Jerimaya 23:1-40
23 “Uye u te ithuru-igodẹ nọ e be raha jẹ vaha igodẹ mẹ nọ mẹ be rẹrote!” ere Jihova ọ ta.+
2 Fikiere enẹ Jihova Ọghẹnẹ Izrẹl ọ ta kpahe ithuru-igodẹ nọ i bi su ahwo mẹ: “Wha vaha igodẹ mẹ no; wha gbẹ be vaha ae, yọ wha be daezọ rai hi.”+
“Fikiere mẹ te rẹriẹ ovao mẹ ku owhai fiki iruẹru imuomu rai,” ere Jihova ọ ta.
3 “Kẹsena me ve ti koko ikiọkotọ igodẹ mẹ họ no ekwotọ kpobi nọ mẹ vaha e rai kpohọ ze,+ yọ mẹ te rehọ ae zihe ziọ otọ rai nọ a rẹ jọ re ẹbe,+ a ve ti vihọ jẹ jọ buobu.+
4 Mẹ vẹ te rehọ ithuru-igodẹ mu kẹ ae nọ e te ginẹ rẹrote ae.+ Ozọ u gbe ti mu ai hi hayo kọ a ti gbe guegue he, yọ ọvuọvo rai o ti vru hu,” ere Jihova ọ ta.
5 “Rri! Edẹ e be tha,” ere Jihova ọ ta, “nọ me ti ru okakọ* okiẹrẹe dhẹ ze rọkẹ Devidi.+ Yọ ovie jọ o ti su+ nọ ọ te rọ otoriẹ udidi ru eware je bru uvioziẹ je ru oware ukiẹrẹe evaọ ẹkwotọ na.+
6 Evaọ edẹ riẹ a ti siwi Juda,+ yọ Izrẹl ọ te rria avọ omofọwẹ.+ Odẹ nọ a ti sei họ: Jihova họ Ẹrẹreokie Mai.”+
7 “Rekọ, edẹ e be tha,” ere Jihova ọ ta, “nọ a gbẹ te ta ha inọ: ‘Nọ Jihova, ọnọ ọ rehọ ahwo Izrẹl no ẹkwotọ Ijipti ze ọ rrọ uzuazọ na!’+
8 ukpoye, a te ta nọ: ‘Nọ Jihova, ọnọ ọ rehọ ahwo uyẹ uwou Izrẹl lahwe je zihe ae no obọ ẹkwotọ ẹkpẹlobọ ovatha-ọre ze je no ekwotọ kpobi nọ mẹ vaha e rai kpohọ ze ọ rrọ uzuazọ na.’ Yọ a te rria ẹkwotọ obọrai.”+
9 Rọ kpahe eruẹaro na mẹ ta nọ:
Udu mẹ o raha no.
Igbenwa mẹ kpobi i bi nuhu.
Mẹ wọhọ ọzae nọ ọ da idi bẹ no,Jẹ wọhọ ọzae nọ enwaene i mi ẹgba kpobi noFiki Jihova gbe fiki eme riẹ nọ e rrọ ọrẹri.
10 Keme ibruẹnwae e vọ ẹkwotọ na;+Ẹkwotọ na o bi weri+ fiki ehao nọ a bọwo e riẹ na,Yọ ẹbe nọ erao e rẹ re evaọ udhude na o whu no.+
Edhere rai ọ rrọ muomu, yọ a rẹ rehọ ogaga rai ruiruo thọthọ.
11 “Te eruẹaro na te izerẹ na i gbe omarai ku no.*+
Mẹ tubẹ jọ uwou obọmẹ dede ruẹ imuomu rai,”+ ere Jihova ọ ta.
12 “Fikiere edhere rai ọ te whra je muebi;+A ti gele ai, a ve ti kie.
Keme mẹ te rehọ okpẹtu te aiEvaọ ukpe nọ a ti gu epanọ a ru te,” ere Jihova ọ ta.
13 “Mẹ jọ oma eruẹaro Sameria+ ruẹ oware nọ u re tuoma.
Obọ Bale eruẹaruẹ rai i bi no ze,A te bi su ahwo mẹ Izrẹl thọ.
14 Yọ mẹ jọ oma eruẹaro Jerusalẹm ruẹ eware etọtọ.
A bi bruẹnwae+ jẹ be rọ ọrue nya;+A be tuduhọ irumuomu awọ,*A bi kurẹriẹ no imuomu rai hi.
A wọhọ Sọdọm rọkẹ omẹ,+Yọ ahwo nọ a be rria eva riẹ a wọhọ Gomora.”+
15 Fikiere enẹ Jihova olori egbaẹmo ọ ta kpahe eruẹaro na:
“Rri, me bi ru ae re ẹbe ọyayare,Jẹ kẹ ae ame nọ a nua re a da.+
Keme eruẹaro Jerusalẹm họ enọ i ru ẹkwotọ na soso siọ orọwọ na no na.”
16 Enẹ Jihova olori egbaẹmo ọ ta:
“Wha gaviezọ kẹ eme eruẹaro nọ e be ruẹaro kẹ owhai na ha.+
A be viẹ owhai họ.*
Udu obọrai a be ta eruẹaruẹ na no ze,+Orọnikọ unu Jihova i no ze he.+
17 A bi dhe enọ e be kẹ omẹ adhẹẹ hẹ ẹtẹta kẹ nọ,‘Jihova ọ ta nọ: “Wha te reawere udhedhẹ.”’+
Yọ a be ta kẹ ohwo kpobi nọ o bi lele udu ogaga obọriẹ nọ,‘Okpẹtu ọvo o ti te owhai hi.’+
18 Kọ ono o dikihẹ usu ahwo nọ a kẹle JihovaRe ọ ruẹ je yo ẹme riẹ?
Ono ọ gaviezọ ziezi kẹ ẹme riẹ re ọ ruẹsi yoi?
19 Rri! Ofou ọwhibo Jihova o ti du lahwe avọ ofu;Wọhọ ofou-owhre ọgaga, o ti fou kurẹriẹ evaọ ehru uzou irumuomu na.+
20 Ofu Jihova o ti kuomarẹriẹ zihe heBẹsenọ o re ru eware nọ e rrọ udu riẹ gba no.
Evaọ abọ urere edẹ na, wha ti wo otoriẹ onana vevẹ.
21 Me vi eruẹaro na ha, ghele na a dhẹ nya.
Mẹ ta ẹme kẹ ae he, ghele na a ruẹaro.+
22 Rekọ o hae jọ nọ a dikihẹ usu ahwo nọ a kẹle omẹ,A hai ti ru ahwo mẹ yo eme mẹ,Yọ a hai ti ru ai kurẹriẹ no edhere oyoma rai gbe iruẹru imuomu rai.”+
23 “Kọ Ọghẹnẹ ekẹloma ọvo mẹ rrọ,” ere Jihova ọ ta, “kọ mẹ gbẹ rrọ Ọghẹnẹ ugbothabọ re?”
24 “Kọ ohwo jọ ọ sai dhere oria nọ u siomano nọ mẹ sae jọ ruẹ e riẹ hẹ?”+ ere Jihova ọ ta.
“Kọ mẹ gbẹ vọ idhiwu gbe otọakpọ na?”+ ere Jihova ọ ta.
25 “Me yo eme eruẹaro nọ e be rọ odẹ mẹ ruẹaro erue kẹ owhai na no inọ, ‘Mẹ wezẹ ewezẹ jọ! Mẹ wezẹ ewezẹ jọ!’+
26 Ẹvẹ onana o te gbẹ jọ udu eruẹaro na kri te, inọ a rẹ ruẹaro erue? Eruẹaro nọ e be ta eme eviẹhọ no udu obọrai ze a rrọ.+
27 A be gwọlọ rehọ ewezẹ nọ a be ta kẹ ohwohwo ru odẹ mẹ thọrọ ahwo mẹ ẹro, nwane wọhọ epanọ odẹ mẹ o thọrọ esẹ rai ẹro fiki Bale na.+
28 Jọ ọruẹaro nọ ọ wezẹ ewezẹ ọ ta ewezẹ riẹ, rekọ jọ ọnọ o wo ẹme mẹ ọ rọ uzẹme ta ẹme mẹ.”
“Eme ugbe okakọ oyaya avọ ibi okakọ na a wo kugbe?” ere Jihova ọ ta.
29 “Kọ ẹme mẹ ọ gbẹ wọhọ erae,”+ ere Jihova ọ ta, “jẹ wọhọ ehama nọ u re kpe ugbehru-utho ehehẹhẹ?”+
30 “Fikiere rri, mẹ te rọsuọ eruẹaro na,” ere Jihova ọ ta, “enọ i bi tho eme mẹ mi ohwohwo.”+
31 “Rri mẹ te rọsuọ eruẹaro na,” ere Jihova ọ ta, “enọ e be rehọ ẹrọo rai ta nọ, ‘Ọ ta nọ!’”+
32 “Rri mẹ te rọsuọ eruẹaro nọ e be wezẹ ewezẹ erue na,” ere Jihova ọ ta, “enọ e be ta ewezẹ na jẹ be rehọ ai su ahwo mẹ thọ fiki erue rai gbe ehaise rai.”+
“Rekọ me vi rai hayo ta ere kẹ ae he. Fikiere a te wha erere se ahwo nana vievie he,”+ ere Jihova ọ ta.
33 “Okenọ ahwo nana hayo ọruẹaro jọ hayo ozerẹ jọ ọ tẹ nọ owhẹ nọ, ‘Kọ eme họ owha* Jihova?’ whọ rẹ za kẹ ae nọ, ‘“Whai họ owha na! Yọ me ti gbolo owhai kufiẹ,”+ ere Jihova ọ ta.’
34 Rọ kpahe ọruẹaro hayo ozerẹ hayo ahwo nọ a be ta nọ, ‘Onana họ owha* Jihova!’ Mẹ te rẹriẹ ovao mẹ ku ọzae yena avọ ahwo uwou riẹ.
35 Enẹ whai omomọvo ọ be ta kẹ ọrivẹ riẹ gbe omoni riẹ, ‘Didi uyo Jihova ọ kẹ no? Kọ eme Jihova ọ ta no?’
36 Rekọ wha gbẹ ta ẹme fodẹ owha* Jihova ofa ha, keme ẹme nọ whai omomọvo ọ be ta họ owha* na, yọ wha nwene eme Ọghẹnẹ nọ ọ rrọ uzuazọ na, Jihova olori egbaẹmo, Ọghẹnẹ mai no.
37 “Enẹ whọ rẹ ta kẹ ọruẹaro na, ‘Didi uyo Jihova ọ kẹ owhẹ no? Kọ eme Jihova ọ ta kẹ owhẹ no?
38 Yọ otẹrọnọ wha tẹ gbẹ be ta nọ, “Owha* Jihova!” enẹ Jihova ọ ta: “Fikinọ wha gbẹ be ta nọ, ‘Ẹme nana yọ owha* Jihova,’ yọ mẹ ta kẹ owhai no nọ, ‘Wha gbẹ ta ha inọ: “Owha* Jihova!”’
39 rri! mẹ te kpare owhai kpehru, me ve ti gbolo owhai kufiẹ no aro mẹ, te owhai te okpẹwho nọ mẹ rọ kẹ owhai avọ esẹ-esẹ rai na.
40 Me ti ru oma vuọ owhai bẹdẹ bẹdẹ je hrẹ owhai kpotọ bẹdẹ bẹdẹ, onọ o te thọrọ ẹro ho.”’”+
Eme-Obotọ
^ Hayo “ọreuku.”
^ Hayo “yọ enọ e siọ orọwọ na no.”
^ Evaọ Hibru, “A bi ru abọ irumuomu ga.”
^ Hayo “A bi ru owhai wo ẹruore ofofe.”
^ Hayo “ovuẹ ogbẹgbẹdẹ.” Ẹme Hibru na o wo otofa ivẹ: “Owhowhovia ọgaga nọ u no obọ Ọghẹnẹ ze” hayo “oware nọ o rrọ gbẹgbẹdẹ.”
^ Hayo “ovuẹ ogbẹgbẹdẹ.”
^ Hayo “ovuẹ ogbẹgbẹdẹ.”
^ Hayo “ovuẹ ogbẹgbẹdẹ.”
^ Hayo “ovuẹ ogbẹgbẹdẹ.”
^ Hayo “ovuẹ ogbẹgbẹdẹ.”
^ Hayo “ovuẹ ogbẹgbẹdẹ.”
