Jerimaya 20:1-18
20 Whaọ Pashọ ọmọzae Ima, ọnọ ọ jọ ozerẹ, ọ tẹ jẹ jọ ohwo ọsosuọ evaọ usu enọ i wuzou evaọ uwou Jihova, ọ jẹ gaviezọ okenọ Jerimaya ọ ruẹaro eware nana.
2 Pashọ ọ tẹ fa Jerimaya ọruẹaro na, ọ tẹ kare iẹe fihọ ewẹ-ekpala ekarọ*+ nọ e jọ obọ Unuẹthẹ Obehru orọ Bẹnjamin, onọ o jọ uwou Jihova.
3 Rekọ evaọ okiokiọ riẹ nọ Pashọ o si Jerimaya no ewẹ-ekpala ekarọ* na no, Jerimaya ọ tẹ ta kẹe nọ:
“Odẹ nọ Jihova o mu kẹ owhẹ họ, Idudu Evaọ Oria Kpobi,+ orọnikọ Pashọ họ.
4 Keme enẹ Jihova ọ ta, ‘Me ti ru owhẹ họ oware idudu kẹ omobọ ra gbe egbẹnyusu ra kpobi, yọ ọgbọdọ ewegrẹ rai o ti kpe ai evaọ iraro ra yọ who bi rri ọvo;+ mẹ te rehọ Juda soso họ obọ ovie Babilọn, o ve ti mu ai kpohọ igbo evaọ obọ Babilọn jẹ rehọ ọgbọdọ kpe ai.+
5 Mẹ te rehọ ekwakwa efe okpẹwho nana kpobi, eware riẹ kpobi, eware eghaghae riẹ kpobi gbe ekwakwa-aghae kpobi nọ ivie Juda i wo họ obọ ewegrẹ rai.+ A te rọ ogaga kwa ae avọ eware rai kpobi rehọ, a vẹ wha ae kpobọ Babilọn.+
6 Rọkẹ owhẹ Pashọ, gbe ahwo kpobi nọ a be rria uwou ra, wha ti kpohọ igbo. A ti mu owhẹ kpobọ Babilọn, whọ vẹ te jọ obei whu, a ve ti ki owhẹ avọ egbẹnyusu ra kpobi fihọ obei, keme whọ ruẹaro erue kẹ ae.’”+
7 Whọ viẹ omẹ họ no, O Jihova, mẹ tẹ rrọ ọnọ a viẹ họ.
Whọ rehọ ẹgba ra wọso omẹ, whọ tẹ kparobọ.+
Me zihe ruọ ohwo nọ a be rọ ta atahwẹ no evaọ okpẹdoke na soso;Ohwo kpobi o bi se omẹ ẹkoko.+
8 Keme oke kpobi nọ mẹ be ta ẹme, oware nọ mẹ rẹ ta je whowho họ,“Ozighi gbe ọraha!”
A be rọ fiki ẹme Jihova la omẹ eka je bi se omẹ ẹkoko evaọ okpẹdoke na soso.+
9 Fikiere mẹ tẹ ta nọ: “Mẹ gbẹ te fodẹ iẹe he,Yọ mẹ gbẹ te rehọ odẹ riẹ ta ẹme ofa ha.”+
Rekọ evaọ udu mẹ, ẹme riẹ ọ tẹ jọ wọhọ erae nọ e be ware nọ a kare dhe igbenwa mẹ,O tẹ bẹ omẹ no re me diwi ei họ eva;Mẹ gbẹ jẹ sai thihakọ riẹ hẹ.+
10 Keme me yo eme atanọ iyoma buobu no;Eware idudu e wariẹ omẹ họ.+
“Wha brukpei; joma brukpei!”
Ohwo kpobi nọ ọ be ta nọ udhedhẹ u te omẹ o kiekọ bi rri epanọ me ti ro kie, inọ:+
“Ẹsejọhọ o ti ru oware ugheghẹ jọ,Ma ve ti wo ogaga vi ei, ma ve ru ei kele.”
11 Rekọ Jihova ọ jọ kugbe omẹ wọhọ ọgbaẹmo nọ o re muozọ.+
Oyejabọ nọ ahwo nọ a bi kpokpo omẹ a ti ro zoruẹ, yọ a te kparobọ họ.+
A ti ru oma vuọ ae gaga keme a te kparobọ họ.
Omovuọ nọ a ti kpe họ ai oma bẹdẹ bẹdẹ o te thọrọ ẹro ho.+
12 Rekọ whẹ, O Jihova olori egbaẹmo, whọ be kiẹ ọnọ o kiẹrẹe riwi;Whọ rẹ ruẹ iroro nọ e mai diwi* gbe udu na.+
Jomẹ ruẹ epanọ who ti ro ru ai kele,+Keme whẹ me tu ẹdhọ mẹ kẹ no.+
13 Wha so ole kẹ Jihova! Wha jiri Jihova!
Keme o siwi oruori na no obọ irumuomu no.
14 Uye u te* ẹdẹ nọ a yẹ omẹ!
Jọ ẹdẹ nọ oni mẹ o yẹ omẹ o wo oghale he!+
15 Uye u te ohwo nọ ọ wha emamọ usi se ọsẹ mẹ inọ:
“A yẹ ọmọzae kẹ owhẹ no, ọmọzae!”
Onọ u ru rie ghọghọ gaga.
16 Jọ ohwo yena ọ jọ wọhọ ikpewho nọ Jihova ọ raha ababọ ẹda nọ o da riẹ.
Jọ o yo edo oviẹ evaọ ohiohiẹ je yo edo ọgba evaọ udevie uvo.
17 Fikieme o gbe kpe omẹ no evaọ obọ edhede he,Re oni mẹ o zihe ruọ uki mẹRe edhede riẹ o jọ ẹsikpobi wọhọ ohwo nọ o dihọ?+
18 Fikieme me ro no eva edhede zeRe mẹ ruẹ ẹbẹbẹ gbe uweri,Re edẹ uzuazọ mẹ i kuhọ avọ omovuọ?+
