Jerimaya 28:1-17
-
Jerimaya avọ Hananaya ọruẹaro ọrue na (1-17)
28 Evaọ ukpe ovo yena, evaọ obọ emuhọ esuo Zẹdikaya ovie+ Juda, evaọ ukpe avọ ene, evaọ amara avọ isoi, Hananaya ọruẹaro na, ọmọzae Azzọ ohwo Gibiọn na+ ọ tẹ jọ iraro izerẹ na gbe ahwo na kpobi ta kẹ omẹ evaọ uwou Jihova nọ:
2 “Enẹ Jihova olori egbaẹmo, Ọghẹnẹ Izrẹl ọ ta, ‘Me ti wiri owhowha ovie Babilọn na no.+
3 Evaọ oware wọhọ ikpe* ivẹ, mẹ te rehọ ekwakwa uwou Jihova kpobi nọ Nebukadneza ovie Babilọn ọ kwa no oria nana kpobọ Babilọn na zihe ziọ oria nana.’”+
4 “‘Mẹ te rehọ Jẹkonaya+ ọmọzae Jehoyakim,+ ovie Juda zihe ziọ oria nana, te ahwo Juda kpobi nọ a mu kpohọ igbo Babilọn na,’+ ere Jihova ọ ta, ‘keme me ti wiri owhowha ovie Babilọn.’”
5 Kẹsena Jerimaya ọruẹaro na ọ tẹ jọ iraro izerẹ na gbe ahwo kpobi nọ a dikihẹ uwou Jihova na ta ẹme kẹ Hananaya ọruẹaro na.
6 Jerimaya ọruẹaro na ọ ta nọ: “Ami!* Jọ Jihova o ru ere! Jọ Jihova o ru eme nọ whọ ruẹaro rai na gba, re a rehọ ekwakwa uwou Jihova na gbe ahwo kpobi nọ a mu kpohọ igbo na zihe no obọ Babilọn ziọ oria nana!
7 Rekọ, ivie, kezọ kẹ ovuẹ nana nọ mẹ be ta fihọ ezọ ra gbe ezọ ahwo na kpobi na.
8 Evaọ oke krẹkri nọ u kpemu, eruẹaro nọ e kake rehọ omẹ avọ owhẹ jọ a jẹ hae ruẹaro kpahe ẹmo, okpẹtu, gbe okpẹyao nọ o re vo* nọ e te jọ ekwotọ buobu gbe ekwotọ-ivie ilogbo.
9 Otẹrọnọ ọruẹaro ọ ruẹaro kpahe udhedhẹ, nọ ẹme ọruẹaro yena o je rugba, ẹsiẹe a rẹ riẹ nọ Jihova o gine vi ọruẹaro yena.”
10 Nọ ọ ta ere, Hananaya ọruẹaro na o te si ọkpọ owhowha na no uriohọ Jerimaya ọruẹaro na, o te wiri ei no.+
11 Kẹsena Hananaya ọ tẹ jọ iraro ahwo na kpobi ta nọ: “Enẹ Jihova ọ ta, ‘Nwanọ enẹ ọvona me ti wiri owhowha Nebukadneza ovie Babilọn no uriohọ erẹwho na kpobi evaọ oware wọhọ ikpe ivẹ.’”+ Jerimaya ọruẹaro na ọ tẹ nyavrẹ.
12 Nọ Hananaya ọruẹaro na o wiri ọkpọ owhowha na no uriohọ Jerimaya ọruẹaro na no, ovuẹ nana u te no obọ Jihova bru Jerimaya ze, inọ:
13 “Nya re whọ ta kẹ Hananaya nọ, ‘Enẹ Jihova ọ ta: “Ekpọ owhowha ure who wiri,+ rekọ ekpọ owhowha ayọno who ti ru ro nwene ai.”
14 Keme enẹ Jihova olori egbaẹmo, Ọghẹnẹ Izrẹl ọ ta: “Me ti fi ọkpọ owhowha ayọno họ uriohọ erẹwho nana kpobi, re a gbodibo kẹ Nebukadneza ovie Babilọn, yọ a te gbodibo kẹe hrọ.+ Makọ erao ẹwọ na dede mẹ te rehọ ae kẹe.”’”+
15 Kẹsena Jerimaya ọruẹaro na ọ tẹ ta kẹ Hananaya+ ọruẹaro na nọ: “Ivie gaviezọ, whẹ Hananaya! Jihova o vi owhẹ hẹ, rekọ who ru nọ ahwo nana a bi ro fievahọ ẹme ọrue.+
16 Fikiere enẹ Jihova ọ ta, ‘Rri! Me bi si owhẹ no otọ na no. Who ti whu enukpe nana, keme who ru nọ ahwo a be rọ wọso Jihova.’”+
17 Ere Hananaya ọruẹaro na o ro whu evaọ ukpe yena, evaọ amara avọ ihrẹ.
