Jerimaya 8:1-22
8 Enẹ Jihova ọ ta, “Evaọ oke yena, a te kwa igbenwa ivie Juda, igbenwa ikpahwo-esuo riẹ, igbenwa izerẹ na, igbenwa eruẹaro na, gbe igbenwa ahwo nọ a be rria Jerusalẹm no iki rai ze.
2 A te vravra ae fihọ rọkẹ ọre na, ọvẹre na, jẹ rọkẹ ogbaẹmo obọ idhiwu na kpobi nọ a you, nọ a jẹ gọ, nọ a je lele, nọ a jẹ nekpẹ mi, nọ a je guzou kpotọ kẹ.+ A ti koko ae họ họ, yọ a ti ki ai gbe he. E te jọ wọhọ emaniọ evaọ otọ na.”+
3 “Yọ ikiọkotọ unuwou omuomu nana nọ e zọ e te salọ uwhu siọ uzuazọ ba evaọ eria kpobi nọ mẹ te vaha ae kpohọ,” ere Jihova olori egbaẹmo ọ ta.
4 “Yọ whọ rẹ siọ ae ba ẹvuẹ hẹ inọ, ‘Enẹ Jihova ọ ta:
“Kọ a re kie nọ a gbẹ wariẹ kpama ha?
Otẹrọnọ ọjọ o kuomarẹriẹ, kọ ọdekọ o gbe ti kuomarẹriẹ re?
5 Kọ fikieme ahwo nana, Jerusalẹm, a rọ nyasiọ Ọghẹnẹ ba kri te enẹ?
A dada abọ mu eviẹhọ;A be rọwo kuomarẹriẹ hẹ.+
6 Me fi ezọ hotọ jẹ gaviezọ ziezi, rekọ a ta uzẹme he.
Uvumọ ohwo o siobọno imuomu riẹ hẹ hayo nọ họ inọ, ‘Kinọ eme me ru na?’+
Omomọvo o bi zihe kpohọ uruemu nọ ahwo buobu a bi ru, wọhọ anyenya nọ ọ be họrọ ruọ ẹmo.
7 Makọ ogbodu nọ ọ rrọ ehru na dede ọ riẹ ezi riẹ sa-sa;*Erueruẹ avọ ọmọvra owisẹ gbe ọmọka* a re koko oke nọ a re ro zihe ze.*
Rekọ ahwo obọmẹ a wo otoriẹ oke ẹdhoguo Jihova ha.”’+
8 ‘Ẹvẹ wha rẹ ta nọ: “Ma wo areghẹ, yọ ma wo uzi* Jihova”?
Uzẹme riẹ họ, ọrue ọvo a be rọ ugbẹ ọrue+ orọ ikere-obe na kere.
9 A ru oma vuọ enọ i wo areghẹ na no.+
Iguegue e ro rai oma no, yọ obọ u ti te ai.
Rri! A siọ ẹme Jihova no,Kọ didi areghẹ a wo?
10 Fikiere mẹ te rehọ eyae rai kẹ ezae efa,Mẹ te rehọ idhu rai kẹ amọfa re a wo ai;+Keme no ọnọ ọ mae kawo rite ọnọ ọ mae rro, omomọvo o bi wo erere ewhariọ;+No ọruẹaro rite ozerẹ, omomọvo o bi fi iwhayo.+
11 Yọ a be gwọlọ siwi omonwa ọmọtẹ ahwo mẹ* evevere,* be ta nọ,“Udhedhẹ o riẹ! Udhedhẹ o riẹ!”
Kpakiyọ udhedhẹ o riẹ hẹ.+
12 Kọ oma eware etọtọ nọ a ru na o be vuọ ae?
Oma o be vuọ ae vievie he!
A tubẹ riẹ epanọ oma o rẹ vuọ ohwo dede he!+
Fikiere a ti kie evaọ udevie enọ i kie no.
A ti zoruẹ okenọ mẹ te kẹ ae uye,’+ ere Jihova ọ ta.
13 ‘Okenọ me ti koko ae họ, mẹ te raha ae no,’ ere Jihova ọ ta.
‘Uvumọ ubi u ti kiọkọ ehru ure evaene na ha, uvumọ ubi ifigi o te jọ ehru ure ifigi na ha, yọ ebe na i ti lo no.
Oware nọ mẹ kẹ rai u ti vru ku ai.’”
14 “Fikieme ma rọ keria etenẹ?
Joma kokohọ re ma ruọ eva ikpewho nọ a di ogba wariẹ họ* na+ re ma jọ obei whu.
Keme Jihova Ọghẹnẹ mai ọ te raha omai no,Ọ kẹ omai ame nọ a nua re ma da,+Keme ma thọ uzi Jihova no.
15 Ma je rẹro udhedhẹ, rekọ oware uwoma ovo o ze he,Ma je rẹro oke usiwo, rekọ idudu họ oware nọ o riẹ!+
16 A be jọ obọ Dan yo edo enyenya nọ i bi kuẹwẹ ọgaga.
Otọ na soso u bi nuhuFiki edo ubo enyenya ezae nọ e rrọ eva riẹ.
A te wọ ze, a vẹ te raha ẹkwotọ na muotọ avọ eware kpobi nọ e riẹe eva,Okpẹwho na avọ ahwo nọ a be rriae.”
17 “Keme rri, me bi vi eraomuomu ruọ udevie rai,Eraomuomu nọ i wo obi nọ a rẹ sai ru fihọ ruru hu,E te ginẹ rowo owhai,” ere Jihova ọ ta.
18 A rẹ sai siwi uweri mẹ kpo ho;Udu mẹ o be mọ.
19 Edo ubo nọ a bi bo rọkẹ obufihọ o bi do no obọ ugbothabọ ze,O bi do no obọ ọmọtẹ ahwo mẹ ze, inọ:
“Kọ Jihova ọ gbẹ rrọ Zayọn?
Hayo kọ ovie riẹ ọ gbẹ rrọ eva riẹ?”
“Fikieme a be rọ rehọ emema rai nọ a kare,Gbe eghẹnẹ erẹwho efa nọ i fioka ha nọ a be gọ ro ru omẹ eva dha?”
20 “Oke ivuẹvu o vrẹ no, ezi ivo na ọ vrẹ no,Rekọ a ri ti siwi omai hi!”
21 Mẹ be rova fiki omonwa ọmọtẹ ahwo mẹ;Mẹ rrọ ọkora.+
Idudu e ruọ omẹ oma no.
22 Kọ uvumọ balsam* o gbẹ rrọ Giliad?+
Hayo kọ uvumọ ohwo nọ o re siwi* ọ gbẹ rrọ eva riẹ?+
Kọ fikieme a gbe ri ru ọmọtẹ ahwo mẹ wariẹ wo omokpokpọ họ?+
