L-Aħbar Tajba Skont Luqa 23:1-56
23 Għalhekk, qamu kollha u ħaduh għand Pilatu.
2 Imbagħad bdew jakkużawh: “Dan ir-raġel qed ixewwex lin-nies tagħna u mhux qed iħallihom iħallsu t-taxxi lil Ċesari. Hu qed jgħid li hu stess hu Kristu r-re.”
3 U Pilatu staqsieh: “Int ir-Re tal-Lhud?” Ġesù wieġbu: “Int stess qed tgħid dan.”
4 Imbagħad Pilatu qal lill-qassisin importanti u lill-folol: “Ma sibt li għamel xejn ħażin dan ir-raġel.”
5 Imma huma bdew jinsistu: “Hu qed ixewwex lin-nies bit-tagħlim tiegħu fil-Lhudija kollha, mill-Galilija s’hawnhekk.”
6 Meta semaʼ dan, Pilatu staqsa jekk ir-raġel kienx mill-Galilija.
7 Wara li kkonferma li kien min-naħa fejn imexxi Erodi, bagħtu għandu, għax dan ukoll kien f’Ġerusalemm f’dawk il-jiem.
8 Meta Erodi ra lil Ġesù tgħidx kemm feraħ, għax kien ilu jixtieq jarah peress li kien semaʼ ħafna dwaru. Hu kien qed jittama li jarah jagħmel xi miraklu.
9 Għalhekk beda jagħmillu ħafna mistoqsijiet, imma Ġesù ma wiġbux.
10 Imma l-qassisin importanti u l-iskribi li kienu hemm bdew jakkużawh b’rabja kbira.
11 Imbagħad, Erodi u s-suldati tiegħu ddiżonorawh, u hu waqqgħu għaċ-ċajt billi libbsu libsa sabiħa u mbagħad bagħtu lura għand Pilatu.
12 Dakinhar Erodi u Pilatu saru ħbieb, imma qabel ma kinux jitħamlu.
13 Imbagħad Pilatu laqqaʼ lill-qassisin importanti, il-mexxejja, u n-nies
14 u qalilhom: “Intom ġibtu lil dan ir-raġel għandi bħala wieħed li qed iħeġġeġ lin-nies biex jagħmlu rewwixta. Issa jien interrogajtu quddiemkom u ma sibt l-ebda bażi għall-akkużi li qed iġġibu kontrih.
15 Infatti lanqas Erodi, għax hu bagħtu lura għandna. Hu m’għamel xejn li jistħoqqlu l-mewt.
16 Għalhekk, se nikkastigah u neħilsu.”
17 *——
18 Imma l-folla kollha għajtet: “Oqtol lil dan ir-raġel,* u eħilsilna lil Barabba!”
19 (Dan ir-raġel kien il-ħabs minħabba rewwixta li saret fil-belt u qtil.)
20 Pilatu reġaʼ kellimhom, għax hu ried jeħles lil Ġesù.
21 Imbagħad huma bdew jgħajtu: “Sammru maʼ zokk! Sammru maʼ zokk!”
22 It-tielet darba qalilhom: “Għala, x’għamel ħażin dan ir-raġel? Ma sibt xejn li ħaqqu l-mewt. Għalhekk, se nikkastigah u neħilsu.”
23 Imma huma bdew jinsistu u jgħajtu biex jiġi maqtul,* u hu ċeda.
24 Għalhekk, Pilatu ħa d-deċiżjoni li jagħmel dak li xtaqu huma.
25 Hu ħelsilhom lir-raġel li riedu, li kien il-ħabs minħabba rewwixta u qtil, u lil Ġesù kkundannah kif xtaqu huma.
26 Kif kienu qed jiħduh, huma qabbdu lil raġel jismu Xmun minn Ċirene, li kien ġej mill-kampanja, biex jerfaʼ z-zokk tat-tortura* taʼ Ġesù u jimxi warajh.
27 Folla kbira taʼ nies bdiet timxi warajh, inkluż nisa li bdew juru li huma mdejqin ħafna* u jibkuh.
28 Ġesù dar fuq in-nisa u qalilhom: “Nisa li toqogħdu Ġerusalemm, tibqgħux tibkuni. Minflok, ibku lilkom infuskom u lit-tfal tagħkom,
29 għax ġej iż-żmien meta n-nies jgħidu, ‘Ferħanin huma n-nisa li ma setgħux jinqabdu tqal, li ma welldux, u li ma kellhomx tfal x’jieħdu ħsieb!’
30 Imbagħad jibdew jgħidu lill-muntanji, ‘Aħbuna!’ u lill-għoljiet, ‘Għattuna!’
31 Jekk jagħmlu dawn l-affarijiet waqt li s-siġra għadha ħajja, x’se jiġri la tinxef?”
32 Kien hemm ukoll żewġt irġiel kriminali li kienu qed jittieħdu biex jinqatlu maʼ Ġesù.
33 U meta waslu fil-post li jismu Qorriegħa, huma sammruh maʼ zokk ħdejn il-kriminali, wieħed fuq il-lemin u l-ieħor fuq ix-xellug tiegħu.
34 Imma Ġesù qal: “Missier, aħfrilhom, għax ma jafux x’qed jagħmlu.” Iktar minn hekk, huma qassmu l-ħwejjeġ tiegħu billi tellgħuhom bix-xorti.
35 U n-nies baqgħu jħarsu. Imma l-mexxejja bdew iwaqqgħuh għaċ-ċajt u jgħidu: “Lill-oħrajn salvahom, mela ħa jsalva lilu nnifsu jekk hu l-Kristu, il-Magħżul t’Alla!”
36 Anki s-suldati bdew iwaqqgħuh għaċ-ċajt. Huma marru, offrewlu nbid qares,
37 u bdew jgħidu: “Jekk int ir-Re tal-Lhud, salva lilek innifsek.”
38 Ukoll, ’il fuq minn rasu kien hemm miktub: “Dan hu r-Re tal-Lhud.”
39 Imbagħad wieħed mill-kriminali li kien hemm imdendlin ħdejh beda jgħajru u jgħidlu: “Int il-Kristu, hux hekk? Mela salva lilek innifsek u lilna wkoll!”
40 Imma l-kriminal l-ieħor irrabja miegħu u qallu: “Lanqas minn Alla ma tibżaʼ, issa li ngħatajt l-istess kastig bħal taʼ dan ir-raġel?
41 Il-kastig tagħna hu ġust, għax aħna qed nieħdu dak li ħaqqna minħabba dak li għamilna, imma dan ir-raġel m’għamel xejn ħażin.”
42 Imbagħad qal: “Ġesù, ftakar fija meta tkun fis-Saltna tiegħek.”
43 Hu wieġbu: “Illum naċċertak li int se tkun fil-Ġenna miegħi.”
44 Għalkemm kien xi nofsinhar* waqgħet dalma kbira fuq l-art sa madwar it-tlieta taʼ wara nofsinhar,*
45 għax ix-xemx iddallmet. Imbagħad il-purtiera tas-santwarju ċċarrtet fi tnejn minn fuq s’isfel.
46 U Ġesù għajjat b’leħen għoli: “Missier, jien nafda ħajti* f’idejk.” Malli qal dan, miet.*
47 Meta l-uffiċjal tal-armata ra dak li kien ġara, hu beda jfaħħar lil Alla u jgħid: “Żgur li dan ir-raġel kien ġust.”
48 Meta l-folol li kienu miġburin biex jaraw x’inhu jiġri raw dawn l-affarijiet, huma marru lura d-dar iħabbtu fuq sidirhom bid-dwejjaq.
49 Dawk kollha li kienu jafuh, inkluż in-nisa li vvjaġġaw miegħu mill-Galilija, kienu weqfin ’il bogħod u raw x’ġara.
50 Issa kien hemm membru tal-Kunsill jismu Ġużeppi li kien raġel sewwa u ġust.
51 (Dan la qabel magħhom u lanqas appoġġahom fil-pjan tagħhom kontra Ġesù.) Hu kien minn Arimatija, belt tal-Lhud, u kien qed jistenna s-Saltna t’Alla.
52 Dan mar għand Pilatu u talbu permess biex jidfen lil Ġesù.
53 Wara niżżlu minn fuq iz-zokk, dawwar miegħu drapp tal-għażel fin, u qiegħdu f’qabar* imħaffer fil-blat li kien għadu qatt ma ntuża.
54 Dakinhar kien jum il-Preparazzjoni, u daqt kien se jibda s-Sabat.
55 Anki n-nisa li kienu vvjaġġaw miegħu mill-Galilija marru hemm. Huma ttawlu fil-qabar* u raw kif tpoġġa l-ġisem tiegħu.
56 Imbagħad marru lura biex jippreparaw ħwawar u żejt ifuħ. Imma ovvjament, fis-Sabat straħu skont il-Liġi.
Noti taʼ taħt
^ Ara App. A3.
^ Letteralment “Neħħi lil dan.”
^ Jew “jiġi maqtul maʼ zokk.”
^ Letteralment “iħabbtu fuq sidirhom bin-niket.”
^ Letteralment “madwar is-sitt siegħa.”
^ Letteralment “sad-disaʼ siegħa.”
^ Letteralment “l-ispirtu tiegħi.”
^ Jew “ħa l-aħħar nifs.”
^ Jew “f’qabar tat-tifkira.”
^ Jew “fil-qabar tat-tifkira.”
