Jerimaya 32:1-44
32 Ẹme nọ o no obọ Jihova bru Jerimaya ze evaọ ukpe avọ ikpe Zẹdikaya ovie Juda, koyehọ, ukpe avọ ikpegberee Nebukadneza.*+
2 Evaọ oke yena yọ egbaẹmo ovie Babilọn a ko Jerusalẹm họ, yọ a fi Jerimaya ọruẹaro na họ evaọ Ighẹ Iroiro na+ evaọ uwou* ovie Juda.
3 Keme Zẹdikaya ovie Juda o fi rie họ oria ovo,+ inọ, “Fikieme whọ be rọ ruẹaro enẹ? Whọ be ta nọ, ‘Enẹ Jihova ọ ta: “Mẹ te rehọ okpẹwho nana họ obọ ovie Babilọn, o ve ti fi ei kparobọ,+
4 yọ Zẹdikaya ovie Juda ọ te va ahwo Kaldia na abọ họ, keme a te se iẹe ba ẹrehọ kẹ ovie Babilọn ho, yọ ọ te ta ẹme kẹe ovao dhe ovao, a te ruẹ ohwohwo.”’+
5 ‘Ọ te rehọ Zẹdikaya kpobọ Babilọn, yọ obei ọ te jọ bẹsenọ mẹ te rẹriẹ ovao mẹ rri rie,’ ere Jihova ọ ta. ‘Dede nọ wha ruabọhọ bi lele ahwo Kaldia họre na, wha te kparobọ họ.’”+
6 Jerimaya ọ tẹ ta nọ: “Ẹme Jihova o bru omẹ ze no, inọ,
7 ‘Rri, Hanamẹl ọmọzae Shalọm oniọvo-ọsẹ ra ọ te nyabru owhẹ ze, ọ vẹ ta nọ: “Dẹ otọ mẹ nọ o rrọ obọ Anatọt+ na kẹ omara, keme whẹ họ ohwo ọsosuọ nọ o wo udu nọ ọ rẹ rọ dẹe zihe ze.”’”+
8 Hanamẹl ọmọzae oniọvo-ọsẹ mẹ ọ tẹ nyabru omẹ ze obọ Ighẹ Iroiro na nwane wọhọ epanọ Jihova ọ ta na, ọ tẹ ta kẹ omẹ nọ: “Ivie dẹ otọ mẹ nọ o rrọ obọ Anatọt evaọ ẹkwotọ Bẹnjamin na, keme whẹ họ ọnọ o wo udu nọ o re ro woi jẹ wariẹ dẹe zihe ze. Dẹe kẹ omara.” Nọ ọ ta ere, mẹ tẹ riẹ nọ obọ Jihova ẹme na o no ze.
9 Fikiere mẹ tẹ dẹ otọ nọ o rrọ Anatọt na mi Hanamẹl ọmọzae oniọvo-ọsẹ mẹ. Mẹ tẹ wawọ igho na+ kẹe, shẹkẹl* ihrẹ gbe ewẹ isiliva ikpe.
10 Kẹsena me te kere iei fihọ obe ọtamuo,+ fi oka* họ iẹe, se ahwo nọ a rẹ jọ isẹri ze,+ jẹ rehọ iskeli wawọ igho na.
11 Mẹ tẹ rehọ obe ọtamuo nọ mẹ rọ dẹ otọ na, onọ a gba di je fi oka họ wọhọ epanọ ujaje na gbe izi ẹwho e ta, jegbe onọ a gba di hi na,
12 mẹ tẹ rehọ obe ọtamuo nọ mẹ rọ dẹ otọ na kẹ Barọk+ ọmọzae Neraya ọmọzae Masaya evaọ iraro Hanamẹl+ ọmọzae oniọvo-ọsẹ mẹ, te isẹri nọ e whobọhọ obe ọtamuo nọ mẹ rọ dẹ otọ na, gbe ahwo Ju kpobi nọ a keria Ighẹ Iroiro na.+
13 Mẹ tẹ jọ iraro rai ta kẹ Barọk nọ:
14 “Enẹ Jihova olori egbaẹmo, Ọghẹnẹ Izrẹl ọ ta, ‘Rehọ ebe ọtamuo nana, obe ọtamuo nana nọ whọ rọ dẹ otọ na, onọ a gba di je fi oka họ na gbe onọ a gba di hi na, re who fi ae họ eva othẹ ẹkpẹ, re a sẹro rai evaọ oke krẹkri.’
15 Keme enẹ Jihova olori egbaẹmo, Ọghẹnẹ Izrẹl ọ ta, ‘A te wariẹ jọ ẹkwotọ nana dẹ iwou gbe etọ gbe egbọ evaene.’”+
16 Kẹsena mẹ tẹ lẹ se Jihova nọ mẹ rehọ obe ọtamuo nọ mẹ rọ dẹ otọ na kẹ Barọk ọmọzae Neraya no, inọ:
17 “O Jihova Olori nọ Ọ Mai Kpehru na! Rri! Whẹ họ Ọnọ ọ rehọ ogaga ulogbo ra+ gbe ugbobọ ra nọ o rriẹ fihọ rọ ma idhiwu na gbe otọakpọ na. Oware ovuovo o rẹ bẹ owhẹ eru hu,
18 Ọnọ o bi dhesẹ uyoyou nọ o rẹ hiẹ hẹ kẹ idu ahwo, rekọ ọ rẹ hwosa oruthọ esẹ zihe kẹ* emezae rai,+ Ọghẹnẹ uzẹme na, Ọnọ ọ rrọ ruaro je wo ẹgba, ọnọ odẹ riẹ o rrọ Jihova olori egbaẹmo.
19 Ẹjiroro ra ọ rrọ ruaro yọ who re ru ikpeware,+ whẹ họ ọnọ ibiaro riẹ i bi muẹrohọ oware kpobi nọ ahwo-akpọ a bi ru+ re whọ hwosa kẹ omomọvo wọhọ epaọ idhere riẹ, jẹ wọhọ epaọ oware nọ o bi ru.+
20 Who ru eware oka gbe eware igbunu evaọ ẹkwotọ Ijipti, enọ a riẹ rite ẹdẹ inẹnẹ na, whọ tẹ rọ ere wo odẹ kẹ omara evaọ Izrẹl gbe evaọ udevie ahwo-akpọ,+ wọhọ epanọ o rrọ nẹnẹ na.
21 Whọ rehọ ẹkwoma eware oka, eware igbunu, obọ ogaga, ugbobọ nọ o rriẹ fihọ, gbe iruẹru imuozọ rọ rehọ ahwo ra Izrẹl no ẹkwotọ Ijipti ze.+
22 “Nọ u te oke jọ whọ tẹ kẹ ae ẹkwotọ nana nọ who duwu iyei nọ whọ te kẹ esẹ-esẹ rai na,+ ẹkwotọ nọ ame-ivie gbe ọnyọ i bi jo su.+
23 A tẹ ruọ ẹkwotọ na jẹ rehọ iẹe, rekọ a yoẹme kẹ urru ra hayo nya lele uzi ra ha. A ru oware ovo nọ who jie uzi riẹ kẹ ae nọ a ru hu, onọ o wha riẹ ze nọ who ro ru re okpẹtu nana o te ai.+
24 Rri! Egbaẹmo e nyaze te ma igbuhru wariẹ okpẹwho na họ no re a fi ei kparobọ,+ yọ fiki ọgbọdọ na,+ ohọo nọ u bi mu na, gbe okpẹyao nọ o re vo na,*+ okpẹwho na o te siọ obọ ahwo Kaldia nọ a be họre iẹe na ba ekie fihọ họ; eware nọ whọ ta kpobi e via no, wọhọ epanọ whọ be ruẹ na.
25 Rekọ, O Jihova Olori nọ Ọ Mai Kpehru na, whọ ta kẹ omẹ nọ, ‘Rehọ ugho dẹ otọ kẹ omara re who je se ahwo nọ a rẹ jọ isẹri ze,’ dede nọ a te siọ okpẹwho nana ba ẹrehọ họ obọ ahwo Kaldia na ha.”
26 Fikiere, ẹme Jihova o te bru Jerimaya ze, inọ:
27 “Mẹ na, mẹ Jihova, Ọghẹnẹ ahwo-akpọ* kpobi. Kọ oware jọ o riẹ nọ o rẹ bẹ omẹ eru?
28 Fikiere enẹ Jihova ọ ta, ‘Rri, mẹ be rehọ okpẹwho nana kẹ ahwo Kaldia jẹ rehọ iẹe họ obọ Nebukadneza* ovie Babilọn, yọ o ti fi ei kparobọ.+
29 Yọ ahwo Kaldia nọ a be họre okpẹwho nana a te ruọ eva, a ve tu erae họ okpẹwho nana,+ a vẹ mahe iẹe muotọ kugbe iwou nọ ahwo na a be jọ ehru rai dhe idhe kẹ Bale je ku idhe udi kẹ eghẹnẹ efa re a ru omẹ eva dha na.’+
30 “‘Keme oware nọ u yoma evaọ aro mẹ ọvo ahwo Izrẹl gbe ahwo Juda a bi ru, no anwọ oke uzoge rai ze;+ ahwo Izrẹl a ruabọhọ be rehọ iruo abọ rai ru omẹ eva dha,’ ere Jihova ọ ta.
31 ‘Keme oware nọ o rẹ wha evedha gbe ofu se omẹ ọvo okpẹwho nana u bi ru, no anwọ ẹdẹ nọ a rọ bọe ze rite ẹdẹ inẹnẹ na,+ re mẹ ruẹsi si ei no aro mẹ no,+
32 fiki eware iyoma kpobi nọ ahwo Izrẹl gbe ahwo Juda a ru ro ru omẹ eva dha—ae omarai, ivie rai,+ ikpahwo-esuo rai,+ izerẹ rai, eruẹaro rai,+ gbe ezae Juda avọ ahwo nọ a be rria Jerusalẹm.
33 A ruabọhọ bi kiukeku omẹ viukpenọ a re ku ovao rai ku omẹ;+ dede nọ mẹ daoma wuhrẹ ai ewewuhrẹ,* ọvuọvo rai ọ gaviezọ re ọ jẹ ọwhọkuo rehọ họ.+
34 Yọ a fi emema etọtọ rai họ uwou nọ a be rehọ odẹ mẹ se, re a ruẹsi zue ei.+
35 U te no ere no, a bọ eria ikpehru Bale fihọ Ukiekpotọ Ọmọzae Hinọm,*+ re a ruẹse mahe emezae rai gbe emetẹ rai evaọ erae rọkẹ Molẹk,+ oware nọ me jie uzi riẹ kẹ ae he,+ yọ o re tubẹ ziọ udu mẹ vievie he* re a ru oware otọtọ utioye, onọ u bi ru Juda raha uzi na.’
36 “Fikiere enẹ Jihova Ọghẹnẹ Izrẹl ọ ta kpahe okpẹwho nana nọ wha be ta nọ a te rọ ẹkwoma ọgbọdọ, ohọo nọ u ti mu, gbe okpẹyao nọ o re vo rọ rehọ họ obọ ovie Babilọn na,
37 ‘Rri, me ti koko ai họ no ekwotọ kpobi nọ mẹ vaha e rai kpohọ fiki evedha mẹ, ofu mẹ, gbe ofu ọgaga mẹ ze,+ yọ mẹ te rehọ ai zihe ziọ oria nana je ru ai rria avọ omofọwẹ.+
38 A te jọ ahwo mẹ, yọ mẹ te jọ Ọghẹnẹ rai.+
39 Yọ mẹ te kẹ ae udu ovo+ gbe edhere ọvo re a ruẹse dhozọ mẹ ẹsikpobi, re u woma kẹ ae je woma kẹ emọ rai nọ esẹ na i te whu no.+
40 Mẹ te re ọvọ ebẹdẹ bẹdẹ kugbe ae,+ inọ mẹ te siọ ae ewoma ba eru kẹ hẹ;+ yọ me ti fi ei họ udu rai re a dhozọ mẹ, re a gbẹ nyasiọ omẹ ba ha.+
41 Mẹ te rọ evawere ru ewoma kẹ ae,+ yọ mẹ te rọ udu mẹ kpobi gbe ẹgba* mẹ kpobi ro ru ai dowọ muotọ kothi evaọ ẹkwotọ nana.’”+
42 “Keme enẹ Jihova ọ ta, ‘Nwane wọhọ epanọ mẹ rehọ okpẹtu nana kpobi te ahwo nana na, ere ọvona me ti ru ewoma* kpobi nọ mẹ be ya eyaa riẹ kẹ ae na kẹ ai re.+
43 Yọ a te wariẹ jọ ẹkwotọ nana dẹ etọ,+ dede nọ wha be ta nọ: “Nọ otọ nọ o raha no nọ uvumọ ohwo gbe arao ọ rrọ họ, yọ a rehọ e riẹ kẹ ahwo Kaldia no.”’
44 “‘A te rehọ ugho dẹ etọ, a ti kere ebe ọtamuo nọ a rọ dẹ etọ jẹ gba ai di avọ oka nọ a fihọ ae, yọ a ti se ahwo nọ a rẹ jọ isẹri ze evaọ ẹkwotọ Bẹnjamin,+ evaọ eria nọ e wariẹ Jerusalẹm họ, evaọ ikpewho Juda,+ evaọ ikpewho nọ e rrọ ubrotọ igbehru na, evaọ ikpewho nọ e rrọ ukiekpotọ na,+ gbe evaọ ikpewho obọze ovatha-ọre na, keme mẹ te rehọ ahwo rai nọ a mu zihe ze,’+ ere Jihova ọ ta.”
Eme-Obotọ
^ Evaọ Hibru, “Nebukadreza,” oghẹrẹ ofa nọ a kere i rie.
^ Hayo “ighẹ.”
^ Shẹkẹl ọvo ọ gbẹdẹ te egramo 11.4 (0.367 oz t). Rri Ẹme-Ofiba B14.
^ Evaọ Hibru, “fihọ igbama.”
^ Hayo “ẹyao.”
^ Evaọ Hibru, “uwo.”
^ Evaọ Hibru, “Nebukadreza,” oghẹrẹ ofa nọ a kere i rie.
^ Evaọ Hibru, “mẹ jẹ riọ kpama je wuhrẹ ae.”
^ Hayo “o re ziọ iroro mẹ vievie he.”
^ Hayo “eware iwoma.”
