Jerimaya 29:1-32
29 Enana họ eme ileta nọ Jerimaya ọruẹaro na o vi no Jerusalẹm ro se ekpako nọ i kiọkọ evaọ usu ahwo nọ a mu kpohọ igbo na, izerẹ na, eruẹaro na, gbe ahwo na kpobi, enọ Nebukadneza o mu no Jerusalẹm kpohọ igbo evaọ Babilọn,
2 evaọ okenọ Jẹkonaya ovie na,+ oni ovie na,+ iruiruo ighẹ ovie na, ikpahwo-esuo Juda avọ Jerusalẹm, gbe ewena avọ idhogu* na a no Jerusalẹm no.+
3 Ẹlesa ọmọzae Shefan+ gbe Gemaraya ọmọzae Hilkaya ọ rọ ileta na kẹ nya, enọ Zẹdikaya ovie+ Juda o vi kpobọ Babilọn bru Nebukadneza ovie Babilọn. Enẹ a kere fihọ ileta na:
4 “Enẹ Jihova olori egbaẹmo, Ọghẹnẹ Izrẹl ọ ta kẹ ahwo kpobi nọ a mu kpohọ igbo na, enọ me ru re a no Jerusalẹm kpohọ igbo evaọ Babilọn,
5 ‘Wha bọ iwou re wha rria ae. Wha kọ egbọ re wha re ibi nọ i no rai ze.
6 Wha wo eyae re wha yẹ emezae gbe emetẹ; wha wo eyae kẹ emezae rai, re wha jẹ rehọ emetẹ rai kpohọ orọo, re ae omarai a yẹ emezae gbe emetẹ re. Wha vihọ evaọ obei, wha kawo ho.
7 Wha ru re udhedhẹ o jọ okpẹwho nọ wha jẹ rrọ igbo nọ mẹ rehọ owhai nya na, wha lẹ se Jihova fiki riẹ, keme udhedhẹ o tẹ riẹ, ẹsiẹe wha ti ro wo udhedhẹ re.+
8 Keme enẹ Jihova olori egbaẹmo, Ọghẹnẹ Izrẹl ọ ta: “Wha kuvẹ re eruẹaro rai gbe enọ e rẹ kiotọ kẹ owhai e viẹ owhai họ họ,+ yọ wha gaviezọ kẹ ewezẹ nọ a be wezẹ hẹ.
9 Keme ‘a be rehọ odẹ mẹ ruẹaro erue kẹ owhai. Me vi rai hi,’+ ere Jihova ọ ta.”’”
10 “Keme enẹ Jihova ọ ta, ‘Nọ wha tẹ rria Babilọn ikpe udhosa-gbikpe gba no, mẹ te rẹriẹ ovao mẹ ku owhai,+ mẹ vẹ te rehọ owhai zihe ziọ oria nana, jẹ rọ ere ru eyaa mẹ gba.’+
11 “‘Keme mẹ riẹ iroro nọ me bi roro kpahe owhai,’ ere Jihova ọ ta, ‘iroro udhedhẹ, orọnikọ okpẹtu hu,+ re me ru eware woma kẹ owhai evaọ obaro, wha ve je wo ẹruore.+
12 Yọ wha ti se omẹ jẹ nyaze te lẹ se omẹ, mẹ vẹ te gaviezọ kẹ owhai.’+
13 “‘Wha te gwọlọ omẹ jẹ ruẹ omẹ,+ keme wha te rọ udu rai kpobi kiẹ gwọlọ omẹ.+
14 Me ti ru re wha ruẹ omẹ,’+ ere Jihova ọ ta. ‘Me ti koko ahwo rai nọ a rrọ igbo họ je koko owhai họ no erẹwho gbe eria kpobi nọ mẹ vaha owhai kpohọ ze,’+ ere Jihova ọ ta. ‘Mẹ vẹ te rehọ owhai zihe kpohọ oria nọ mẹ rehọ owhai no kpohọ igbo na.’+
15 “Rekọ wha ta nọ, ‘Jihova ọ rehọ eruẹaro mu kẹ omai no evaọ Babilọn.’
16 “Rekọ enẹ Jihova ọ ta kẹ ovie nọ ọ keria agbara-uvie Devidi na+ gbe ahwo kpobi nọ a be rria okpẹwho nana, imoni rai nọ i lele owhai kpohọ igbo ho,
17 ‘Enẹ Jihova olori egbaẹmo ọ ta: “Rri, me bi vi ọgbọdọ, ohọo nọ u ti mu, gbe okpẹyao nọ o re vo* bru ae,+ me ve ti ru ae re a jọ wọhọ ibi-ure ifigi nọ i gbo no,* nọ i yoma te epanọ a gbẹ sae rọ re ae he.”’+
18 “‘Mẹ te rehọ ọgbọdọ,+ ohọo nọ u ti mu, gbe okpẹyao nọ o re vo ro le ai, yọ me ti ru ae jọ oware idudu kẹ ekwotọ-ivie kpobi nọ e rrọ otọakpọ na,+ gbe oware nọ a rẹ rọ bọwo ehao, oware nọ u re gbe ahwo unu, oware nọ a rẹ rọ fiki riẹ fiunu,+ gbe oware ekela evaọ udevie erẹwho kpobi nọ mẹ vaha e rai kpohọ,+
19 keme a gaviezọ kẹ eme nọ mẹ rehọ idibo mẹ eruẹaro na ta kẹ ae he,’ ere Jihova ọ ta, ‘me je dhe ae evievi.’*+
“‘Rekọ wha gaviezọ họ,’+ ere Jihova ọ ta.
20 “Fikiere wha yo ẹme nọ Jihova ọ ta, whai ahwo kpobi nọ a mu kpohọ igbo na, enọ me le no Jerusalẹm kpohọ Babilọn.
21 Enẹ Jihova olori egbaẹmo, Ọghẹnẹ Izrẹl ọ ta kpahe Ehab ọmọzae Kolaya gbe Zẹdikaya ọmọzae Measaya, enọ e be rehọ odẹ mẹ ruẹaro erue kẹ owhai na,+ ‘Rri, mẹ be rehọ ae họ obọ Nebukadneza* ovie Babilọn, yọ o ti duwu ai kpe fihọ otọ evaọ iraro rai.
22 Yọ oware nọ o te via kẹ ae, o te jọ oware nọ ahwo Juda nọ a rrọ igbo Babilọn na kpobi a te hae rọ bọwo ehao, inọ: “Jọ Jihova o ru owhẹ wọhọ Zẹdikaya jẹ wọhọ Ehab, enọ ovie Babilọn ọ rehọ erae mahe!”
23 keme a ru oware omovuọ evaọ Izrẹl,+ bi lele eyae erivẹ rai bruẹnwae jẹ be rehọ odẹ mẹ ta eme erue nọ me jie uzi rai kẹ ae he.+
“‘“Mẹ họ Ọnọ ọ riẹ kpahe iẹe, mẹ tẹ jẹ rrọ osẹri riẹ,”+ ere Jihova ọ ta.’”
24 “Yọ whọ rẹ ta kẹ Shimaya+ ohwo Nẹhelam na nọ,
25 ‘Enẹ Jihova olori egbaẹmo, Ọghẹnẹ Izrẹl ọ ta: “Fikinọ whọ rehọ odẹ ra vi ileta sa-sa se ahwo kpobi nọ a rrọ Jerusalẹm, je ro se Zẹfanaya+ ọmọzae Measaya, ozerẹ na, gbe izerẹ na kpobi na, inọ,
26 ‘Jihova ọ rehọ owhẹ mu ozerẹ no evaọ ẹta Jehoyada ozerẹ na, re whọ jọ ọsẹro uwou Jihova, re who mu ọruẹ kpobi nọ o bi ru wọhọ ọruẹaro, who ve fi ei họ ewẹ-ekpala ekarọ* jẹ whẹ eba* họ iẹe;+
27 kọ fikieme wha gbẹ re whọku Jerimaya ohwo Anatọt na ha,+ ọnọ o bi ru wọhọ ọruẹaro kẹ owhai na?+
28 Keme o vi uwou se omai evaọ obọ Babilọn dede, inọ: “Oke na o te jọ krẹkri! Wha bọ iwou re wha rria ae. Wha kọ egbọ re wha re ibi nọ i no rai ze,+—”’”’”
29 Nọ Zẹfanaya+ ozerẹ na o se ileta nana kẹ Jerimaya ọruẹaro na,
30 ẹme Jihova o te bru Jerimaya ze, inọ:
31 “Vi uwou se ahwo nọ a rrọ igbo na kpobi, inọ, ‘Enẹ Jihova ọ ta kpahe Shimaya ohwo Nẹhelam na: “Fikinọ Shimaya ọ ruẹaro kẹ owhai, dede nọ me vi rie he, yọ ọ daoma re o ru owhai fievahọ erue na,+
32 fikiere enẹ Jihova ọ ta, ‘Rri, mẹ be rẹriẹ ovao mẹ dhe Shimaya ohwo Nẹhelam na gbe uyẹ riẹ. Ohwo unuwou riẹ ọvo ọ te zọ evaọ usu ahwo nana ha, yọ ọ te ruẹ eware iwoma nọ me ti ru kẹ ahwo mẹ na ha,’ ere Jihova ọ ta, ‘keme o ru nọ ahwo a be rọ wọso Jihova.’”’”
Eme-Obotọ
^ Hayo o sae jọ nọ, “enọ e rẹ ma igbẹhẹ ilogbo.”
^ Hayo o sae jọ nọ, “nọ e bẹre no.”
^ Hayo “ẹyao.”
^ Evaọ Hibru, “mẹ jẹ riọ kpama je vi ai.”
^ Evaọ Hibru, “Nebukadreza,” oghẹrẹ ofa nọ a kere i rie.
^ Hayo “eyọno nọ a rẹ rọ kare ohwo evaọ uriohọ.”
