Jerimaya 50:1-46
50 Ẹme nọ Jihova ọ rọ ẹkwoma Jerimaya ọruẹaro na ta kpahe Babilọn,+ kpahe ẹkwotọ ahwo Kaldia, inọ:
2 “Whowho iei evaọ udevie erẹwho na je woro iei.
Kpare oware oka* kpehru re who woro iei.
Whọ ko oware ovo dhere he!
Ta nọ, ‘A fi Babilọn kparobọ no.+
A ru oma vuọ Bẹl no.+
Idudu e ruọ Mẹrodak oma no.
A ru oma vuọ emema riẹ no.
Idudu e ruọ emedhọ etọtọ* riẹ oma no.’
3 Keme orẹwho jọ o wọ ẹmo no obọ ẹkpẹlobọ ovatha-ọre bru ei ze no.+
O ru ẹkwotọ riẹ zihe ruọ oware idudu;Ohwo ọvo ọ gbẹ be rriae eva ha.
Te ohwo te arao a dhẹ no;A dhẹ vrẹ no.”
4 “Evaọ edẹ yena gbe evaọ oke yena,” ere Jihova ọ ta, “ahwo Izrẹl avọ ahwo Juda a ti kokohọ.+ A te viẹ nọ a be nya na,+ yọ a ti kuomagbe gwọlọ Jihova Ọghẹnẹ rai.+
5 A te nọ kpahe edhere Zayọn, yọ a rẹriẹ ovao rai ku ofẹ yena,+ be ta nọ, ‘Wha nyaze re ma ku omamai kugbe Jihova re ọvọ ebẹdẹ bẹdẹ nọ ọ te thọrọ ẹro ho.’+
6 Ahwo mẹ a zihe ruọ uthuru igodẹ nọ u vru no.+ Ithuru-igodẹ obọrai i ru rai nọ a ro ghoro vrẹ.+ A su rai vrẹ kpobọ ehru igbehru, a te bi ghoro no ugbehru ruọ ukpehru. Oria eriosehọ rai o thọrọ e rai ẹro no.
7 Ahwo kpobi nọ a be ruẹ e rai a be re ai no,+ yọ ewegrẹ rai e ta nọ, ‘Ma reabe he, keme a raha uzi Jihova, Ọnọ ẹrẹreokie ọ be rria eva riẹ, ọ tẹ jẹ rrọ ẹruore esẹ-esẹ rai, Jihova.’”
8 “Wha dhẹ no eva Babilọn,Wha no ẹkwotọ ahwo Kaldia na no,+Re wha jọ wọhọ erao nọ e karo kẹ uthuru na.
9 Keme rri, me bi koko ogbotu erẹwho ilogbo họ no obọ ẹkwotọ ẹkpẹlobọ ovatha-ọre ze+Rọsuọ Babilọn.
A ti dhe uhie ẹmo họ ze te họre iẹe;A ti fi ei kparobọ evaọ etẹe.
Ese rai e wọhọ erọ ọgbaẹmo,Enọ i bi kpe emọ siọ esẹgbini ba;+I re zihe ze ababọ iyẹrẹ hẹ.
10 Kaldia o ti zihe ruọ egbo-ẹmo.+
Ahwo kpobi nọ a be jọ eva riẹ kwa egbo-ẹmo a te kwa te ẹgwọlọ rai,”+ ere Jihova ọ ta.
11 “Keme wha jẹ wereva ọvo,+ wha jẹ ghọghọ ọvoEvaọ okenọ wha jẹ kwa eware ahwo nọ a rrọ ukuoriọ mẹ.+
Keme wha jẹ ghoriẹ ọvo wọhọ eruẹ nọ o ri yẹ ọmọ họ nọ ọ rrọ udevie ẹbe,Yọ who je ru edo ọvo wọhọ enyenya ezae.
12 A ru oma vuọ oni ra no.+
U kiekpe aye nọ o yẹ owhẹ no.
Rri! Ọye ọ mae kawo evaọ udevie erẹwho na,Igbrẹwọ nọ ame ọ rrọ họ gbe udhude.+
13 Fiki evedha Jihova, a te gbẹ rriae eva ha;+O ti zihe ruọ ofofe riẹriẹriẹ.+
Ohwo kpobi nọ ọ be nya akotọ Babilọn vrẹ, o ti rri rie avọ iduduJẹ te fiunu fiki iye riẹ kpobi.+
14 Wha dhe uhie ẹmo họ evaọ ofẹ kpobi re wha họre Babilọn,Whai ahwo kpobi nọ a rẹ vẹ* uze.
Wha sa Babilọn, wha siọ ose ọvo ba ha,+Keme uzi Jihova ọ raha na.+
15 Wha jọ ofẹ kpobi bo ubo ẹmo rọsuọ ẹe.
O fi oma hotọ no.*
Ipila riẹ i kie no, a kporo igbẹhẹ riẹ fihọ otọ no,+Keme Jihova họ ọnọ o bi ru ei kele na.+
Wha ru ei kele.
Wha ru ei nwane wọhọ epanọ o ru.+
16 Wha si ọkibi na no Babilọn no,Gbe ọnọ ọ rẹ rehọ ojale kọrọ ibi evaọ oke ivuẹvu na.+
Fiki ọgbọdọ ọgeva na, omomọvo o ti zihe bru ahwo obọriẹ,Omomọvo ọ te dhẹ kpobọ ẹkwotọ obọriẹ.+
17 “Ahwo Izrẹl yọ igodẹ nọ e vahabọ.+ Ikpohrokpo i ru rai vahabọ no.+ Orọ ọsosuọ, ovie Asiria ọ re rai;+ kẹsena Nebukadneza* ovie Babilọn ọ tẹ va igbenwa rai no.+
18 Fikiere enẹ Jihova olori egbaẹmo, Ọghẹnẹ Izrẹl ọ ta: ‘Rri, me ti dhesẹ akpọ kẹ ovie Babilọn avọ ẹkwotọ riẹ oghẹrẹ ovona nọ me dhesẹ akpọ kẹ ovie Asiria na.+
19 Mẹ te rehọ Izrẹl zihe ziọ otọ riẹ nọ ọ rẹ jọ re ẹbe,+ ọ vẹ te re ẹbe evaọ Kamẹl gbe evaọ Beshan,+ yọ ọ* te re eva vọ evaọ igbehru Ifremu+ gbe erọ Giliad.’”+
20 “Evaọ edẹ yena gbe evaọ oke yena,” ere Jihova ọ ta,“A te kiẹ gwọlọ abe nọ Izrẹl ọ re,Rekọ a te ruẹ ọvuọvo ho,Yọ a te ruẹ izieraha Juda ha,Keme mẹ te rọvrẹ enọ mẹ kuvẹ nọ i kiọkọ.”+
21 “Wọ ohọre kpobọ ẹkwotọ Mẹrateyẹm jẹ wọ ohọre bru ahwo nọ a be rria Pikọd.+
Jọ a kpe aikpobi no jẹ raha ai muotọ,” ere Jihova ọ ta.
“Ru oware kpobi nọ me jie uzi riẹ kẹ owhẹ.
22 Edo ẹmo ọ rrọ ẹkwotọ na,Okpẹtu ologbo.
23 Rri epanọ a bru je wiri ehama nọ o rẹ whọlọ erẹwho otọakpọ na soso no!+
Rri epanọ Babilọn o zihe ruọ oware idudu no evaọ udevie erẹwho na!+
24 Mẹ kpahe agbefẹ kẹ owhẹ, o te mu owhẹ, O Babilọn,Yọ whọ riẹ hẹ.
A ruẹ owhẹ, a te mu owhẹ,+Keme Jihova họ ọnọ whọ wọso na.
25 Jihova o rovie uwou riẹ nọ ọ rẹ jọ sẹro* eware no,Ọ tẹ kwa ekwakwa ẹmo evedha riẹ lahwe.+
Keme Olori nọ Ọ Mai Kpehru na, Jihova olori egbaẹmo o wo iruo jọ nọ ọ gwọlọ ruEvaọ ẹkwotọ ahwo Kaldia.
26 Wha wọ ohọre bru ei no eria ithethabọ ze.+
Wha rovie uwou ibi ekakọ riẹ fihọ.+
Wha whẹe kokohọ wọhọ ibi ekakọ nọ a whẹ fihọ ekueko.
Wha raha iẹe no riẹriẹriẹ.+
Jọ ohwo ọvo o kiọkọ kẹe he.
27 Wha kpe iruẹ egaga riẹ kpobi no;+Jọ a nya kpohọ oria nọ a re jo kpe erao na.
Uye u te ae, keme ẹdẹ rai o te no,Oke nọ a ti ro gu ẹkẹ unu rai!
28 A bi yo edo enọ e be dhẹ,Enọ e be dhẹ vabọ no ẹkwotọ Babilọn,Re a jọ Zayọn whowho orukele Jihova Ọghẹnẹ mai,Orukele fiki etẹmpol riẹ.+
29 Wha se enọ e rẹ sa ose kokohọ rọsuọ Babilọn,Ahwo kpobi nọ a rẹ vẹ* uze.+
Wha fa ivuẹ wariẹe họ; wha kẹ ohwo ọvo uvẹ vabọ họ.
Wha hwosa zihe kẹe wọhọ epaọ iruẹru riẹ.+
Wha ru ei nwane wọhọ epanọ o ru.+
Keme ọ rọ omoya wọso Jihova,Ọ wọso Ọrẹri Izrẹl.+
30 Fikiere izoge emezae riẹ i ti kie evaọ iko-ore riẹ,+Yọ isoja riẹ kpobi i ti whu* evaọ ẹdẹ yena,” ere Jihova ọ ta.
31 “Rri! Mẹ te rọsuọ owhẹ,+ O whẹ ohwo aghẹmeeyo na,”+ ere Olori nọ Ọ Mai Kpehru na, Jihova olori egbaẹmo ọ ta,“Keme ẹdẹ ra ọ te seba ẹtha ha, oke nọ mẹ te rọ rehọ owhẹ guẹdhọ.
32 O whẹ ohwo aghẹmeeyo na, who ti zoruẹ je kie,Yọ ohwo ọvo ọ te kpare owhẹ kpehru hu.+
Me ti tu erae họ ikpewho ra,E vẹ te mahe oware kpobi nọ o wariẹ owhẹ họ muotọ.”
33 Enẹ Jihova olori egbaẹmo ọ ta:
“A bi kienyẹ ahwo Izrẹl avọ ahwo Juda,Yọ ahwo kpobi nọ a mu rai a zaza abọ mu ai.+
A rọwo nọ a re siobọno ai kpo ho.+
34 Rekọ Ọnọ ọ dẹ rai zihe ze ọ rrọ gaga.+
Jihova olori egbaẹmo họ odẹ riẹ.+
Ọ te siọ ẹdhọ rai ba egu hu,+Re ọ ruẹsi ru ẹkwotọ na wo eriosehọ+Ọ vẹ wha ozighi fihọ enọ e be rria Babilọn oma.”+
35 “Ọgbọdọ jọ ọ rọsuọ ahwo Kaldia,” ere Jihova ọ ta,“Ọ rọsuọ ahwo nọ a be rria Babilọn gbe ikpahwo-esuo riẹ jegbe iwareghẹ riẹ.+
36 Ọgbọdọ jọ ọ rọsuọ ahwo nọ a rẹ ta eme ifofe* na, yọ a ti ru gheghẹ.
Ọgbọdọ jọ ọ rọsuọ egbaẹmo riẹ, yọ ozọ u ti mu ai gaga.+
37 Ọgbọdọ jọ ọ rọsuọ enyenya rai gbe ekẹkẹ ẹmo rai,Ọ tẹ jẹ rọsuọ ahwo erẹwho sa-sa nọ a rrọ eva riẹ,Yọ a te jọ wọhọ eyae.+
Ọgbọdọ jọ ọ rọsuọ ekwakwa-aghae riẹ, yọ a te kwa ae rehọ.+
38 A te raha ame obuobu riẹ no, yọ a ti ru ei kpọ yamu.+
Keme Babilọn yọ ẹkwotọ nọ emema nọ a kare e vọ,+Yọ fikinọ a be ruẹ eruẹaruẹ imuozọ, a te bi ru wọhọ eruẹ.
39 Fikiere, emama udhude na e te rria kugbe erao nọ i re bo,Yọ eva riẹ igomugoro e te rria.+
Ahwo a te gbẹ rriae vievie he,Yọ ọ te jọ oria nọ a rẹ rria ha evaọ ige kpobi.”+
40 “Nwane wọhọ epanọ o jọ evaọ okenọ Ọghẹnẹ ọ raha Sọdọm avọ Gomora+ gbe ewho nọ e wariẹ e rai họ na,+ ere o te jọ re,” ere Jihova ọ ta, “ohwo ọvo ọ te jọ etẹe he, yọ ohwo ọvo ọ te rria etẹe he.+
41 Rri! Ahwo jọ a bi no obọ ẹkpẹlobọ ovatha-ọre ze;A te rehọ orẹwho ulogbo jọ gbe ivie ilogbo+No obọ eria nọ e mai thabọ evaọ otọakpọ na ze.+
42 A kru uze avọ ehi.+
A rrọ eva gaga, yọ a te re ohrọ họ.+
Edo rai ọ wọhọ edo abade nọ ọ be vohẹ,+Nọ a be dhẹ enyenya rai na.
A dhe uhie ẹmo họ wọhọ omọvo rọsuọ owhẹ, O ọmọtẹ Babilọn.+
43 Ovie Babilọn o yo usi na kpahe ai no,+O fi abọ riẹ họ otọ.+
Awa o kpe rie no,Edada nọ e wọhọ erọ aye nọ o bi yẹ e riẹe oma.
44 “Rri! Ohwo jọ ọ te wọ ohọre ziọ etọ nọ erao e rẹ jọ re ẹbe nọ oma o fọ na wọhọ okpohrokpo nọ o no etuetue nọ ọ rrọ akotọ Ethẹ Jọdan ze, rekọ o te raha oke he, me ti ru ai dhẹ se iẹe ba. Mẹ vẹ te rehọ ọnọ a salọ na mu re o wuzou riẹ.+ Keme, ono ọ wọhọ omẹ, yọ ono ọ te nọ omẹ unu? Othuru-igodẹ vẹ ọ rẹ sae dadamu kẹ omẹ?+
45 Fikiere, whai ahwo, wha yo oware nọ Jihova ọ jiroro riẹ nọ o ti ru Babilọn+ gbe oware nọ o roro no inọ o ti ru ẹkwotọ ahwo Kaldia.
Ababọ avro, a ti si imigodẹ nọ e rrọ uthuru na vrẹ ototọ.
O ti ru oria nọ a be rria fihọ ofofe fiki rai.+
46 Otọakpọ na u ti nuhu fiki edo Babilọn nọ a fi kparobọ,A te jọ udevie erẹwho na yo edo ubo jọ.”+
Eme-Obotọ
^ Hayo “ọkpọ oka.”
^ Ẹme Hibru nọ a fa “emedhọ etọtọ” na avọ ẹme nọ a fa “isọ arao” e rẹ sai wo otofa ovona, yọ a rẹ rehọ iẹe ta kpahe oware nọ u fioka ha.
^ Evaọ Hibru, “i re thihi.”
^ Evaọ Hibru, “Ọ rehọ obọ riẹ kẹ no.”
^ Evaọ Hibru, “Nebukadreza,” oghẹrẹ ofa nọ a kere i rie.
^ Hayo “rawo.”
^ Evaọ Hibru, “a re thihi.”
^ Evaọ Hibru, “Yọ a ti ru isoja riẹ kpobi fibo.”
^ Hayo “eruẹaro erue.”
