“Haiba mukupa Ndate nto ifi kamba ifi, uka mifa yona ka libizo laka.”​—Joani 16:23.

Batu babañwi banahana kuli kuitusisa maswaniso habalapela ni kupundanga mabizo a mangeloi, bokukululu babona babashwile, ni bahalalehi, kwakona kubatusa kusutelela ku Mulimu. Kono Bibele ibonisa hande fokusweu kuli luswanela kulapela ku Mulimu ka kuitusisa libizo la Jesu Kreste. Halulapela ku Mulimu ka kuitusisa libizo la Jesu, lubonisa kuli lwaitebuha zaluezelize Jesu. “Hakuna yataha ku Ndate haisi ka na.”—Joani 14:6.

“Mumubulelele kaufela ze mwa lipilu zamina.”​—Samu 62:8.

Halulapela ku Jehova, luswanela kuambola sina molukona kuambolela ni ndate yalilato. Kufita kubala kamba kupeta zelulapela, luswanela kuambola ni yena ka likute ni ka kuzwelela kwatasaa pilu.

“Halukupa nto ifi kamba ifi ka kuya ka tato yahae, waluutwa.”​—1 Joani 5:14.

Mwa Bibele, Jehova ulutaluseza zaka luezeza ni zabata kuli lumuezeze. Kuli Mulimu aalabe litapelo zaluna, luswanela kulapela “ka kuya ka tato yahae.” Kuli lueze cwalo, luswanela kuituta Bibele ilikuli lumuzibe hande. Haiba lueza cwalo, ukautwa litapelo zaluna.

Mukupe kuli amife zemutokwa. Lwakona kukupa Mulimu kuli alufe zelutokwa, inge cwalo lico, liapalo, ni kulutusa kufumana mwa kuina. Kuzwafo, lwakona kumukupa kuli alufe butali bobuka lutusa kueza likatulo zende, mi hape lwakona kumukupa kuli alufe maata a kutiyela miliko yelukopana ni yona. Lwakona kukupa kuli alutuse kuba ni tumelo, aluswalele libi zaluna, ni kumukupa kuli alutuse.—Luka 11:3, 4, 13; Jakobo 1:5, 17.

Mulapelelange Babañwi. Bashemi babalata bana babona, babanga ni tabo kubona bana babona habalatana. Jehova ni yena ubata kuli ka kuba bana bahae, ni luna lulatane ni kuisezana pilu. Kacwalo, luswanela kulapelelanga bakuluna, bana baluna, ba mwa lubasi lwaluna, ni balikani baluna. Mulutiwa Jakobo naañozi kuli: “Mulapelelane.”—Jakobo 5:16.

Muitumelange ku Mulimu. Bibele ibulela cwana ka za Mubupi waluna kuli: “Naaezize bunde, ka kumifa pula yezwa kwa lihalimu ni linako za siselo, amikulisa ka lico ni kutaza lipilu zamina ka tabo.” (Likezo 14:17) Halunahana lika kaufela zaluezelize Mulimu, lukaitumela hahulu ku yena mwa tapelo. Hape luswanela kubonisa kuli lwaitumela ku Mulimu ka kumuutwa.—Makolose 3:15.

Fokuñwi lukona kuikutwa bumaswe bakeñisa kuli litapelo zaluna zezwelela kwa pilu halisika alabiwa ka nako yene lubata. Kana fo kutalusa kuli Mulimu haana taba ni luna? Batili! Halunyakisiseñi mitala yelatelela yebonisa libaka haluswanela kuzwelapili kulapela.

Bo Steve, bababulezwi mwa taba ya makalelo, bali: “Kuzwelapili kulapela kunitusize kuba ni tabo mwa bupilo.” Ki lika mañi zene batusize? Bo Steve nebakalile kuituta Bibele mi nebazibile libaka kuzwelapili kulapela hakuli kwa butokwa. Bali: “Nilapelanga ku Mulimu kuitumela ku yena kabakala balikani banifile kuli banituse. Cwale seninani tabo yetuna hahulu mwa bupilo.”

Kucwañi ka za bo Jenny bane baikutwanga kuli Mulimu haakoni kuutwa litapelo zabona bakeñisa kuli haki ba butokwa? Bo Jenny babulela kuli: “Hane niikutwanga kuli hani wa butokwa, nenilapelanga ku Mulimu kumukupa kuli anituse kuutwisisa libaka hane niikutwanga cwalo.” Kueza cwalo neku batusize cwañi? Batalusa kuli: “Kulapela ku Mulimu kunitusize kuba ni mubonelo oswanela, kunitusize kulemuha kuli pilu yaka niha ininyaza, Mulimu haniingi cwalo. Hape kunitusize kusazwafa.” Kana kulapela nekubatusize? Bo Jenny bali: “Kulapela kunitusize kuunga Jehova kuba wa luli, yalilato, Mulimu yaniisa pilu, Ndate, ni Mulikani, yanitusanga nako kaufela ibile feela nieza monikonela kaufela kueza zabata.”

Hape halunyakisiseñi mutala wa bo Isabel. Hane baitwezi, baalafi neba babulelezi kuli mwanaa bona naaka pepwa inze ali sihole. Nebakomokile hahulu ni kusaba hane bautwile taba yeo. Batu babañwi neba babulelezi kuli basulule mba yeo. Bo Isabel batalusa kuli: “Neniikutwa kuli nenika bulaiwa ki butuku bone niutwa kwa pilu.” Ki lika mañi zene baezize? Bali: “Nenikuta-kutezi kulapela ku Mulimu kuli anituse.” Hamulaho wa nako, bapepa mwana wamushimani, wa libizo la Gerard, mi naali sihole. Kana bo Isabel baikutwa kuli Mulimu naaalabile litapelo zabona? Eni. Ka nzila ifi? Bo Isabel babulela kuli: “Kubona mwanake yasaanani lilimo ze 14 cwale, inze aikola bupilo kusina taba ni buhole bwahae, kutahisa kuli niikutwe kuli Jehova ualabile litapelo zaka, mi ki mpo yende yanifile Jehova Mulimu.”

Manzwi a bo Isabel ao aluhupulisa manzwi a walisamu, ali: “Ukautwa kupo ya babaishuwa, wena Jehova. Ukatiisa lipilu zabona ni kubaisa hahulu pilu.” (Samu 10:17) Kaniti luli, luswanela kuzwelapili kulapela?

Mwa Bibele kunani litapelo zeñata zanaalapezi Jesu. Yezibahala hahulu kwa litapelo zeo ki yanaalutile balutiwa bahae. Ki lika mañi zelukona kuituta kwa tapelo yeo?