MBELA oshiwana ashishe nomupangeli washo otashi ka kala sha tya ngahelipi ngeenge osha kala tashi dulika kuJehova e li Omupangeli washo nokeemhango daye? Enyamukulo kepulo olo ola li li liwetikile kwaasho sha li sha ningwa po pefimbo lokupangela kwomido 40 kwohamba Salomo.

Fimbo David ina fya, okwa li a nangeka po omonamati waye Salomo oye e mu pingene po. Kalunga okwa li a lombwela Salomo okupitila mondjodi a indile keshe osho a hala. Salomo okwa li a indila e pewe ounongo neshiivo a dule okutokola ovanhu pandunge nopauyuki. Jehova okwa li a hafela eindilo laSalomo nokwa li e mu pa ounongo neshiivo. Okwa li yo e mu udanekela oku mu pa oupuna, efimano nomwenyo mule ngeenge okwa kala ta dulika.

Salomo okwa li a shiivika nawa apeshe omolwokuninga omatokolo e li pandunge. Pomhito imwe, ovakainhu vavali ova li ve uya kuye tava kondjele okaana, nakeshe umwe womuvo okwa li ta ti kutya oye ina yako. Salomo okwa ti kutya okaana naka tetwe pokati opo omukainhu keshe a pewe oshipambu shako. Omukainhu umwe okwa li a dimina shi ningwe, ndele ina yolela yokaana okwa ti naka ka pewe mukwao. Kungaho, Salomo okwa li a mona kutya omukainhu oo a li omunanghenda oye ina yokaana, onghee okwa li e ke mu pa. Diva konima yaasho, Ovaisrael aveshe ova li va uda kombinga yokutokola kwaSalomo moshinima osho, nova li ve wete kutya Salomo okwa pewa ounongo kuKalunga.

Oshinima shimwe sha denga mbada osho Salomo a li a longa osho okutungila Jehova otembeli ikumwifi muJerusalem, oyo ya li ondingadinga yelongelokalunga lashili muIsrael. Salomo okwa li a ilikana peyapulo layo a ti: ‘Taleni, eulu, heeno, eulu lopombadambada itali mu wanene, hano unene ngahelipi ongulu ei ame nde i tunga.’ — 1 Eehamba 8:27.

Salomo okwa li a shiivika apeshe, nokuli nokoilongo yokokule ngaashi Sheba, shomuArabia. Ohambanghainhu yokuSheba oya li ye uya kuSalomo i tale efimano noupuna waye nokutala kutya oku na ounongo u fike peni. Oya li ya kumwa neenghono kounongo waSalomo nosho yo kehepuluko laIsrael noya li ya tanga Jehova eshi a nangeka po ohamba inongo ya tya ngaho. Molwaashi Jehova okwa li a nangeka noupuna Salomo, Israel osha li sha hepuluka nosha li shi na ombili inene osho inashi monika nale mondjokonona yasho.

Shinyikifa oluhodi, Salomo okwa ka dopa okukala metwokumwe nounongo waJehova. Okwa li a nyona oshipango shaKalunga eshi a hombola ovakainhu omafele. Vamwe vomovakainhu ovo okwa li hava longele oikalunga yoiwana oyo ya li ya dingilila Israel. Kanini nakanini, ova li ve mu ningifa a efe po okulongela Jehova ndele ta hovele okulongela oikalunga. Jehova okwa li e mu lombwela kutya ote ke mu kufa oshitukulwa shimwe shouhamba. Kalunga okwa li a popya kutya ota ka kala ashike noshitukulwa shinini shouhamba omolwaxe, David. Nonande Salomo okwa li a fiya po elongelokalunga lashili, Jehova okwa kala omudiinini kehangano li na sha nOuhamba olo a li a ninga naDavid.

— Oshileshwa eshi osha kanghamena kEehamba do-1 etukulwa lo-1 fiyo eti-11; Omafimbo omati-2 etukulwa lo-1 fiyo eti-9; nosho yo Deuteronomion 17:17.