Jerimaya 41:1-18
41 Evaọ amara avọ ihrẹ, Ishmẹl+ ọmọzae Nẹtanaya ọmọzae Ẹlishama, ọnọ o no uyẹ uvie* na ze jẹ rrọ omọvo ahwo ovie na nọ a viodẹ, ọ tẹ nyabru Gẹdelaya ọmọzae Ahaekam ziọ Mizpa+ avọ ezae ikpe efa. Epanọ a jẹ rọ re emu kugbe evaọ Mizpa na,
2 Ishmẹl ọmọzae Nẹtanaya avọ ezae ikpe nọ e jọ kugbei na a tẹ kpama, a tẹ rọ ọgbọdọ duwu Gẹdelaya ọmọzae Ahaekam ọmọzae Shefan fihọ otọ. Ere o ro kpe ohwo nọ ovie Babilọn o ro mu ọnọ o wuzou ẹkwotọ na.
3 Ishmẹl o te je kpe ahwo Ju kpobi nọ a jọ kugbe Gẹdelaya evaọ Mizpa no, jegbe isoja ahwo Kaldia nọ e jọ etẹe.
4 Evaọ ẹdẹ avọ ivẹ nọ a ro kpe Gẹdelaya no, nọ uvumọ ohwo ọ re riẹ kpahe iẹe he,
5 ezae udhone i te no obọ Shẹkẹm,+ obọ Shailo,+ gbe obọ Sameria+ ze. A nware etuagba rai no, a bẹre iwu rai, a bru ela họ omarai,+ yọ a wha ekẹ ibi ekakọ gbe frankinsẹns+ nọ a be rehọ ziọ uwou Jihova.
6 Fikiere Ishmẹl ọmọzae Nẹtanaya o te no Mizpa vrẹ nyai zere ai, yọ ọ be viẹ nọ ọ be nya na. Nọ o te ai oma, ọ tẹ ta kẹ ae nọ: “Wha nyabru Gẹdelaya ọmọzae Ahaekam ze.”
7 Rekọ nọ a te okpẹwho na no, Ishmẹl ọmọzae Nẹtanaya avọ ezae nọ i je lele iei a te kpe ai no je gbolo ai fihọ ọgọdọ-ame.*
8 Rekọ ezae ikpe jọ e jọ usu rai nọ e ta kẹ Ishmẹl nọ: “Who kpe omai no ho, keme ma wo iwhiti, ebali, ewhri, gbe ọnyọ buobu nọ ma si no họ obọ ẹwọ na.” Fikiere o gbe kpe ezae yena kugbe imoni rai hi.
9 Ishmẹl o te gbolo iri ezae kpobi nọ o kpe na fihọ ọgọdọ-ame* ologbo jọ, onọ Asa ovie na ọ tọ fiki Beasha ovie Izrẹl.+ Ọgọdọ-ame* nana Ishmẹl ọmọzae Nẹtanaya ọ kwa iri ezae nọ o kpe na vọ.
10 Ishmẹl o mu ahwo kpobi nọ a kiọkọ Mizpa,+ te emetẹ ovie na gbe ahwo kpobi nọ a nyaseba Mizpa, enọ Nebuzaradan oletu iroiro na o mu họ Gẹdelaya+ ọmọzae Ahaekam obọ. Ishmẹl ọmọzae Nẹtanaya o mu rai, ọ tẹ nyavrẹ re ọ fa vrẹ bru ahwo Ammọn.+
11 Nọ Johenan+ ọmọzae Kariya avọ iletu ogbaẹmo kpobi nọ e jọ kugbei a yo kpahe eware iyoma kpobi nọ Ishmẹl ọmọzae Nẹtanaya o ru,
12 a tẹ rehọ ezae na kpobi, a tẹ nya re a họre Ishmẹl ọmọzae Nẹtanaya, a tẹ ruẹ e riẹ evaọ akotọ ame obuobu* nọ ọ rrọ Gibiọn.
13 Nọ ahwo kpobi nọ a jọ kugbe Ishmẹl a ruẹ Johenan ọmọzae Kariya avọ iletu ogbaẹmo na kpobi nọ e rrọ kugbei, a tẹ ghọghọ.
14 Kẹsena ahwo kpobi nọ Ishmẹl o mu evaọ Mizpa+ na a te kuomarẹriẹ, a te lele Johenan ọmọzae Kariya zihe.
15 Rekọ Ishmẹl ọmọzae Nẹtanaya avọ ezae eree evaọ usu ahwo riẹ a tẹ va Johenan abọ, a tẹ nyabru ahwo Ammọn.
16 Johenan ọmọzae Kariya avọ iletu ogbaẹmo na kpobi nọ e jọ kugbei a tẹ rehọ ahwo Mizpa nọ a kiọkọ na lele oma, enọ a siwi no obọ Ishmẹl ọmọzae Nẹtanaya okenọ o kpe Gẹdelaya+ ọmọzae Ahaekam no. A tẹ rehọ ezae na, isoja na, eyae na, emọ na, gbe iruiruo ighẹ ovie na zihe no obọ Gibiọn ze.
17 Ere a rọ nya, a te wohọ oria Kimham nọ ahwo a rẹ kpahe nọ o kẹle Bẹtlẹhẹm,+ be gwọlọ epanọ a re ro kpobọ Ijipti+
18 fiki ahwo Kaldia na. Keme ozọ rai u je mu ai, fiki Ishmẹl ọmọzae Nẹtanaya nọ o kpe Gẹdelaya ọmọzae Ahaekam na, ọnọ ovie Babilọn o ro mu ọnọ o wuzou ẹkwotọ na.+
