Naħum 2:1-13
2 Ninwe, dak li jxerred in-nies tiegħek ġie għalik.
Ipproteġi l-postijiet iffortifikati.
Agħmel l-għassa fit-triq.
Ipprepara lilek innifsek* għall-gwerra u ssaħħaħ kemm jistaʼ jkun.
2 Għax Ġeħova se jagħti lura l-kburija taʼ ĠakobbFlimkien mal-glorja t’Iżrael,Għax l-għedewwa qerduhom;U qerdu l-friegħi tad-dwieli tagħhom.
3 It-tarki tal-irġiel b’saħħithom tal-għadu taʼ Ninwe huma miżbugħin ħomor,Il-gwerriera tiegħu huma mlibbsin kulur aħmar skur.
Matul il-ġurnata li jipprepara għall-gwerra,Il-ħadid tal-karrijiet tal-gwerra tiegħu jleqq bħan-narU l-gwerriera jxejru l-lanez magħmulin mis-siġar tal-ġnibru.
4 Il-karrijiet tal-gwerra għaddejjin bla kontroll mit-toroq.
Huma jiġru ’l fuq u ’l isfel lejn il-pjazez.
Huma jleqqu bħat-torċi mixgħula, u ħfief bħall-beraq.
5 Hu* se jibgħat għall-uffiċjali tiegħu.
Huma se jitfixklu hekk kif jimxu ’l quddiem.
Huma jiġru lejn is-sur tal-belt;Huma jsaħħu s-sur.
6 Il-bibien tax-xmajjar se jinfetħu,U l-palazz se jaqaʼ.*
7 Dan ġie deċiż: In-nies taʼ din il-belt ġew umiljati u ttieħdu fl-eżilju.L-ilsiera nisa qed jibku bħal ħamiemHekk kif iħabbtu fuq sidirhom.
8 Ninwe minn dejjem kienet bħal għadira bl-ilma,Imma issa n-nies qed jaħarbu.
“Ieqfu! Ieqfu!” Imma ħadd mhu ġej lura.
9 Isirqu l-fidda, isirqu d-deheb!
It-teżori tagħha ma jispiċċaw qatt.
Din hi mimlija b’kull tip t’affarijiet prezzjużi.
10 Il-belt hi vojta, abbandunata, u meqruda.
In-nies jaqtgħu qalbhom bil-biżaʼ, saqajhom ma jifilħuhomx, u ġenbejhom jitriegħdu;Minn wiċċhom, huma kollha jidhru ansjużi.
11 X’ġara mill-belt li kienet bħal post fejn jgħixu l-iljuni, fejn jieklu l-iljuni b’saħħithom,Fejn l-iljun jimxi mal-ferħ tiegħu,U ħadd ma jbeżżagħhom?
12 L-iljun kien iqattaʼ biżżejjed priża għall-frieħ tiegħu,U kien jifga l-annimali għall-iljunessi tiegħu.
Hu kien iżomm il-moħbiet tiegħu mimlijin bil-priża,Il-postijiet fejn jgħix kienu mimlijin b’annimali mqattgħin.
13 Ġeħova tal-armati jgħid: “Jien kontrik.Jien se naħraq il-karrijiet tal-gwerra tiegħek u nagħmilhom duħħan,U x-xabla se tiblaʼ l-iljuni b’saħħithom tiegħek.
Mhux se nħallik taqbad iktar priża fuq l-art,U l-leħen tal-messaġġiera tiegħek mhux se jinstemaʼ iktar.”
Noti taʼ taħt
^ Letteralment “Saħħaħ ġenbejk.”
^ Jistaʼ jkun li qed jirreferi għar-re tal-Assirja.
^ Letteralment “se jdub.”
