ngangisenza zonke izinto lezi ngudlu ngoba ngangingafuni ukudanisa abazali bami. Kodwa kancane kancane ukwesaba lokhu kwaphela. Ngangilabangane abadala kulami futhi ababengakhonzi uJehova ababengiyenga ukuthi ngenze izinto ezimbi. Ngacina ngitshela abazali bami ukuthi angisafuni ukuba nguFakazi. Bazama ukungincedisa kodwa ngangingasabambeki. Lokhu kwabazwisa ubuhlungu abazali bami.

Ngathi sengisuke ngekhaya sengihlala ngedwa ngaqalisa ukusebenzisa izidakamizwa lokulima imbanje ngizithengisa. Ngangingaziphathanga futhi sengitshona emaphathini emabhawa. Ngasengiphonguzonda mahlayana futhi nxa umuntu wayengenza loba akhulume into engingayithandiyo ngangivuka ngolaka. Izikhathi ezinengi ngangitshinga ngize ngimtshaye umuntu wakhona. Ngasengiluhlaza ngisenza khona kanye abazali bami ababengifundise ukuthi ngingakwenzi.

INDLELA IBHAYIBHILI ELANGITSHINTSHA NGAYO: Ngaqalisa ukujayelana kakhulu lomunye esasibhema sonke izidakamizwa owayelahlekelwe nguyise esasemncane. Sasizitshisa ingxoxo kuze kube phakathi kobusuku. Kwamanye amalanga wayevuleka akhulume ngendlela ayekhumbula ngaye ubabakhe. Njengoba ngangikwazi ukuthi abafileyo bazavuswa, ngaqalisa ukumxoxela ukuthi uJesu wake wavusa abafileyo futhi uthembisa ukuthi uzaphinda abavuse esikhathini esizayo. (UJohane 5:28, 29) Ngangijayele ukuthi kuye, “Akucabange usumbona futhi ubabakho. Sonke sizaphila kuze kube nini lanini ePharadayisi.” Amazwi la amthinta kakhulu umngane wami.

Kwezinye izikhathi wayengibuza ngensuku zokucina loba ngemfundiso yokuthi uNkulunkulu mthathu emunye. Ngangithatha iBhayibhili lakhe ngimvulele amavesi akhuluma ngoJehova uNkulunkulu, uJesu kanye lensuku zokucina. (UJohane 14:28; 2 KuThimothi 3:1-5) Ukuqhubeka ngixoxela umngane wami ngoJehova kwakusenza lami ngicabange ngaye.

Kancane kancane inhlanyelo yeqiniso abazali bami ababesebenze nzima ukuthi bayihlanyele yaqalisa ukumila enhliziyweni. Kwakusithi nxa ngisemaphathini labangane bami sibhema izidakamizwa ngangizithola sengicabanga ngoJehova. Phela abangane bami abanengi babesithi bayamthanda uNkulunkulu kodwa indlela ababephila ngayo yayingahambelani lentando yakhe. Ngangingafuni ukuba njengabo yikho ngananzelela okwakumele ngikwenze. Ngasengifuna ukubuyela kuJehova.

Iqiniso yikuthi ukubakwazi okumele ukwenze kulula kodwa ukuthi ukwenze kunzima kakhulu. Kodwa angizange ngithwale nzima ukuthi ngitshiye izidakamizwa labangane bami. Ngaqalisa lokufunda iBhayibhili lomunye umdala webandla.

Okunye okwakumele ngikutshiye kwakunzima. Okwangithwalisa nzima kakhulu yikutshiya ukuba lolaka. Kwezinye izikhathi ngangisiba ngumuntu sibili kodwa ngibone seluvuke kutsha futhi ulaka. Ngangisala sengizisola kakhulu sengizibona ngiyisehluleki. Kwakungidanisa lokho yikho ngaxoxa lowayengifundisa iBhayibhili. Kazange angisole, wangibekezelela futhi wayehlala elomusa. Ngiyakhumbula ngelinye ilanga esithi ngibale iNqabayokulinda eyayikhuluma ngokuqakatheka kokungakhalali. a Saxoxa ngokuthi kuyini engingakwenza nxa ulaka seluvuka. Kancane kancane engakubala esihlokweni lesi kanye lokuthandaza kwanginceda ukuthi ngenelise ukuzibamba. Ngo-April 2000 ngabhabhathizwa ngaba nguFakazi kaJehova. Ngiswele amazwi angachasisa indlela abazali bami abathokoza ngayo.

INDLELA ENGISIZAKALE NGAYO: Khathesi sengihlalisekile futhi sengilomzwangedwa ohlanzekileyo ngoba angisenzi izinto ezingcolisa umzimba njengezidakamizwa lokungaziphathi. Sengithokoza kakhulu kulakuqala kungelani lokuthi ngisemsebenzini, emhlanganweni webandla kumbe ngiyazilibazisa.

Ngiyambonga uJehova ngokunginika abazali abangazange bangilahle loba ngasengiphambukile. Ngihlala ngikhumbula amazwi kaJesu akuJohane 6:44 athi: “Akulamuntu ongeza kimi engazange adonswe nguBaba ongithumileyo.” Amazwi la ayangithinta, phela ngenelisa ukubuyela kuJehova ngoba wangidonsela kuye.

“Ngangifisa Ukuthi Aluba Ubaba Ukhona.”—UMARCO ANTONIO ALVAREZ SOTO

UMNYAKA WOKUZALWA: 1977

ILIZWE AZALELWA KULO: ECHILE

IMBALI: NGANGITSHAYA IZIGINCI EZILOMSINDO

KUDALA KWAMI: Ngakhuliswa ngumama sihlala edolobheni elihle eliseningizimu yeSouth America. Abazali bami behlukana ngileminyaka engu-5 kuphela futhi lokhu kwenza ngazizwa ngilahliwe. Ngangifisa ukuthi aluba ubaba ukhona.

Umama wayefunda iBhayibhili laboFakazi bakaJehova njalo wayejayele ukuhamba lami eWolu yoMbuso. Kodwa ngangikuzonda ukuya emihlanganweni yebandla yikho ngangihlupha okuzwayo nxa sisiya khona. Ngathi sengileminyaka engu-13 ngahle ngayekela ukuya emihlanganweni.

Ngalesosikhathi ngaqalisa ukuthanda umculo, ngananzelela ukuthi isiphiwo sami sasikhonapho. Sengileminyaka engu-15 ngasengitshaya iziginci ezilomsindo emaphathini, emabhawa lasemibuthanweni etshiyeneyo. Ukujayelana labanye abahlabeleli abazingcitshi kwangenza ngaqalisa ukuthanda eminye imiculo. Ngaqalisa ukufundela umculo kwesinye isikolo esasisendaweni engangihlala khona. Sengileminyaka engu-20 ngathuthela esigodlweni eSantiago ukuze ngiqhubekele phambili ngezifundo zami. Ngaqhubeka ngokutshaya iziginci ezilomsindo.

Ngalesosikhathi ngangingasathokozi. Ngaqalisa ukudakwa lokusebenzisa izidakamizwa ukuze ngizwe ngcono. Lokhu ngangikwenza ngilabanye engangitshaya labo eziginci abasebeyimuli yami. Ngangizenzela okwekhanda lami, ngingelandaba labanye futhi lokhu kwakukhanya endleleni engangibukeka ngayo. Ngangigqoka izigqoko ezimnyama, ngigcina indevu njalo inwele zami zaseziphosa zifike ekhalweni.

Kanenginengi indlela engangisenza ngayo yayisenza ngihlale ngisilwa besengibotshwa ngamapholisa. Kwelinye ilanga ngathi ngidakiwe, ngalwa lamadoda amathathu ayethengisa izidakamizwa ngoba ayesihlupha mina labangane bami. Angibhuqa amadoda la ngaze ngaqamuka umhlathi.

Kodwa abantu abangizwisa ubuhlungu kakhulu yilabo engangicabanga ukuthi ngabangane bami. Ngelinye ilanga ngathola ukuthi inkazana yami yayithandana lomngane wami osekhwapheni futhi abanye abangane bami babekwazi lokho kodwa bengifihlela. Ngadana kakhulu ngazibona ubuthutha.

Ngabuyela ePunta Arenas ngaqalisa ukufundisa umculo njalo ngangisebenza ukutshaya isiginci esibizwa ngokuthi yi-cello. Kodwa ngaqhubeka ngitshaya futhi ngirekhoda umculo weziginci ezilomsindo. Ngathandana lentombi enhle ethiwa nguSussan njalo saqalisa ukuhlala sonke. Ngemva kwesikhathi esithile uSussan wathola ukuthi unina wayekholwa ukuthi uNkulunkulu mthathu emunye kodwa mina ngangingakukholwa lokho. Wangibuza wathi: “Manje iqiniso yiliphi?” Ngamtshela ukuthi imfundiso yokuthi uNkulunkulu mthathu emunye ingamanga kodwa ngangingenelisi ukumchasisela ngisebenzisa iBhayibhili. Ngangikwazi ukuthi ngobani abangamchasisela yikho ngamtshela ukuthi oFakazi bakaJehova bangamtshela iqiniso eliseBhayibhilini. Lelolanga ngenza into engasengileminyaka ngayicina. Ngathandaza kuNkulunkulu ngicela ukuthi angincedise.

Ngemva kwamalanga amalutshwana ngafanisa omunye ubaba ngasengimbuza ukuthi nguFakazi kaJehova yini. Lanxa wayekhanya eyethuswe yindlela engangibukeka ngayo, wayiphendula ngendlela elomusa imibuzo engangimbuza yona mayelana lemihlangano yebandla yaboFakazi. Angithandabuzi ukuthi ukuhlangana kwami laye kwakuyimpendulo yomthandazo wami. Ngahamba eWolu yoMbuso ngafika ngahlalela emuva ukuze kungabi lomuntu onginanzelelayo. Kodwa abanengi babona ukuthi ngingubani. Bangamukela ngazo zombili bangigona okokuthi ngazizwa ngihlalisekile. Ngasengisekhaya sibili. Ngathi ngibona indoda eyayingifundise iBhayibhili ngisesemncane ngahle ngacela ukuthi ingifundise futhi.

INDLELA IBHAYIBHILI ELANGITSHINTSHA NGAYO: Ngelinye ilanga ngabala iZaga 27:11 ezithi: “Ndodana yami hlakanipha uthokozise inhliziyo yami.” Kwangithinta kakhulu ukwazi ukuthi umuntu onjengami angenelisa ukuthokozisa uMdali wezinto zonke. Kwazicacela ukuthi uJehova nguye uBaba engangimdinga empilweni yami.

Ngangifuna ukuthokozisa uBaba wami osezulwini lokwenza intando yakhe kodwa ngangiyisigqili sotshwala lezidakamizwa okweminyaka eminengi. Ngawazwisisa amazwi kaJesu akuMathewu 6:24 akhuluma ngokuthi “kakho ongasebenzela amakhosi amabili.” Lanxa kwangithwalisa nzima ukutshintsha, u-1 Khorinte 15:33 wangithitha kakhulu. Uthi: “Ukuba lobudlelwano labantu abenza okubi kona imikhuba emihle.” Ngananzelela ukuthi ngangingasoze ngiyekele indlela engangiphila ngayo nxa ngingaqhubeka ngihamba endaweni engangizihamba futhi ngilokhe ngidlala labangane engangilabo. Nxa ngangifuna ukukhonza uNkulunkulu kwakumele ngenze utshintsho sibili, ngitshiye izinto ezazingibuyisela emuva.—UMathewu 5:30.

Umculo weziginci ezilomsindo ngangiwuthanda kakhulu futhi kwakungumqanso ozwayo ukuthi ngiwutshiye. Kodwa abangane ebandleni bangincedisa ngaze ngacina ngiwuyekelile. Ngatshiya lokudakwa lezidakamizwa. Ngagela inwele zami lendevu futhi ngayekela lokugqoka okumnyama kuphela. Ngathi ngitshela uSussan ukuthi sengifuna ukugela inwele wamangala kakhulu. Wathi, “Sengifuna ukuyazibonela ukuthi vele kwenziwani eWolu yoMbuso.” Ngelanga abuya ngalo wakholisa kakhulu futhi waqalisa ukufunda iBhayibhili. Kungakayingaphi satshada futhi ngo-2008 sabhabhathizwa. Khathesi siyathokoza ngoba sesikhonza uJehova ndawonye lomama.

INDLELA ENGISIZAKALE NGAYO: Umhlaba lo awunginikanga lutho ngaphandle kwentokozo yamanga labangane bamanga. Ngisawuthanda umculo kodwa sengikhetha engiwulalelayo. Ngijayele ukuncedisa abanye ikakhulu abasakhulayo ngisebenzisa lokho okwenzakala kimi. Ngifuna ukubancedisa babone ukuthi lanxa okusemhlabeni lo kungakhanya kuyibunkanyankanya, akusizi ngalutho ekucineni ‘zinqumbi zezibi.’—KwabaseFiliphi 3:8.

Sengithole abangane abathembekileyo ebandleni lapho okulothando lokuthula khona. Okwedlula konke yikuthi sengingumngane kaJehova futhi sengize ngamthola uBaba.

[Amabala angaphansi]

[Amabala aseceleni kwendima]

“Ngenelisa ukubuyela kuJehova ngoba wangidonsela kuye”