• Naakaketiwa ki Mulimu. “Na kasibili nibeile mulena waka mwa lubona . . . nika kufa macaba kuli abe saanda sahao ni mafelelezo a lifasi kuli abe liluwo lahao.”—Samu 2:6, 8.

• Naakayola Mulena Davida. “Lupepezwi mwana, lufilwe mwana wamushimani . . . Puso yahae ikazwelapili mi kozo haina kufela, mwa lubona lwa Davida ni mwa mubuso wahae ilikuli autiise hahulu.”—Isaya 9:6, 7.

• Naakapepelwa mwa Betelehema. “Wena Betelehema . . . , ku wena kukazwa yenika keta kuba mubusi . . . butuna bwahae bukayo fita kwa mafelelezo a lifasi.”—Mika 5:2, 4.

• Naakahaniwa ni kubulaiwa. “Naakendiwa, mi nelu muunga kuli haki sesiñwi. . . . Naatabilwe kabakala bufosi bwaluna; naanyandisizwe kabakala lifoso zaluna.”—Isaya 53:3, 5.

• Naakazusiwa kwa bafu ni kukanyiswa. “Hauna kunituhelela mwa Libita. Hauna kulumeleza yasepahala wahao kuli abone mukoti. . . . Kwa lizoho lahao la bulyo kunani tabo kuya kuile.”—Samu 16:10, 11.

Kwa batu kaufela babakile bapila fa lifasi, Jesu Kreste ki yena feela yanaakopani ni lika zese lutalusize. Mane lingeloi nelibulelezi Maria ka za Jesu kuli: “Mulimu uka mufa lubona lwa Davida ndatahe, . . . mi Mubuso wahae hauna kufela.”—Luka 1:31-33.

Jesu naasikaba mulena hanaali fa lifasi. Kono ukabusa batu mwa Mubuso wa Mulimu inze ali kwa lihalimu. Ki kabakalañi Jesu haswanela kubusa batu? Halunyakisiseñi zanaaezize Jesu hanaasali fa lifasi.

•   Jesu naaisa pilu babañwi ni kubatusa. Jesu naatusanga batu kaufela kusina taba ni kone basimuluha ni kuli nebafumile kamba neli babotana. (Mateu 9:36; Mareka 10:16) Muuna yomuñwi yanaakula mbingwa hanaakupile tuso ku Jesu kuli: “Haulata, wakona kunikenisa,” Jesu ashwela makeke muuna yo mi amufolisa.—Mareka 1:40-42.

• Jesu naalulutile zeluswanela kueza kuli lutabise Mulimu. Naabulezi kuli: “Hamukoni kusebeleza Mulimu ni Bufumu.” Hape naabulezi kuli luswanela kuezeza babañwi zelubata kuli baluezeze. Jesu hape naabonisize kuli Mulimu waisa pilu ku zelueza, zelunahana, ni moluikutwela. Kacwalo, kuli lutabise Mulimu, luswanela ambuka kunahananga lika zemaswe. (Mateu 5:28; 6:24; 7:12) Hape Jesu naabulezi kuli, kuli lukone kuba ni tabo, luswanela kuituta zabata Mulimu kuli lueze ni kueza lika zeo.—Luka 11:28.

• Jesu naalutile zekutalusa kubonisa lilato. Zanaabulelanga Jesu ni zanaaezanga nelisusuezanga bateelezi bahae. “Buñata bwakomoka hahulu mulutelo wahae, kakuli naabaluta sina mutu yanani maata.” (Mateu 7:28, 29) Naabalutile kuli: ‘Mulate lila zamina.’ Mane naalapelezi batu babañwi bane batahisize kuli abulaiwe. Naalapezi kuli: “Ndate, ubaswalele, kakuli habazibi sebaeza.”—Mateu 5:44; Luka 23:34.

Jesu ki yena luli yaswanela kubusa batu kakuli unani sishemo mi walata kutusa batu. Kono ukakalisa lili kubusa batu?