Amos 7:1-17
7 Eshi osho Omwene Omunamapangelo aeshe, Jehova, a ulikila nge: Tala! Okwa tuma oshihomo shoshipaxu, eshi oikunomwa yaxuuninwa* ya li ya hovela okumena. Ei oya li oikunomwa yaxuuninwa, konima eshi omwiidi wohamba wa li wa tetwa po.
2 Eshi oshipaxu sha mana okulya po oimeno yomedu olo, onda ti: “Akutu! Omwene Omunamapangelo aeshe, Jehova, alikana, va dimina po!+ Ongahelipi Jakob ta ka dula okuxupa?* Osheshi ye okwa nghundipala!”+
3 Onghee Jehova okwe shi talulula.*+ “Itashi ka ningwa,” Jehova osho ta ti.
4 Eshi osho Omwene Omunamapangelo aeshe, Jehova, a ulikila nge: Tala! Omwene Omunamapangelo aeshe, Jehova, okwa ifana omundilo u li ehandukilo. Owa pwiininika omeva mahapu a ya moule, nowa lungwinifa po oshitukulwa shedu.
5 Opo nee onda ti: “Akutu! Omwene Omunamapangelo aeshe, Jehova, alikana, lialuluka.+ Ongahelipi Jakob ta ka dula okuxupa?* Osheshi ye okwa nghundipala!”+
6 Onghee Jehova okwe shi talulula.*+ “Naasho itashi ka ningwa,” Omwene Omunamapangelo aeshe, Jehova, osho ta ti.
7 Eshi osho a ulikila nge: Tala! Jehova okwa li a fikama kekuma, olo la tungwa nongodi yokutungifa, nomeke laye omwa li mu na ongodi yokutungifa.
8 Onghee Jehova okwa tya kwaame: “Amos, ou wete shike?” Onghee onda tya: “Ongodi yokutungifa.” Opo nee Jehova okwa tya: “Ohandi ka tula ongodi yokutungifa mokati kovanhu vange, Israel. Itandi ke va dimina po vali.+
9 Eenhele dokoikulundudu daIsak+ otadi ka ninga omaputu, neenhele diyapuki daIsrael otadi ka mbuwala;+ nohandi ke uya neongamukonda ndi li omhinge neumbo laJerobeam.”+
10 Amasia, omupristeri waBetel,+ okwa tuma etumwalaka eli kohamba Jerobeam+ yaIsrael tali ti: “Amos oku li mokati keumbo laIsrael ta tu ondubo naave.+ Edu itali dulu vali okulididimikila eendjovo daye adishe.+
11 Osheshi eshi osho Amos ta ti, ‘Jerobeam ota ka fya keongamukonda, na Israel ota ka ya shili moukwatwa okudja medu laye.’”+
12 Opo nee Amasia okwa tya kuAmos: “Omumonikokule ove, inda, inda onhapo kedu laJuda, ke likongele omungome* woye oko, noku ka xunganekela oko.+
13 Ashike ove ino xunganeka vali muBetel,+ osheshi oku li onhele iyapuki yohamba+ nosho yo eumbo louhamba.”
14 Opo nee Amos okwa nyamukula Amasia ta ti: “Kanda li omuprofeti, ile omonamati womuprofeti; ashike onda li omufita woimuna,+ nonda li handi file oshisho omiti da fa omikwiyu.*
15 Ndele Jehova okwa kufa nge ko kokushikula oufita, na Jehova okwa tya kwaame, ‘Inda, xunganekela ovanhu vange, Israel.’+
16 Onghee uda ondjovo yaJehova: ‘Oto ti, “Ino xunganeka u li omhinge naIsrael,+ noino udifa+ u li omhinge neumbo laIsak.”
17 Onghee hano eshi osho Jehova ta ti: “Omukulukadi woye ota ka ninga ombwada moshilando, novanamati voye nosho yo ovanakadona voye otava ka fya keongamukonda. Edu loye otali ka tukulwa nongodi yokuyelekifa, naave mwene oto ka fila medu inali koshoka; na Israel ota ka ya shili moukwatwa okudja medu laye.”’”+
