Jerimaya 34:1-22
34 Ẹme nọ o no obọ Jihova bru Jerimaya ze evaọ okenọ Nebukadneza* ovie Babilọn avọ egbaẹmo riẹ kpobi gbe ekwotọ-ivie kpobi nọ e rrọ otọakpọ na nọ e rrọ otọ esuo riẹ, jegbe ahwo na kpobi a jẹ họre Jerusalẹm avọ ikpewho riẹ kpobi:+
2 “Enẹ Jihova Ọghẹnẹ Izrẹl ọ ta, ‘Nya re whọ ta ẹme kẹ Zẹdikaya+ ovie Juda, ta kẹe nọ: “Enẹ Jihova ọ ta, ‘Rri, mẹ be rehọ okpẹwho nana họ obọ ovie Babilọn, yọ ọ te rọ erae mahe iẹe.+
3 Whọ te vae abọ họ, keme a te siọ owhẹ ba emu hu, yọ a te rehọ owhẹ kẹe.+ Who ti rri ibiaro ovie Babilọn kiọkiọkiọ, ọ te ta ẹme kẹ owhẹ ovao dhe ovao, yọ who ti kpobọ Babilọn.’+
4 Rekọ, yo ẹme nọ Jihova ọ ta, O Zẹdikaya ovie Juda, ‘Enẹ Jihova ọ ta kpahe owhẹ: “Who ti whu uwhu ọgbọdọ họ.
5 Who ti whu dhedhẹ,+ yọ a te mahe eware nọ i re gbo ore awere fiki ra wọhọ epanọ a ru kẹ esẹ ra, ivie nọ e kake rehọ owhẹ jọ, yọ a ti weri owhẹ, inọ, ‘U yoma kẹhẹ, O Olori!’ keme ‘mẹ ta ẹme na no,’ ere Jihova ọ ta.”’”’”
6 Jerimaya ọruẹaro na ọ tẹ jọ Jerusalẹm ta eme nana kpobi kẹ Zẹdikaya ovie Juda,
7 evaọ okenọ egbaẹmo ovie Babilọn e jẹ họre Jerusalẹm jegbe ikpewho Juda kpobi nọ i kiọkọ,+ koyehọ Lekish+ gbe Azika;+ keme eye ọvo họ ikpewho nọ a di ogba wariẹ họ* nọ i kiọkọ evaọ ikpewho Juda.
8 Ẹme nọ o no obọ Jihova bru Jerimaya ze evaọ okenọ Zẹdikaya ovie na ọ re ọvọ kugbe ahwo kpobi nọ a rrọ Jerusalẹm re o woro obusino kẹ ae,+
9 inọ ohwo kpobi o siobọno erigbo riẹ nọ e rrọ ahwo Hibru, te ọzae te aye, re ohwo ọvo ọ gbẹ rọ ibe ohwo Ju riẹ ru ọrigbo ho.
10 Fikiere ikpahwo-esuo na kpobi gbe ahwo na kpobi a te ru ere. A re ọvọ inọ ohwo kpobi o re siobọno erigbo ezae gbe erọ eyae nọ o wo, yọ a rẹ gbẹ rehọ ai ru erigbo ofa ha. Ere a ru, a tẹ kẹ ai uvẹ kpo.
11 Rekọ a tẹ wariẹ rehọ erigbo ezae avọ erọ eyae nọ a siobọno vẹre na zihe ze, jẹ wariẹ gba ae họ zihe ruọ erigbo.
12 Fikiere ẹme Jihova o te no obọ Jihova bru Jerimaya ze, inọ:
13 “Enẹ Jihova Ọghẹnẹ Izrẹl ọ ta, ‘Mẹ re ọvọ kugbe esẹ-esẹ rai+ evaọ ẹdẹ nọ mẹ rọ rehọ ae no ẹkwotọ Ijipti ze, no obonọ a jẹ jọ igbo ze,+ inọ:
14 “Evaọ ekuhọ ikpe ihrẹ, whai omomọvo o re siobọno omoni riẹ nọ ọ rrọ ohwo Hibru nọ a zẹ kẹe kpo, ọnọ ọ gbodibo kẹe ikpe ezeza no; who re siobọnoi kpo hrọ.”+ Rekọ esẹ-esẹ rai a gaviezọ họ hayo fi ezọ rai hotọ kẹ omẹ hẹ.
15 Yọ kẹle* na whai omarai wha kuomarẹriẹ, wha te ru oware nọ u kiehọ evaọ aro mẹ nọ wha ro woro obusino kẹ erivẹ rai, wha tẹ jọ uwou nọ a be rehọ odẹ mẹ se na re ọvọ evaọ aro mẹ.
16 Rekọ wha te kuomarẹriẹ, wha te gbe odẹ mẹ ku,+ nọ wha rọ rehọ erigbo ezae avọ erọ eyae nọ wha wo vẹre zihe ze, enọ wha siobọno wọhọ epanọ a gwọlọ, wha tẹ gba ae họ zihe ruọ erigbo.’
17 “Fikiere enẹ Jihova ọ ta: ‘Wha yoẹme kẹ omẹ hẹ inọ whai omomọvo o woro obusino kẹ omoni riẹ gbe ọrivẹ riẹ.+ Fikiere me ti woro obusino kẹ owhai enẹna,’ ere Jihova ọ ta, ‘nọ ọgbọdọ, okpẹyao nọ o re vo,* gbe ohọo nọ u ti mu i ti ro kpe owhai,+ yọ me ti ru owhai họ oware idudu kẹ ekwotọ-ivie kpobi nọ e rrọ otọakpọ na.+
18 Yọ enẹ o te via kẹ ezae nọ e raha ọvọ mẹ nọ i ru lele eme ọvọ na ha, onọ a jọ aro mẹ re evaọ okenọ a gbẹre ọmọ-eruẹ na kpohọ abava jẹ nya udevie ibro ivẹ na vrẹ,+
19 koyehọ, ikpahwo-esuo Juda, ikpahwo-esuo Jerusalẹm, iruiruo ighẹ ovie na, izerẹ na, gbe ahwo ẹkwotọ na kpobi nọ a nya udevie ibro ivẹ ọmọ-eruẹ na vrẹ:
20 Mẹ te rehọ ae họ obọ ewegrẹ rai gbe obọ enọ e be gwọlọ uzuazọ* rai kpe, yọ iri rai e te jọ emu rọkẹ evra obọ ehru* na jẹ rọkẹ erao otọakpọ na.+
21 Yọ mẹ te rehọ Zẹdikaya ovie Juda avọ ikpahwo-esuo riẹ họ obọ ewegrẹ rai gbe obọ enọ e be gwọlọ uzuazọ* rai kpe, jẹ rehọ ae họ obọ egbaẹmo ovie Babilọn,+ enọ i bi kuomarẹriẹ zihe siọ owhai ba na.’+
22 “‘Rri, mẹ te kẹ udu na,’ ere Jihova ọ ta, ‘yọ mẹ te rehọ ae zihe ziọ okpẹwho nana, a vẹ te họre iẹe je fi ei kparobọ jẹ rehọ erae mahe iẹe;+ me ve ti ru ikpewho Juda fihọ otọ nọ o raha no, nọ ohwo ọvo ọ be rria ha.’”+
