IBhayibhili Liyamntshintsha Umuntu
KUYINI okwenza indoda eyayililunga lenkolo yamaRasta yagela inwele zayo futhi yatshiya ubandlululo? Kuyini okwenza indoda eyayilodlakela, ithunywa ngababethengisa izidakamizwa ukuthi iyethatha izikwelede ebantwini yatshintsha? Bala uzizwele ukuthi bathini.
“Angisabandlululi Muntu.”—UHAFENI NGHAMA
UMNYAKA WOKUZALWA: 34
ILIZWE AZALELWA KULO: ZAMBIA
IMBALI: NGANGILILUNGA LENKOLO YAMARASTA
KUDALA KWAMI: Ngazalelwa enkambeni yeziphepheli eZambia. Umama wabaleka eNamibia ngesikhathi sempi wasesiba lilunga lenhlanganiso yeSouth West Africa People (SWAPO). Inhlanganiso le yayilwisa umbuso weSouth Africa owawubusa iNamibia ngalesosikhathi.
Ngathi sengileminyaka engu-15 ngasengihlale enkambeni zeziphepheli ezinengi. Enkambeni lezi ze-SWAPO abasakhulayo babekhuthazwa ukuthi balwele inkululeko. Indaba zombusazwe yizo esasihlala sitshunyayezwa ngazo futhi sasitshelwa lokuthi sizonde amakhiwa.
Ngileminyaka engu-11 ngangifuna ukuba ngumKhristu. Ngangifuna ukuba lilunga lesonto eyayikhona enkambeni, eyayibunjwa yiRoma leLutheran le-Anglican kanye lamanye amasonto. Umfundisi engakhuluma laye wangiyalisa ukuthi ngizinikele ukuba lilunga lesonto. Kusukela khonapho ngangingasakholwa ukuthi kuloNkulunkulu. Sengileminyaka engu-15 ngaqalisa ukuthanda umculo we-reggae futhi ngangifisa ukuthi aluba ukuphathwa kubi kwabantu abamnyama kuyaphela, yikho ngacina ngijoyina iqembu lamaRasta. Ngagcina inwele ngasengiphotha irasta, ngaqalisa lokubhema imbanje, ngayekela lokudla inyama. Ngaqalisa lokulwela amalungelo abantu abamnyama. Lanxa kunjalo angitshiyanga izinto ezimbi engangizenza empilweni lamamuvi alodlakela ngangilokhe ngiwathanda, lenhlamba angiyitshiyanga.
INDLELA IBHAYIBHILI ELANGITSHINTSHA NGAYO: Ngo-1995 sengileminyaka engu-20 ngaqalisa ukucabangisisa ngokuthi vele ngifunani empilweni. Ngangifunda amabhuku aphathelane lenkolo yamaRasta. Amanye akhona ayecupha amazwi eBhayibhilini kodwa ayesithi nxa echasisa kusale kungelangqondo kimi. Yikho ngabona kungcono ukuthi ngizibalele iBhayibhili.
Omunye umngane wami laye owayeseqenjini lamaRasta wangipha ibhuku laboFakazi bakaJehova. Ngalibala ngedwa ibhuku lelo ngibala leBhayibhili. Ngokuya kwesikhathi ngahlangana laboFakazi bakaJehova futhi ngaqhubeka ngifunda labo.
Ngalwisa ngaze ngacina ngisekela ukubhema lonatha. (2 KwabaseKhorinte 7:1) Ngalungisisa indlela engangibukeka ngayo, ngagela amadredi ami, ngayekela lokubukela iphonogirafi lamamuvi alodlakela. Ngayekela lokukhuluma inhlamba. (Kwabase-Efesu 5:3, 4) Ngokuhamba kwesikhathi ngangingasabandlululi. (ImiSebenzi 10:34, 35) Ukuze ngenelise ukutshintsha kwakumele ngitshiye umculo owawukhuthaza ubandlululo futhi ngitshiye labangane bami ababezama ukungikhuthaza ukuthi ngibuyele empilweni yami yakudala.
Ngathi sengiphumelele ukutshintsha impilo yami ngadinga iWolu yaboFakazi bakaJehova ngasengicela ukuba lilunga labo. Izihlobo zami azizange zithabe ngesikhathi ngibhabhathizwa ngisiba nguFakazi kaJehova. Umama wathi uyangivumela ukukhetha loba yiphi inkolo, angakufuniyo yikuthi ngibe nguFakazi kaJehova. Esinye isihlobo sami esasilesikhundla kuhulumende sasihlala singichothoza ngokuthi nginguFakazi.
Okwanginceda ngaqinisela lanxa ngangiphikiswa yikunanzelela ukuthi uJesu wayebaphatha njani abantu lokusebenzisa iseluleko sakhe. Ngathi ngiqathanisa lokhu oFakazi abakufundisayo kanye lalokho okutshiwo liBhayibhili ngazibonela ukuthi ngasengiyitholile inkolo yeqiniso. Ngokwesibonelo oFakazi bayatshumayela njengoba nje iBhayibhili lisitsho. (UMathewu 28:19, 20; ImiSebenzi 15:14) Abangeni lasendabeni zombusazwe.—IHubo 146:3, 4; UJohane 15:17, 18.
INDLELA ENGISIZAKALE NGAYO: Imithetho eseBhayibhilini yanginceda kakhulu. Ngokwesibonelo ukutshiya ukubhema imbanje kwanginceda ukuthi ngingadlalisi imali. Ukungasebenzisi izidakamizwa sekungincede ngaba lempilakahle.
Khathesi sengikwazi ukuthi ngiphilelani njalo ngiyathokoza, okuyikho engangikufuna kusukela ngisakhula. Okuqakatheke kakhulu, yikuthi sengingumngane kaNkulunkulu oseduze.—UJakhobe 4:8.
“Angisavuki Ngolaka.”—UMARTINO PEDRETTI
UMNYAKA WOKUZALWA: 43
ILIZWE AZALELWA KULO: AUSTRALIA
IMBALI: NGANGITHENGISA IZIDAKAMIZWA
KUDALA KWAMI: Ngisakhula imuli yangakithi yayihlala ithutha. Sake sahlala emadolobheni amancane, edolobheni elikhulu kanye lasendaweni ethe qekele yodwa emakhaya e-Australia. Ngiyazikhumbula lezo nsuku ngilabazawabami labomalume sithiya, sizingela futhi silungisa izikhali zokuzingela njalo sibumba izinto ezitshiyeneyo.
Ubaba wayesenza umdlalo wenqindi yikho wangifundisa ukulwa ngisesemncane. Lokhu kwangenza ngaba ngumuntu olodlakela. Ngisakhula ngangitshona emabhawa nginatha utshwala. Mina labangane bami sasihlala siqala abantu sifuna ukulwa. Sasihlasela abantu abangu-20 kumbe abedlula lapho sihlome ngezingqamu kanye lenduku ezisetshenziswa emdlalweni we-baseball.
Ngangithengisa izidakamizwa lezinto ezintshontshiweyo ukuze ngithole imali. Ngangithunywa ngababethengisa izidakamizwa ukuthi ngiyebathathela izikwelede zabo ebantwini. Ngangisebenzisa umbhobho ukuze ngethusele abantu labo. Vele engangikufuna mina yikuthi ngibe ngithunywa ukuyabulala abantu. Ngangizitshela ukuthi kumele ngibulale bengakangibulali.
INDLELA IBHAYIBHILI ELANGITSHINTSHA NGAYO: Ngisakhula ngangike ngizwe ngaboFakazi bakaJehova. Ngiyakhumbula ukuthi ngathi sengileminyaka engaba ngu-20 ngabuza umama ukuthi uyakwazi yini lapho abahlala khona. Ngemva kwamalanga amabili uFakazi okuthiwa nguDixon waqoqoda lapho engangihlala khona. Sathi sesixoxe okwesikhathi esithile, wanginxusa emhlanganweni waboFakazi bakaJehova. Ngahamba futhi sengileminyaka eyedlula engu-20 ngiyingena imihlangano. OFakazi baphendula yonke imibuzo engangilayo besebenzisa iBhayibhili.
Kwangithokozisa ukufunda ngokuthi uJehova uyabathanda bonke abantu ngitsho lalabo abenza izinto ezimbi. (2 UPhetro 3:9) Ngafunda lokuthi uJehova nguBaba ongithandayo ongasoze angitshiye loba sekutheni. Kwangithokozisa ukwazi ukuthi uzangithethelela nxa ngingatshintsha indlela zami. U-Efesu 4:22-24 wanginceda kakhulu. Amavesi la angikhuthaza ukuthi ‘ngikhiphe ubuntu obudala, besengigqoka ubuntu obutsha obadalwa ngentando kaNkulunkulu.’
Kwakungumqanso ukuthi ngintshintshe indlela engangiphila ngayo. Phakathi kweviki ngangisenelisa ukungasebenzisi izidakamizwa kodwa ngempelaviki sengilabangane bami ngangicina sengizisebenzisa. Ngananzelela ukuthi nxa ngangifuna ukutshintsha kwakumele ngitshiyane labangane bami yikho ngabona kungcono ukuthi ngithuthe ngiye kweyinye indawo e-Australia. Abanye abangane bami bacela ukungiphelekezela, ngavuma. Sathi siphakathi kohambo baqalisa ukubhema imbanje basebenginika lami. Ngabatshela ukuthi ngangingasafuni ukubhema yikho ngangithutha. Sahle sayehlukana ngaqhubeka ngohambo. Ngemva kwesikhathi ngezwa ukuthi basuka lapho bayantshontsha ebhanga besebenzisa umbhobho.
INDLELA ENGISIZAKALE NGAYO: Sengehlukane labangane bami kwaba lula ukuthi ngitshintshe impilo yami. Ngo-1989 ngabhabhathizwa ngaba nguFakazi kaJehova. Ngathi sengibhabhathiziwe umnawami oyinkazana, lomama kanye lobaba labo baqalisa ukukhonza uJehova.
Khathesi sengileminyaka engu-17 ngitshadile futhi ngilabantwana abathathu. Angisavuki ngolaka lanxa ngingaze ngiqalwe. Sengifunde ukuthanda abantu ‘bezizwe zonke lezindimi zonke.’ (ISambulo 7:9) Amazwi akhulunywa nguJesu ayagcwaliseka empilweni yami. Wathi: “Nxa lingahlala liselizwini lami, liyabe lingabafundi bami sibili futhi lizalazi iqiniso njalo iqiniso lizalikhulula.”—UJohane 8:31, 32.
[Amabala aseceleni kwendima]
Ukuze ngenelise ukutshintsha kwakumele ngitshiye umculo owawukhuthaza ubandlululo
[Amabala aseceleni kwendima]
Mina labangane bami sasihlala siqala abantu sifuna ukulwa. Sasihlasela abantu abangu-20 kumbe abedlula lapho sihlome ngezingqamu kanye lenduku ezisetshenziswa emdlalweni we-baseball