Ibhayibhili Liyamntshintsha Umuntu

KUYINI okwanceda omunye owesifazana ukuthi athokoze empilweni? Kuyini okwenza ukuthi indoda eyayithanda ukulwa njalo yahlamukela uhulumende ukuthi ibe yisikhonzi sikaNkulunkulu esilokuthula? Bala izindaba ezilandelayo ukuze uzwe impendulo zemibuzo le.

“Ngangifuna ukuthandwa lokuphathwa kuhle.”—U-INNA LEZHNINA

UMNYAKA WOKUZALWA: 1981

ILIZWE AZALELWA KULO: ERUSSIA

IMBALI: NGAKHULA NZIMA

KUDALA KWAMI: Abazali bami babengezwa endlebeni futhi lami ngazalwa nginjalo. Kusukela ngizalwa ngaze ngaba leminyaka engu-6 impilo yami yayihamba kuhle kodwa kungakayingaphi abazali bami badivosa. Lanxa ngangisesemncane ngangikwazi ukuthi kutshoni ukudivosa futhi ngezwa ubuhlungu kakhulu. Sebedivosile ubaba lomnewethu bahlala eTroitsk, kwathi mina lomama sathuthela eChelyabinsk. Ngokuhamba kwesikhathi umama waphinda watshada. Ubaba ayesetshade laye wayeyisidakwa futhi wayehlala esitshaya lomama.

Ngo-1993 umnewethu wagalula futhi sonke emulini sethuka kakhulu. Lokhu kwenza umama waqalisa ukunatha futhi laye wayesengiphatha kubi. Ngaqalisa ukudinga impilo engcono. Ngangifuna ukuthandwa lokuphathwa kuhle. Yikho ngaqalisa ukuya emasontweni atshiyeneyo ngidinga ukududuzwa kodwa angikutholanga.

INDLELA IBHAYIBHILI ELAKUTSHINTSHA NGAYO UKUPHILA KWAMI: Ngathi sengileminyaka engu-13, omunye engangifunda laye owayenguFakazi kaJehova wangixoxela ezinye izindaba eziseBhayibhilini. Ngakukholisa ukufunda ngabantu abaseBhayibhilini abanjengoNowa loJobe abaqhubeka bekhonza uNkulunkulu lanxa babephakathi kobunzima. Ngaqalisa ukufunda iBhayibhili laboFakazi bakaJehova lokungena imihlangano yabo.

Ukufunda iBhayibhili kwenza ngafunda izinto ezinengi eziliqiniso. Ukwazi ukuthi uNkulunkulu ulebizo kwangithinta kakhulu. (IHubo 83:18) Ngamangala ngibona indlela iBhayibhili elichasisa ngayo izinto ezazizakwenzakala “ezinsukwini zokucina.” (2 KuThimothi 3:1-5) Ngathokoza kakhulu ngifunda ngokuthi abafileyo bazavuswa ngoba lokhu kutsho ukuthi ngizaphinda ngimbone umnewethu.—UJohane 5:28, 29.

Kodwa umama lobaba babengabathandi oFakazi bakaJehova. Lanxa bazama ukungenza ngiyekele ukufunda iBhayibhili angizange ngiyekele ngoba ngangikuthanda engangikufunda.

Kwakungalula ukubekezela ngesikhathi abangakithi bengiphikisa. Okunye okwangizwisa ubuhlungu kakhulu yikuthi umnawami owayehamba lami emihlanganweni yaboFakazi bakaJehova laye wagalula. Kodwa oFakazi bakaJehova bangincedisa kakhulu. Banginika uthando engangiludinga empilweni yami. Ngahle ngakwazi ukuthi yibo abakhonza uNkulunkulu ngeqiniso. Ngo-1996 ngabhabhathizwa ngaba nguFakazi kaJehova.

INDLELA ENGISIZAKALE NGAYO: Sengileminyaka engu-6 ngitshade lendoda engithandayo okuthiwa nguDmitry. Sisebenza ewofisini yegatsha laboFakazi bakaJehova eseSt. Petersburg. Ngokuhamba kwesikhathi abazali bami babengasaphikisani lalokho engikukholwayo.

Ngiyambonga uJehova ngoba sengimazi. Ukumkhonza sekwenze ngathokoza empilweni.

“Ngangilemibuzo eminengi.”—URAUDEL RODRÍGUEZ RODRÍGUEZ

UMNYAKA WOKUZALWA: 1959

ILIZWE AZALELWA KULO: ECUBA

IMBALI: NGAHLAMUKELA UHULUMENDE

KUDALA KWAMI: Ngazalelwa eHavana eCuba njalo sasihlala endaweni eyayilabantu abangayanga futhi kwakujayelekile ukubona abantu besilwa emgwaqweni. Ngisakhula ngaqalisa ukuthanda ijudo leminye imidlalo yokulwa.

Ngangipasa esikolo yikho abazali bami bangikhuthaza ukuthi ngiye eyunivesithi. Ngesikhathi ngikhonangale ngaqalisa ukubona angani uhulumende welizwe lethu kwakumele atshintshwe. Ngakhetha ukuhlamukela uhulumende futhi mina lomunye engangifunda laye sahlasela ipholisa sifuna ukulithathela umbhobho walo. Ipholisa lelo lasala lilimele kakhulu ekhanda. Sabotshwa kwathiwa sizabulawa ngokudutshulwa. Ngasengizakufa ngileminyaka engu-20 nje kuphela!

Ngisesitokisini ngangilokhu ngiphrakthiza ukuthi ngizakwenzani nxa sengidutshulwa. Ngangingafuni babone ukuthi ngiyesaba. Ngesikhathi esifananayo ngangilemibuzo eminengi. Ngangilokhu ngizibuza, ‘Yindaba abantu bephathwa kubi emhlabeni? lokuthi ‘Akula yini enye impilo engcono kulale?’

INDLELA IBHAYIBHILI ELAKUTSHINTSHA NGAYO UKUPHILA KWAMI: Isigwebo sokubulawa esasisiphiwe satshintshwa kwathiwa sasesizahlala ejele okweminyaka engu-30. Ngalesosikhathi ngahlangana laboFakazi bakaJehova ababebotshiwe ngenxa yakholo lwabo. Ngamangaliswa yisibindi ababelaso lokuthi ngabantu ababengathandi ingxabano. Babengazondanga lanxa babesetheswa icala abangalenzanga.

OFakazi bangifundisa ukuthi uNkulunkulu ufuna ukubenzelani abantu. Bangitshengisa amavesi eBhayibhili atshengisa ukuthi uNkulunkulu uzatshintsha umhlaba ube lipharadayisi futhi inhlupho, ubugebenga lokuphathwa kubi kwabantu kuyabe kungasekho. Bangifundisa lokuthi umhlaba uyabe usuhlala abantu abalungileyo njalo bazaphila kuze kube nini lanini.—IHubo 37:29.

Ngangikuthanda engangikufundiswa ngoFakazi kodwa ngangitshiyene labo. Ngangibona angani ngeke ngenelise ukungangeneli kwezombusazwe kumbe ukuphongukhangela nje abantu bephathwa kubi ngababusi. Yikho ngakhetha ukuthi ngizibalele iBhayibhili ngingedwa. Ngathi sengiliqedile ngananzelela ukuthi oFakazi bakaJehova yibo bodwa abalandela lokho okwakusenziwa ngamaKhristu okuqala.

Ukufunda iBhayibhili kwenza ngabona ukuthi kwakumele ngitshintshe izinto ezinengi empilweni yami. Ngokwesibonelo kwakumele ngiyekele ukukhuluma inhlamba kanye lokubhema. Kwakumele ngiyekele lokungenela kwezombusazwe. Kwakunzima ukutshintsha konke lokhu kodwa uJehova wangincedisa futhi kancane kancane ngatshintsha.

Okunye okwangithwalisa nzima yikutshiya ulaka. Lakhathesi lokhe ngicela uJehova ukuthi angincedise ngizibambe. Ngincedwe langamavesi anjengoZaga 16:32, ethi: “Umuntu ophuza ukuzonda ungcono kulendoda elamandla, lalowo ozibambayo nxa esezondile ungcono kulalowo onqoba idolobho.”

Ngo-1991 ngabhabhathizwa ngaba nguFakazi kaJehova. Ngabhabhathizelwa ejele phakathi kwedramu. Ngomnyaka olandelayo mina labanye sakhululwa sathunyelwa eSpain ngoba yikho lapho okwakulezihlobo zethu khona. Ngathi ngifika nje eSpain ngahle ngaya emihlanganweni yaboFakazi bakaJehova. OFakazi ababelapho bangamukela ngazo zombili futhi bangincedisa ukuthi ngiqalise kutsha impilo yami.

INDLELA ENGISIZAKALE NGAYO: Khathesi ngiyathokoza futhi ngikhonza uNkulunkulu ngilomkami lamadodakazi ethu amabili. Ngisebenzisa isikhathi sami esinengi ngincedisa abanye ukuthi bafunde iBhayibhili. Kwezinye izikhathi ngiyake ngicabange ngesikhathi lesiyana ngisasemncane sekumele ngibulawe, futhi kunengi kakhulu okuhle okwenzakeleyo kusukela ngalesosikhathi. Angisazange ngibulawe futhi sengilethemba. Ngikukhangelele ngabomvu ukuyaphila epharadayisi lapho okuyabe kungasela kuphathwa kubi ‘lokufa kungasekho.’—ISambulo 21:3, 4.

“Ukwazi ukuthi uNkulunkulu ulebizo kwangithinta kakhulu”

Mina lomkami siyakuthanda ukupha abangezwayo endlebeni amabhuku olimi lwezandla