Icebo Lokuqala: Woba Ngumuntu Ohlelekileyo

Yenza okuqakathekileyo kuqala. IBhayibhili lithi: “Linanzelele ukuthi yiziphi izinto eziqakatheke kakhulu.” KwabaseFiliphi 1:10) Bhala phansi izinto ofuna ukuzenza. Lanxa zonke izinto ozibhalileyo ziqakathekile, zikhona ezinye eziqakatheke kulezinye. Khetha ukuthi yiziphi eziqakatheke kakhulu ubusuqala ngazo. a

Hlela kusengaphambili. UmTshumayeli 10:10 uthi: “Nxa ithuluzi lensimbi libuthundu njalo lingalolwanga, olisebenzisayo uzasebenzisa amandla amanengi. Kodwa ukuhlakanipha kwenza umuntu aphumelele.” Sifundani evesini le? Sifunda ukuthi silole amathuluzi ethu okutsho ukuthi sihlele kusengaphambili ukuze sisisebenzise kuhle isikhathi sethu. Nxa zikhona ezinye izinto kumbe imisebenzi engaqakathekanga kangako mhlawumbe akudingakali ukuthi uyenze kumbe ungayenza ngesinye isikhathi. Engxenye uyabe usuqedile ukwenza konke obukubhale phansi yikho usungakhetha ukwenza lokho obekumele ukwenze kwesinye isikhathi. Nxa ungahlela kusengaphambili, uzenelisa ukwenza okunengi futhi ukwenze kuhle, uyabe usufanana lesisebenzi esikhutheleyo esilola amathuluzi aso.

Ungabi ngumabamba zonke. Zifundise ukwala ukwenza izinto ezingaqakathekanga kangako kumbe ezikudlela isikhathi sakho esinengi. Ukuba lokunengi kokwenza kungenza ukhathazeke futhi ungathokozi.

Icebo Lesibili: Ungadlalisi Isikhathi

Ungabalisi. “Lowo okhangela umoya kasoze ahlanyele inhlanyelo, lalowo okhangela amayezi kasoze avune.” (UmTshumayeli 11:4) Sifundani evesini le? Nxa singabalisa ukwenza lokho okumele sikwenze, singadlalisa isikhathi futhi sicine senze okulutshwana kulalokho ebesingakwenza. Umlimi olindela ukuthi umkhathi uqale ulunge kasoze alime kumbe avune. Kuyafanana lathi nxa singalindela ukuthi izimo zonke zihambe ngendlela, kuzaba nzima ukuthi senze lokho okumele sikwenze. Kumbe singazitshela ukuthi kumele sazi konke ngesimo esithile singakenzi isinqumo. Kuliqiniso sibili ukuthi kuqakathekile ukuthi sichwayisise njalo sicabangisise singakenzi isinqumo. IZaga 14:15 zithi: “Okhaliphileyo uyacabangisisa ngawo wonke amanyathelo akhe.” Kodwa izikhathi ezinengi kuyabe sekuemele senze isinqumo lanxa singakwazi konke esiyabe sifuna ukukwazi.—UmTshumayeli 11:6.

Yazi ukuthi uzawenza amaphutha. UJakhobe 3:17 uthi: ‘Ukuhlakanipha okuvela phezulu kuNkulunkulu, kuyazwisisa.’ Kuhle sibili ukuthi sonke siyakufuna ukwenza izinto ngendlela eqondileyo, kodwa kwezinye izikhathi akulula ukwenza izinto ngendlela esiyabe sifuna ngayo. Lokhu kungenza sidane. Ngokwesibonelo umuntu ofundela olunye ulimi kumele akwamukele ukuthi uzaphambanisa futhi afunde emaphutheni akhe. Kodwa nxa esesaba ukuphambanisa kutsho ukuthi kuzaba nzima kakhulu ukuthi afundele olunye ulimi. Yikho kuqakathekile ukuthi sithobeke singenzi okungaphezu kwamandla ethu. IZaga 11:2 zithi: “Ukuhlakanipha ngokwabazithobayo.” Kanti njalo abantu abathobekileyo abakhangeleli ukuthi bangenzi amaphutha kodwa bayafunda emaphutheni abo, baze bazihleke nxa bephambanisa.

Icebo Lesithathu: Yonke Into Ilesikhathi Sayo

Woba lesikhathi sokusebenza lesokuzilibazisa. IBhayibhili lithi: “Kungcono ukuphumula kancane kulokusebenza gadalala ungaphumuli uxotshanisa umoya.” (UmTshumayeli 4:6) Abantu abaphilela ukusebenza izikhathi ezinengi abakukholisi ‘ukusebenza kwabo gadalala.’ Bayabe bedinwe befile bengela ngitsho isikhathi lamandla. Kodwa umuntu olivila yena uyabe ezifunela ukuphumula nje kuphela edlalisa isikhathi esiligugu. IBhayibhili lisikhuthaza ukuthi sisebenze nzima besesiwukholisa umvuzo wakhona ngoba ‘kuyisipho esivela kuNkulunkulu.’—UmTshumayeli 5:19.

Zinike isikhathi esaneleyo sokuphumula. Omunye umlobi weBhayibhili wathi: “Ngizalala ubuthongo behle.” (IHubo 4:8) Abantu abadala kumele balale okwamahola angaba ngu-8 ubusuku ngabunye ukuze umzimba lengqondo kuphumule kuhle. Nxa singalala okwaneleyo, sizasisebenzisa kuhle isikhathi ngoba kuzasinceda sigxile kulokho esikwenzayo futhi kuthuthukise indlela ingqondo yethu ebamba ngayo izinto okuzakwenza sifundele izinto ezintsha. Kodwa nxa singekela ukulala isikhathi esaneleyo, kuzaba nzima ukuthi sifunde izinto ezintsha, sizaphambanisa kanengi njalo sicaphuke masinyane.

Ungenzi izinto ezingaphezu kwamandla akho. “Kungcono ukukholisa lokho okubona ngamehlo kulokugijimisana lezifiso zakho.” (UmTshumayeli 6:9) Sifundani? Umuntu ohlakaniphileyo kavumeli ukuthi izifiso zakhe ezingaphezu kwamandla akhe zimbuse. Yikho kasoze athatheke ngezinto ezithengiswayo kumbe afune ukuthenga ngesikwelede. Kodwa uzasuthiseka ngalokho akwenelisiyo kumbe “lokho akubona ngamehlo.”

Icebo Lesine: Yenza Izinto Eziqondileyo

Woba zazi. Lokho okuqakathekisayo empilweni kuzakunceda ukuthi ukhethe kuhle futhi wenze izinto ezizakunceda. Nxa uqakathekisa ukwenza okuqondileyo uzakwenza izinqumo ezinhle njalo uzasisebenzisa kuhle isikhathi sakho. Manje kuyini okungakunceda wazi okuqakathekileyo? Yikubala iBhayibhili. Abantu abanengi sebenanzelele ukuthi iBhayibhili lilenhlakanipho encedayo.—IZaga 2:6, 7.

Thanda abanye. UKholose 3:14 uthi: ‘Uthando lwenza simanyane ngokupheleleyo.’ Ngeke sithokoze empilweni futhi sizwe sivikelekile nxa singabathandi abanye ikakhulu abemuli. Abantu abaqakathekisa kakhulu imali, umsebenzi kanye lemfundo abasoze bathokoze empilweni. Yikho iBhayibhili litshengisa ukuthi uthando luqakatheke kakhulu futhi kukhulunywa ngalo kanengi.—1 KwabaseKhorinte 13:1-3; 1 UJohane 4:8.

Zinike isikhathi sokufunda ngoNkulunkulu. Enye indoda okuthiwa nguGeoff yayiyikholisa impilo ilomkayo eyayimthanda labantwabayo kanye labangane futhi elomsebenzi omuhle. Lanxa kunjalo umsebenzi kaGeoff wawumenza abone abantu besebehlungwini futhi besifa njengoba wayesebenza ema-ambulensini. Wayehlala ezibuza ukuthi impilo vele kumele ibe njalo yini. Ngelinye ilanga wabala ibhuku laboFakazi bakaJehova wasethola izimpendulo zemibuzo ayelayo.

UGeoff watshela umkakhe labantwabakhe lokho ayekubala futhi labo bakuthanda abakuzwayo. Bonke baqalisa ukufunda njalo lokhu kwenza bathokoza emulini futhi kwabanceda ukuthi basisebenzise kuhle kakhulu isikhathi sabo. Ukufunda kwabo iBhayibhili kwabenza baba lethemba lokuphila okungapheliyo emhlabeni ongelakuhlupheka.—ISambulo 21:3, 4.

Okwenzakala kuGeoff kusikhumbuza amazwi kaJesu Khristu, athi: “Bayathokoza abakunanzelelayo ukuthi bayamdinga uNkulunkulu.” (UMathewu 5:3) Lawe uyafuna yini ukumazi kuhle uNkulunkulu? Nxa ungazinika isikhathi sokufunda ngoNkulunkulu uyabe usisebenzise kuhle kakhulu isikhathi sakho.