4 Kana Nelubupezwi Kuli Lukopanange ni Manyando?
Libaka Haluswanela Kuziba Kalabo Kwa Puzo Yeo
Kalabo kwa puzo yeo ilutusa kuba ni mubonelo oswanela ka za bupilo.
Za Kunahanisisa
Kana Mulimu yabupile lika zende hahulu fa lifasi wakona kutahiseza batu manyando hape?
Batu babasa lapeli Mulimu baanga kuli batu bakopana ni manyando kabakala kuli Mulimu habaisi pilu kamba kakuli Mulimu haayo. Batu babacwalo balumela kuli (1) Mulimu haana maata a kufelisa manyando, (2) Mulimu hatabeli kufelisa manyando, kamba (3) Mulimu haayo.
Kono kana zeo ki zona zetahisa kuli batu bakopane ni manyando?
MUITUTE ZEÑATA
Mubuhe vidio yeli, Lukona Kuikolwisa Cwañi Kuli Litaba Zeñozwi Mwa Bibele ki za Niti? yefumaneha fa webusaiti ya jw.org/loz.
Zeibulela Bibele
Mulimu naasika lubupa ka mulelo wa kuli lukopanange ni manyando.
Mulimu ubata kuli luikole kupila bupilo bobunde.
“Hakuna nto yende yefita kunyakalala ni kueza zende mwa bupilo [bwa batu], ni kuli mutu kaufela uswanela kuca ni kunwa ni kuikola misebezi yahae kaufela yaeza ka taata. Ki mpo yezwa ku Mulimu.”—MUEKELESIA 3:12, 13.
Mulimu naafile batu bapili bababeli lika kaufela zene batokwa kuli bapile bupilo bobusina manyando.
Naasika lela kuli batu bapili bao kamba bana bane bakapepwa ki bona bakopanange ni manyando.
Mulimu ali ku bona: “Mupepe mi muate, mutaze lifasi mi mubuse fahalimwaa lona.”—GENESE 1:28.
Bo Adama ni Eva nebaketile kusa utwa Mulimu.
Kueza cwalo kutahisize kuli bona ni bana babona kaufela bakopane ni manyando.
‘Sibi sikeni mwa lifasi ka mutu alimuñwi ni lifu litile ka sibi, mi ka mukwa ocwalo lifu layamba kwa batu kaufela kakuli kaufelaa bona baezize sibi.’—MAROMA 5:12. *
Mulimu naasika bupa batu ni buikoneli bwa kuizamaisa.
Sina feela halusa koni kupila mwa mezi, nelusika bupiwa ni buikoneli bwa kuizamaisa.
“Mutu yazamaya haakoni nihaiba kuetelela mihato yahae.”—JEREMIA 10:23.
Mulimu hatabeli kulubona inze lunyanda.
Mane yena ubata kulubona inze lueza molukonela kaufela kuambuka manyando.
“Umamele milao yaka! Haueza cwalo, kozo yahao ikaswana sina nuka.”—ISAYA 48:18.
^ para. 17 Mwa Bibele, linzwi la “sibi” liitusisizwe kuama kwa lika zemaswe zakona kueza mutu ni kwa muinelo obali ku ona batu kaufela obahozize.
Hape Mwendi Mwakona Kutabela Litaba Ze
TAWALA YA MULIBELELI
Mulimu Uikutwa Cwañi ka za Manyando Emukopana ni Ona?
Litimana ze za mwa Bibele zakona kumitusa kuutwisisa mwaikutwela Mulimu ka za manyando emukopana ni ona.
MUZUHE!
Ze I Bulela Bibele ka za Manyando
Kana Mulimu wa isa pilu kwa miliko ye lu tahelanga ni kwa butuku bo lu utwa?
