Jerimaya 3:1-25
3 Ahwo a rẹ nọ nọ: “Otẹrọnọ ọzae o le aye riẹ kpo, aye na ọ jẹ nyasiọ iẹe ba je zihe ruọ aye ọzae ọfa, kọ u fo nọ ọzae na ọ rẹ rehọ aye na zihe ze?”
Kọ a gbe ri gbe ẹkwotọ yena ku no riẹriẹriẹ?+
“Who lele egbẹnyusu buobu bru igberẹ no,+Kọ u fo nọ who re zihe bru omẹ ze enẹna?” ere Jihova ọ ta.
2 “Kpare aro ra rri ikpehru ivevẹ na re whọ ruẹ.
Kọ diẹse a re jọ gba owhẹ du hu?
Whọ keria akotọ idhere na jẹ hẹrẹ ae,Wọhọ ohwo nọ ọ rẹ kwa no oria ruọ oria* evaọ udhude.
Whọ ruabọhọ be rọ igberẹ-ibro gbe imuomu ra+Ro gbe ẹkwotọ na ku.
3 Fikiere oso o gbe bi yoyo ho,+Yọ oso ọ be rrọ evaọ okiewhru hu.
Who bi ke aro ababọ omovuọ wọhọ* aye uwou-orọo nọ o bi bru igberẹ;Oma o be vuọ owhẹ hẹ.+
4 Rekọ enẹna, who bi bo se omẹ nọ,‘Ọsẹ mẹ, whẹ họ ogbẹnyusu oke uzoge mẹ!+
5 Kọ ohwo o re mu ofu bẹdẹ bẹdẹ,Hayo fi ẹgo họ eva ẹsikpobi?’
Enẹ whọ be ta,Rekọ whọ be ruabọhọ ru eware iyoma kpobi nọ whọ rẹ sai ru.”+
6 Evaọ edẹ Josaya ovie na,+ Jihova ọ ta kẹ omẹ nọ: “‘Kọ whọ ruẹ oware nọ Izrẹl nọ o bi gbe-ọfariẹ na o ru? O kpobọ ehru ugbehru ukpekpehru kpobi gbe otọ ure ulogbo kpobi nyai bru igberẹ.+
7 Nọ ọ maki ru eware nana kpobi no dede, mẹ gbẹ jẹ ta kẹe nọ o zihe bru omẹ ze,+ rekọ o zihe ze he; yọ Juda o bi rri oniọvo-ọmọtẹ ẹghẹ riẹ ọvo.+
8 Nọ mẹ ruẹ oyena, me te le Izrẹl kpo avọ obe-udu orọo-ofa+ nọ mẹ kẹ riẹ fiki ẹnwae-obro riẹ.+ Rekọ ozọ u mu Juda ha, oniọvo-ọmọtẹ ẹghẹ riẹ; ọyomariẹ ọ tẹ nyavrẹ nyai bru igberẹ re.+
9 O rri igberẹ-ibro riẹ evevere, yọ ọ ruabọhọ je gbe ẹkwotọ na ku je bi lele itho gbe ire bruẹnwae.+
10 Ghele onana kpobi, Juda oniọvo-ọmọtẹ ẹghẹ riẹ ọ rehọ udu riẹ kpobi zihe bru omẹ ze he, rekọ ẹghẹ gheghe o ru,’ ere Jihova ọ ta.”
11 Jihova ọ tẹ ta kẹ omẹ nọ: “Izrẹl nọ o bi gbe-ọfariẹ na o dhesẹ via no inọ ọyomariẹ o kiẹrẹe vi Juda nọ o bi ru ẹghẹ na.+
12 Nya re who whowho eme nana evaọ ofẹ ẹkpẹlobọ ovatha-ọre:+
“‘“Zihe ze, O Izrẹl nọ ọ nyasiọ Ọghẹnẹ ba no,” ere Jihova ọ ta.’+ ‘“Me ti rri owhẹ no obọ ehru ze avọ evedha ha,*+ keme mẹ rẹ talamu oware nọ o gba ẹsikpobi,” ere Jihova ọ ta.’ ‘“Me ti mu ofu bẹdẹ bẹdẹ hẹ.
13 Thakpe rọwo nọ whọ reabe, keme whọ wọso Jihova Ọghẹnẹ ra no. Whọ ruabọhọ je lele erara* gbe-ọfariẹ* evaọ otọ ure ulogbo kpobi, rekọ wha je yoẹme kẹ urru mẹ hẹ,” ere Jihova ọ ta.’”
14 “Wha zihe ze, whai emezae nọ e nyasiọ Ọghẹnẹ ba,” ere Jihova ọ ta. “Keme me zihe ruọ olori uzẹme* rai no; yọ mẹ te rehọ owhai, mẹ te rehọ omọvo no okpẹwho ze jẹ rehọ imava no unuwou ze, mẹ vẹ te rehọ owhai ziọ Zayọn.+
15 Mẹ vẹ te kẹ owhai ithuru-igodẹ nọ i ti ru oware nọ o rrọ udu mẹ,+ yọ a te rehọ eriariẹ gbe otoriẹ udidi kuọ owhai.
16 Wha te jọ buobu jẹ mọ ibi evaọ ẹkwotọ na evaọ edẹ yena,” ere Jihova ọ ta.+ “A gbẹ te ta vievie he inọ, ‘Etehe ọvọ Jihova!’ O gbẹ te ziọ udu na ha, hayo kọ a te kareghẹhọ iẹe he hayo kọ o te dae he, yọ a gbe ti ku ọfa ha.
17 Evaọ oke yena, a ti se Jerusalẹm agbara-uvie Jihova;+ yọ a ti koko erẹwho na kpobi họ re a jiri odẹ Jihova evaọ Jerusalẹm,+ yọ a gbẹ te rọ uzou ogaga lele udu umuomu obọrai ofa ha.”
18 “Evaọ edẹ yena, uwou Juda avọ uwou Izrẹl a te nya usu ovo,+ yọ a ti kuomagbe nya no obọ ẹkwotọ ẹkpẹlobọ ovatha-ọre ziọ ẹkwotọ nọ mẹ rọ kẹ esẹ-esẹ rai re a rọ reuku na.+
19 Me je roro nọ, ‘Rri epanọ me fi owhẹ họ udevie emezae mẹ jẹ kẹ owhẹ otọ owowoma na, ukuoriọ nọ o mai wo erru evaọ udevie erẹwho na!’*+ Me te je roro re nọ wha ti se omẹ, ‘Ọsẹ mẹ!’ jegbe nọ wha ti kuomarẹriẹ siọ omẹ ba elele he.
20 ‘Evaọ uzẹme, wọhọ epanọ aye ọ rẹ rọ ẹghẹ dhẹ siọ ọzae* riẹ ba na, ere ọvona wha rọ ẹghẹ dhẹ siọ omẹ ba no re,+ O uwou Izrẹl,’ ere Jihova ọ ta.”
21 A be jọ ehru ikpehru ivevẹ na yo edo jọ,Edo oviẹ gbe edo ayare ahwo Izrẹl,Keme a ru idhere rai gẹgẹle no;Jihova Ọghẹnẹ rai ọ thọrọ e rai ẹro no.+
22 “Wha zihe ze, whai emezae nọ e nyasiọ Ọghẹnẹ ba na.
Me ti siwi udu rai nọ wha rọ nyasiọ Ọghẹnẹ ba no na.”+
“Mai na! Ma nyabru owhẹ ze no,Keme whẹ họ Ọghẹnẹ mai, O Jihova.+
23 Evaọ uzẹme, ikpehru na gbe edo nọ ọ jọ ehru igbehru na yọ eviẹhọ gheghe.+
Uzẹme riẹ họ, obọ Jihova Ọghẹnẹ mai esiwo Izrẹl ọ rrọ.+
24 Rekọ no anwọ oke uzoge mai ze oware omovuọ* na o rọ re eware kpobi nọ esẹ-esẹ mai e ruẹ uye fihọ no,+Ithuru erao rai gbe ewa erao rai,Emezae rai gbe emetẹ rai.
25 Joma kiẹzẹ otọ fiki omovuọ mai,Re omovuọ ogaga mai u ruru omai,Keme ma raha uzi Jihova Ọghẹnẹ mai no,+Te omai te esẹ mai, no anwọ oke uzoge mai ze rite inẹnẹ na,+Yọ ma bi yoẹme kẹ urru Jihova Ọghẹnẹ mai hi.”
Eme-Obotọ
^ Evaọ Hibru, “ohwo Arebia.”
^ Evaọ Hibru, “Aruezo ra ọ wọhọ ọrọ.”
^ Evaọ Hibru, “Me ti ru ovao mẹ kie fihọ owhẹ hẹ.”
^ Hayo “eghẹnẹ erẹwho efa.”
^ Evaọ Hibru, “Whọ ruabọhọ jẹ vravra idhere ra kẹ erara.”
^ Hayo o sae jọ nọ, “ọzae.”
^ Evaọ Hibru, “ukuoriọ egbaẹmo erẹwho na nọ o mai woma.”
^ Evaọ Hibru, “ogbẹnyusu.”
^ Hayo “ẹmẹdhọ omovuọ.”
