Lipuzo Ze Zwa kwa Babali

Mukreste u swanela ku nga cwañi musebezi wa ku zuma ni wa ku yamba?

Bibele ha i hanisi ku zuma kamba ku yamba. (Deuteronoma 14:4, 5, 9, 20; Mateu 17:27; Joani 21:6) Niteñi, Bakreste ba ba zumanga kamba ba ba yambanga ba swanela ku nyakisisa likuka li sikai za mwa Mañolo.

Mulimu n’a lumelelize Nuwe ni lusika lwa hae ku bulaya lifolofolo kuli ba ce, ibile fela ne ba sululela mali a zona fafasi pili ba si ka li ca kale. (Genese 9:3, 4) Taelo yeo ne i bonisa kuli bupilo bwa lifolofolo ki bwa butokwa kakuli ne bu simuluha ku Mulimu. Kacwalo, Bakreste ha ba bulayangi lifolofolo ka mulelo wa ku lika ku bona nji ba kona ku eza cwalo, kamba ka mulelo fela wa ku bapala kamba kabakala lunya.—Liproverbia 12:10.

Hape lu swanela ku nyakisisa ni mubonelo wa luna mwa taba ye. Baapositola ba ne ba li mandui mwendi ne ba tabanga hahulu ha ne ba yambanga litapi ze ñata. Kono ha ku na bupaki bo bu bonisa kuli ne ba itumbanga kabakala buikoneli bwa bona bwa ku yamba kamba bwa ku zuma, kamba kuli ne ba yambanga ni ku zuma ka mulelo wa ku kangisana ni ba bañwi kuli ba iponahalise kuli bona ba kona hahulu ku zuma ni ku yamba.—Samu 11:5; Magalata 5:26.

Kacwalo, lu swanela ku ipuza kuli: ‘Kana ni bonisa kuli ni nga bupilo ku ba bwa butokwa sina mwa bu ngela Jehova? Kana nako kaufela ni nahananga fela ni ku ambola za ku zuma ni za ku yamba? Kana mupilelo wa ka u bonisa kuli ni lata hahulu ku zuma ni ku yamba kamba u bonisa kuli ni sikombwa sa Mulimu? Kana ku zuma kamba ku yamba ku tahisa kuli ni swalisane hahulu ni batu ba ba si balumeli kamba kana ku tahisa kuli ni yubeke lubasi lwa ka?’—Luka 6:45.

Batu ba bañwi ba ba zumanga kamba ku yamba kuli ba fumane lico ba kana ba nahana kuli ha ku si ka fosahala ku siya misebezi ya kwa moya ni ku ya kwa ku yamba ni kwa ku zuma. Kono haiba lu sa lumelezi nto ifi kamba ifi ku lu palelwisa ku eza pili tato ya hae, lu ka bonisa kuli lu na ni tumelo ni sepo ku Mulimu. (Mateu 6:33) Hape Bakreste ba kuteka milao kaufela ya “Sesare” ye ama za ku zuma kamba za ku yamba, ibe kuli ba ba loba milao yeo ba fiwa koto kamba ha ba fiwi.—Mateu 22:21; Maroma 13:1.

Kuli batu ba bañwi ba be ni mubonelo wa Jehova ka za ku zuma ni ku yamba, ba swanela ku cinca mibonelo ya bona ku likana ni milao ya Mulimu. (Maefese 4:22-24) Kono lu tokwa ku kuteka likatulo za ba bañwi. Muapositola Paulusi n’a file kelezo ye swanela mwa taba ye, ha n’a ize: “Lu si ke lwa nyazana hape. Kono sihulu mu atule kuli mutu a si ke a beela mwanahabo se si ka mu wisa.” (Maroma 14:13) Haiba lu bonisa lilato ni likute le li cwalo ku ba bañwi, lu ka tahisa kozo mwa puteho mi lu ka tabisa Mubupi wa luna, yena Simbule sa bupilo kaufela.—1 Makorinte 8:13. *

[Litaluso za kwatasi]