UJesu NguNkulunkulu Yini?

ABANTU abanengi bacabanga ukuthi imfundiso yobuthathu bukaNkulunkulu “ingumgogodla wenkolo yamaKhristu.” Imfundiso le ithi uBaba leNdodana lomoya ongcwele ngabantu abathathu abanguNkulunkulu oyedwa. Umfundisi weRoma okuthiwa nguJohn O’Connor wakhuluma ngemfundiso yobuthathu bukaNkulunkulu wathi: “Siyakwazi ukuthi iyimpicabadala njalo kunzima ukuthi siyizwisise.” Yindaba imfundiso le inzima ukuzwisiseka?

Esinye isichazamazwi seBhayibhili sisinika isizatho esisodwa. Sithi: “Imfundiso le ayikho eBhayibhilini, akulavesi echasisa ngayo.” Lanxa imfundiso yobuthathu bukaNkulunkulu ingekho eBhayibhilini, abanengi abakholwa kuyo bazama ngamandla wonke ukudinga amavesi asekela imfundiso leyo baze batshintshe leminye imibhalo ukuze ivumelane lalokho abakukholwayo.

UJohane 1:1 Ufundisa Ngobuthathu BukaNkulunkulu Yini?

Izikhathi ezinengi abantu bajayele ukuchasisa kubi umbhalo kaJohane 1:1. Ku-King James Version, ivesi le ithi: “Ekuqaleni wayekhona uLizwi, njalo uLizwi wayeloNkulunkulu [ngesiGrikhi, ton the·onʹ], njalo uLizwi wayenguNkulunkulu [the·osʹ].” Evesini le ibala lesiGrikhi elithi the·osʹ elihunyutshwe ngokuthi nkulunkulu libhalwe ngendlela ezimbili. Kokokuqala lifakelwe isiqu esingu-ton, ngesiGrikhi okutshengisa ukuthi kuyabe kukhulunywa ngoNkulunkulu uSomandla. Kokwesibili khona isiqu esingu-ton asikho. Kambe ukuthi isiqu leso satshiywa ngephutha yini?

Yindaba imfundiso yobuthathu bukaNkulunkulu inzima ukuzwisiseka?

IVangeli likaJohane labhalwa ngolimi lwesiGrikhi olwalukhulunywa ngabantu abanengi okuthiwa yisiKoine. Ulimi lolu lulemithetho eqinileyo yokubhala nxa kusetshenziswa iziqu zamabala esinjengesithi ton. Isikhwicamfundo seBhayibhili u-A. T. Robertson siyavuma ukuthi nxa ibala lifakelwe isiqu ekuqaleni kutsho ukuthi kuhamba ndawonye futhi kutsho into efananayo engatshintshaniswa.” URobertson usebenzisa isibonelo esikuMathewu 13:38, othi: “Insimu [ngesiGrikhi, ho a·grosʹ] ngumhlaba [ngesiGrikhi, ho koʹsmos].” Ngolimi lwesiGrikhi ivesi le ingatsho lokuthi umhlaba uyinsimu ngoba kuwo womabili amabala kulesiqu ekuqaliseni.

Kuthiwani nxa ibala elifananayo lilesiqu kweyinye indawo kodwa kweyinye lingela njengakuJohane 1:1? Isikhwicamfundo seBhayibhili esithiwa nguJames Allen Hewett sakhuluma ngesibonelo sevesi le sathi: “Nxa sekunjalo kutsho ukuthi ibala lelo litsho okutshiyeneyo futhi okungafananiyo loba okungalinganiyo.”

UHewett usebenzisa isibonelo sika-1 Johane 1:5, othi “UNkulunkulu uyikukhanya.” NgesiGrikhi, “uNkulunkulu” libala elithi ho the·osʹ futhi lilesiqu ekuqaliseni. Kodwa elithi phos elihunyutshwe ngokuthi “uyikukhanya” lona alilasiqu ekuqaliseni. UHewett uthi: ‘Omunye umuntu angathi uNkulunkulu ufaniswa lokukhanya kodwa ngeke sithi ukukhanya nguNkulunkulu.” Izibonelo ezihambelana laleso nguJohane 4:24 othi, “UNkulunkulu ungumoya,” lo-1 Johane 4:16 othi, “UNkulunkulu uluthando.” Emavesini la womabili ibala elithi uNkulunkulu lilesiqu kodwa elithi umoya lelithi uthando awalasiqu ekuqaliseni. Ngakho ngeke sikutshintshanise kumbe sikuphendulele ngoba amavesi la awatsho ukuthi “umoya nguNkulunkulu” kumbe “uthando nguNkulunkulu.”

Ngubani “ULizwi”?

Izikhwicamfundo ezinengi zolimi lwesiGrikhi kanye labahumutshi beBhayibhili bayavuma ukuthi uJohane 1:1 kachasisi ukuthi “uLizwi” ngubani kodwa uveza ukuthi wayenjani. Omunye umhumutshi weBhayibhili okuthiwa nguWilliam Barclay uthi: ‘Ukuthi umphostoli uJohane kazange afake isiqu ekuqaliseni kwebala elithi theos kuhle kutshengise ukuthi wayechasisa. Wayengatsho ukuthi uLizwi ngumuntu ofananayo loNkulunkulu. Ngamazwi alula wayengatsho ukuthi uJesu nguNkulunkulu.” Usikhwicamfundo uJason David BeDuhn laye uthi: ‘NgesiGrikhi nxa ungatshiya isiqu ekuqaliseni kwebala elithi theos njengasemutshweni okuJohane 1:1c, ababalayo bayahle babekwazi ukuthi utsho ‘unkulunkulu.’ Ukuswelakala kwesiqu ebaleni elithi theos kuhle kulenze litshiyane lelithi ho theos, elihunyutshwa ngokuthi “uNkulunkulu.”’ UBeDuhn uqhubeka esithi: “KuJohane 1:1, uLizwi ayisoNkulunkulu onguye yedwa kodwa ngunkulunkulu okutsho ukuthi ungumoya njengoNkulunkulu.” Kumbe singakubeka ngamazwi kaJoseph Henry Thayer, isikhwicamfundo esasebenza ngesikhathi kuhunyutshwa i-American Standard Version sathi: “ULogos [kumbe, uLizwi] wayevela phezulu ezulwini kodwa kayisuye oPhezukonke.”

UJesu wakwenza kwacaca ukuthi kulomehluko phakathi kwakhe loYise

Indaba yokuthi uNkulunkulu ngubani kumele ibe yimpicabadala yini? Hatshi, uJesu watshengisa ukuthi ayisompicabadala. Wathi ethandaza kuYise watshengisa ukuthi kulomehluko ocacileyo phakathi kwakhe loYise wathi: “Ukuze bathole ukuphila okungapheliyo kumele bakwazi wena onguwe wedwa uNkulunkulu weqiniso lalowo omthumileyo, uJesu Khristu.” (UJohane 17:3) Nxa sikholwa kuJesu futhi sizwisisa iqiniso elicacileyo elifundiswa liBhayibhili, sizamhlonipha uJesu njalo simbone eyilokho ayikho khona, iNdodana kaNkulunkulu. Kanti njalo sizakhonza uJehova ‘onguye yedwa uNkulunkulu weqiniso.’