Jerimaya 19:1-15
19 Enẹ Jihova ọ ta: “Nya re whọ jọ obọ ọmebẹ dẹ omothẹ nọ a rọ ọviẹ ma.+ Whọ vẹ rehọ ekpako ahwo na jọ gbe ekpako izerẹ na jọ,
2 re wha nya kpobọ Ukiekpotọ Ọmọzae Hinọm,+ evaọ obọ aro Unuẹthẹ Igbulẹvẹ na. Whọ vẹ jọ etẹe whowho eme nọ mẹ te ta kẹ owhẹ.
3 Whọ rẹ ta nọ, ‘Wha yo ẹme nọ Jihova ọ ta, whai ivie Juda gbe ahwo nọ a be rria Jerusalẹm. Enẹ Jihova olori egbaẹmo, Ọghẹnẹ Izrẹl ọ ta:
“‘“Mẹ be te rehọ okpẹtu ziọ oria nana, yọ o te gheghe ohwo kpobi nọ o yo kpahe iẹe ezọ.
4 Me ti ru onana fikinọ a nyasiọ omẹ ba+ je ru oria nana fihọ epanọ a gbẹ sai ro vuhu iei hi.+ A be jariẹ dhe idhe kẹ eghẹnẹ efa, enọ ae omarai avọ esẹ-esẹ rai gbe ivie Juda a riẹ vẹre he, yọ a kpe azẹ enọ e riẹ onahona ha vọ oria nana no.+
5 A bọ eria ikpehru Bale re a ruẹse mahe emezae rai evaọ erae ro dhe idhe emahọ kẹ Bale,+ oware nọ me jie uzi riẹ hẹ hayo ta kpahe he, nọ o re tubẹ ziọ udu mẹ vievie he.”’*+
6 “‘“Fikiere rri! edẹ e be tha,” ere Jihova ọ ta, “nọ a gbe ti se oria nana Tofẹt hayo Ukiekpotọ Ọmọzae Hinọm ho, rekọ Ukiekpotọ Ikpakpe.+
7 Mẹ te raha omaa sa-sa nọ Juda avọ Jerusalẹm a ma evaọ oria nana, me ti ru re ọgbọdọ o kpe ai evaọ aro ewegrẹ rai, re a je whu evaọ obọ enọ e be gwọlọ uzuazọ* rai kpe. Mẹ vẹ te rehọ iri rai kẹ evra obọ ehru* na gbe erao otọakpọ na re e jọ emu kẹ ae.+
8 Me ti ru okpẹwho nana jọ oware idudu gbe oware nọ a rẹ rọ fiki riẹ fiunu. Ohwo kpobi nọ ọ be nya akotọ riẹ vrẹ o ti rri rie avọ idudu, ọ vẹ te fiunu fiki iye riẹ kpobi.+
9 Yọ me ti ru re a re uwo-oma emezae gbe emetẹ rai, yọ omomọvo rai ọ te re uwo-oma ọrivẹ riẹ fiki ekohọ nọ a ko rai họ gbe oja nọ a be re evaọ okenọ ewegrẹ rai gbe enọ e be gwọlọ uzuazọ* rai kpe a wariẹ ae họ.”’+
10 “Kẹsena who ve kpe omothẹ na evaọ iraro ezae nọ i lele owhẹ nya na,
11 whọ vẹ ta kẹ ae nọ, ‘Enẹ Jihova olori egbaẹmo ọ ta: “Oghẹrẹ ovo nana me ti ro kpe ahwo nana gbe okpẹwho nana, wọhọ ohwo nọ o kpe othẹ ọmebẹ, onọ a rẹ gbẹ sae ruẹrẹ vievie he; yọ a ti ki ahwo nọ a whu fihọ Tofẹt bẹsenọ oria ovo o te gbẹ jariẹ nọ a re ki ai fihọ họ.”’+
12 “‘Ere me ti ru oria nana gbe ahwo nọ a be rriae, re me ru okpẹwho nana wọhọ Tofẹt,’ ere Jihova ọ ta.
13 ‘Yọ iwou nọ e rrọ Jerusalẹm gbe iwou ivie Juda i ti zihe ruọ oware nọ o fo ho wọhọ oria nana, Tofẹt,+ ẹhẹ, iwou kpobi nọ a jọ ehru rai dhe idhe rọkẹ ogbaẹmo obọ idhiwu na kpobi+ gbe eria nọ a jọ ku idhe udi kẹ eghẹnẹ efa.’”+
14 Nọ Jerimaya o zihe no obọ Tofẹt nọ Jihova o vi rie nyae jọ ruẹaro ze no, o te dikihẹ eva ighẹ nọ o rrọ uwou Jihova, ọ tẹ ta kẹ ahwo na kpobi nọ:
15 “Enẹ Jihova olori egbaẹmo, Ọghẹnẹ Izrẹl ọ ta, ‘Rri, mẹ be rehọ okpẹtu nọ mẹ ta kpahe kpobi na ze ro te okpẹwho nana avọ ewho riẹ kpobi, keme a se thahe thahe nọ a re* ru lele eme mẹ hẹ.’”+
