Amos 6:1-14
6 “Woo ovo ve lineekela muvo vene* muSion,Kwaavo ve udite va amenwa* momhunda yaSamaria,+Ovalumenhu ovanenenhu mokati koiwana oyo ya fimanenena,Ovo muvo mwa dja eumbo laIsrael!
2 Taulukeni mwa finda kuKalne nokutala.
Indeni okudja oko mwa yuka kuHamat Shinene,+Nokuya kuGat shOvafilisti.
Mbela oku li xwepo e dule omauhamba* aa,Ile oshitukulwa shavo osha kula shi dule sheni?
3 Mbela omwa kufa mo momadiladilo eni efiku loudjuu,+Nokweeta mo epangelo* lelongifo leenghono?+
4 Ohava nangala keembete da longwa momayoo eendjaba,+ nokutandavela koipundi,+Tava li eedi deendume domoufita nosho yo outana va ondoka;*+
5 Ova tota omaimbilo taa endele pamwe nomikwelengedjo dokaxumbafeta,*+Nongaashi David, ova tota po oishikomwa yomusika;+
6 Ohava nwine omaviinyu momaholo makula e yadi,+Nove livaeka vo vene nomaadi mawa elela.
Ashike kave na ko nasha* noudjuu waJosef.+
7 Onghee ovo tava ka kala votete mokati kaavo tava ka twalwa moukwatwa,+Noivilo yomaweelelo yaavo va tandavela otai ka xula.
8 ‘Omwene Omunamapangelo aeshe, Jehova, okwa ana kuye mwene,’*+ Jehova, Kalunga komatangakwaita, osho ta ti,‘“Ondi tonde ounhwa waJakob,+Onda nyanyala eeshungongulu daye da pama,+Nohandi ka yandja oshilando naashishe osho shi li mo.+
9 “‘“Nongeenge ovalumenhu omulongo ova fyaala meumbo limwe, navo otava ka fya.
10 Omupambele* ote ke uya e va kufe mo, noku va xwika po kooumwe nooumwe. Ota ka kufa mo omakipa avo meumbo; opo nee ota ka lombwela keshe oo e li meenduda domeni deumbo ta ti, ‘Mbela ope na vali umwe e li pamwe naave?’ Nota ka tya, ‘Kape na sha!’ Opo nee ota ka tya, ‘Kala wa mwena!’ Osheshi halo efimbo lokutumbula nande edina Jehova.’”
11 Osheshi Jehova oye ta yandje oshipango,+Nota ka hanauna po eumbo lakula li ninge oikulukuma,Neumbo linini oitekaukile.+
12 Mbela eenghambe ohadi tondoka kemanya,Ile mbela ope na oo ta ka pulula oko neengobe?
Osheshi omwa lundululila ouyuki moshimeno shi na oudiyo,Noshiimati shouyuki omoshimbodi shilula.*+
13 Omwa hafela osho shihe na oshilonga,Nomwa ti, “Mbela inatu ninga ovanaenghono* keenghono detu vene?”+
14 Onghee hano nye eumbo laIsrael, ohandi ke mu etela oshiwana shi mu lwife,’+ Jehova, Kalunga komatangakwaita, osho ta ti,‘Notashi ke mu fininika okudja kuLebo-hamat*+ fiyo okEfilu* laAraba.’”
Omashangelo opedu
^ Ile “ve udite etumba.”
^ Ile “ve lishii.”
^ Tashi ulike komauhamba aJuda naIsrael.
^ Eln., “oshipundi.”
^ Ile “eendumetana.”
^ Ile “doshishikomwa sheengodi.”
^ Eln., “inava ehamekwa.”
^ Ile “komwenyo waye.”
^ Eln., “Omumwainamati waxe.”
^ Ile “omoululu.”
^ Eln., “likufila omaluvinga.”
^ Ile “poshivelo shaHamat.”
^ Tala Omafatululo oitya.
