Jerimaya 52:1-34
52 Ikpe udhegbọvo Zẹdikaya+ ọ jọ nọ o zihe ruọ ovie, yọ ikpe ikpegbọvo o su evaọ Jerusalẹm. Odẹ oni riẹ Hamutal+ ọmọtẹ Jerimaya, ohwo Libna.
2 Ọ ruabọhọ je ru oware nọ u yoma evaọ aro Jihova, wọhọ epaọ eware kpobi nọ Jehoyakim o ru.+
3 Eware nana e via evaọ Jerusalẹm gbe Juda fiki ofu Jihova, bẹsenọ o ro gbolo ai kufiẹ no aro riẹ no.+ Yọ Zẹdikaya ọ kpareso ovie Babilọn.+
4 Evaọ ukpe avọ izii esuo Zẹdikaya, evaọ amara avọ ikpe, evaọ ẹdẹ avọ ikpe amara na, Nebukadneza ovie Babilọn avọ ogbaẹmo riẹ kpobi a tẹ wọ ohọre ziọ Jerusalẹm. A tẹ fa evuẹ re a họre iẹe, a tẹ ma ugbẹhẹ wariẹ okpẹwho na soso ro koi họ.+
5 A ko okpẹwho na họ rite ukpe avọ ikpegbọvo Zẹdikaya ovie na.
6 Evaọ amara avọ ene, evaọ ẹdẹ avọ izii amara na,+ ohọo nọ u je mu o tẹ jọ gaga evaọ okpẹwho na, yọ emuore ọvo ọ gbẹ jọ rọkẹ ahwo ẹkwotọ na ha.+
7 Ukuhọ riẹ, a te kporo ugbẹhẹ okpẹwho na ruọ eva, isoja na kpobi e tẹ rehọ orọ unuẹthẹ nọ o rrọ udevie igbẹhẹ ivẹ na nọ o kẹle ọgbọ ovie na rọ dhẹ no okpẹwho na evaọ aso, yọ ahwo Kaldia na a wariẹ okpẹwho na họ; a tẹ be rọ edhere Araba* na dhẹ vrẹ.+
8 Rekọ egbaẹmo ahwo Kaldia a te le ovie na, a te le Zẹdikaya mu+ evaọ udhude opraprara Jẹriko, egbaẹmo riẹ kpobi e tẹ vahabọ se iẹe ba.
9 Kẹsena a te mu ovie na, a tẹ rehọ iẹe bru ovie Babilọn evaọ obọ Ribla evaọ ẹkwotọ Hemat, o te bruoziẹ oware nọ a re ru ei.
10 Ovie Babilọn ọ tẹ jọ iraro Zẹdikaya kpe emezae riẹ no, o te je kpe ikpahwo-esuo Juda kpobi no evaọ Ribla.
11 Kẹsena ovie Babilọn o te tu Zẹdikaya aro+ jẹ rehọ egbregba ekọpa rọ gbae, ọ tẹ rehọ iẹe ziọ Babilọn, o te fi ei họ uwou-odi bọo ẹdẹ uwhu riẹ.
12 Evaọ amara avọ isoi, evaọ ẹdẹ avọ ikpe amara na, koyehọ, evaọ ukpe avọ ikpegbizii Nebukadneza* ovie Babilọn, Nebuzaradan oletu iroiro na, ọnọ ọ jọ odibo ovie Babilọn, ọ tẹ ziọ Jerusalẹm.+
13 Ọ tẹ mahe uwou Jihova,+ uwou* ovie na, gbe iwou kpobi nọ e jọ Jerusalẹm muotọ; ọ tẹ jẹ mahe uwou ulogbo kpobi muotọ.
14 Ogbaẹmo Kaldia soso nọ o jọ kugbe oletu iroiro na u te kporo igbẹhẹ nọ e wariẹ Jerusalẹm họ fihọ otọ.+
15 Nebuzaradan oletu iroiro na o mu iruori na jọ gbe ahwo nọ a kiọkọ nọ a nyaseba okpẹwho na kpohọ igbo. O te je mu ahwo nọ a dhẹ ruọ abọ ovie Babilọn, jegbe ewena nọ i wo onaa nọ i kiọkọ.+
16 Rekọ Nebuzaradan oletu iroiro na ọ nyasiọ ahwo jọ nọ a mai yogbe evaọ ẹkwotọ na ba re a jọ eruẹrẹ-ọgbọ, gbe enọ i re ru iruo ọgbahọ.+
17 Ahwo Kaldia na a gbẹre ipila ekọpa+ nọ e jọ uwou Jihova na ibribro, jegbe ighelie-eware na+ gbe Abade ekọpa+ nọ e jọ uwou Jihova na, a tẹ kwa ekọpa na kpobi kpobọ Babilọn.+
18 A tẹ jẹ kwa ibokiti na, eshọvẹle na, ifurie-erae na, imidhe ikokodo na,+ igho na,+ gbe ekwakwa ekọpa kpobi nọ a je ro ruiruo evaọ etẹmpol na.
19 Oletu iroiro na ọ kwa idhe na,+ imidhe erae na, imidhe ikokodo na, ibokiti na, ekpọ-edada ikpẹ na,+ igho na, gbe imidhe ikokodo nọ a rehọ emamọ igoru avọ isiliva ru na.+
20 Ekọpa nọ a ro ru ekwakwa nana kpobi, koyehọ ipila ivẹ na,+ Abade na, iruẹ ekọpa ikpegbivẹ nọ e jọ otọ Abade na, gbe ighelie-eware nọ Solomọn ovie na o ru fihọ uwou Jihova na i bu vi ẹwawọ.
21 Kpahe ipila na, upila ovuovo u kpehru te ikiubiti* ikpegberee, ufi nọ u theri te ikiubiti ikpegbivẹ o rẹ sae nyae wariẹ họ;+ okpa riẹ okẹkẹe iziabọ* ene, yọ u wo eghogho.
22 Ekọpa a ro ru uzou nọ o jọ ehru riẹ; uzou na u kpehru te ikiubiti isoi;+ ekọpa a ro ru oware nọ o wọhọ ẹriri* na gbe pọmegranet nọ e wariẹ uzou na họ na kpobi. Epọvo na a ru upila avọ ivẹ na, te pọmegranet na re.
23 Pọmegranet udhone gbe ikpegbezeza e jọ tofẹ tofẹ riẹ; pọmegranet kpobi nọ e wariẹ oware nọ o wọhọ ẹriri na họ e tẹ jọ udhusoi (100).+
24 Oletu iroiro na o te je mu Seraya+ olori izerẹ na, Zẹfanaya+ ozerẹ avọ ivẹ na, gbe iriẹthẹ esa na.+
25 Ọ tẹ jẹ jọ okpẹwho na mu oruiruo ighẹ ovie na jọ nọ ọ jọ ọnọ o wuzou isoja na, egbẹnyusu ekpekpe ihrẹ ovie na nọ a ruẹ evaọ okpẹwho na, jegbe okere-obe oletu ogbaẹmo na, ọnọ o je koko ahwo ẹkwotọ na họ, gbe ezae udhosa evaọ usu ahwo gheghe ẹkwotọ na nọ a gbẹ jọ okpẹwho na.
26 Nebuzaradan oletu iroiro na o mu rai, ọ tẹ rehọ ae bru ovie Babilọn evaọ obọ Ribla.
27 Ovie Babilọn o te kpe ai fihọ otọ evaọ Ribla+ nọ o rrọ ẹkwotọ Hemat. Ere Juda o ro no ẹkwotọ riẹ kpohọ igbo.+
28 Ahwo nana họ enọ Nebukadneza* o mu kpohọ igbo: evaọ ukpe avọ ihrẹ, ahwo Ju idu esa gbe udhegbesa (3,023).+
29 Evaọ ukpe avọ ikpegberee Nebukadneza,*+ ahwo* egba eree gbe ọgbagbivẹ (832) a mu no Jerusalẹm vrẹ.
30 Evaọ ukpe avọ udhegbesa Nebukadneza,* Nebuzaradan oletu iroiro na o mu ahwo Ju kpohọ igbo, ahwo* egba ihrẹ gbe udhuvẹ-gbisoi (745).+
Nọ a ku aikpobi kugbe, ahwo* idu ene gbe egba ezeza (4,600) a mu kpohọ igbo.
31 Kẹsena evaọ ukpe avọ ọgbagbihrẹ nọ Jehoyakin+ ovie Juda ọ rọ jọ igbo na, evaọ amara avọ ikpegbivẹ, evaọ ẹdẹ avọ udhegbisoi amara na, Ivo-mẹrodak ovie Babilọn o te siobọno Jehoyakin ovie Juda* evaọ ukpe nọ o ro zihe ruọ ovie, a tẹ rehọ iẹe no uwou-odi ze.+
32 Ọ rehọ edhere owowou lele iei ta ẹme, o te ru agbara-uvie riẹ kpehru vi egbara-uvie ivie efa nọ e jọ kugbei evaọ Babilọn.
33 Fikiere Jehoyakin ọ tẹ ba iwu uwou-odi riẹ no, ọ tẹ jẹ hae jọ aro riẹ re emu kẹse kẹse evaọ edẹ uzuazọ riẹ kpobi.
34 Kẹdẹ kẹdẹ a jẹ kẹe emu nọ ovie Babilọn ọ ta nọ a hae kẹe, onọ a kẹ riẹ bọo ẹdẹ uwhu riẹ, evaọ edẹ uzuazọ riẹ kpobi.
Eme-Obotọ
^ Hayo “udhude opraprara.”
^ Evaọ Hibru, “Nebukadreza,” oghẹrẹ ofa nọ a kere i rie.
^ Hayo “ighẹ.”
^ Ikiubiti o theri te 44.5 cm (17.5 in.). Rri Ẹme-Ofiba B14.
^ Okẹkẹe uziobọ u te 1.85 cm (0.73 in.). Rri Ẹme-Ofiba B14.
^ Hayo “iboro; ede.”
^ Evaọ Hibru, “Nebukadreza,” oghẹrẹ ofa nọ a kere i rie.
^ Evaọ Hibru, “Nebukadreza,” oghẹrẹ ofa nọ a kere i rie.
^ Evaọ Hibru, “Nebukadreza,” oghẹrẹ ofa nọ a kere i rie.
^ Evaọ Hibru, “ọ tẹ kpare uzou Jehoyakin ovie Juda kpehru.”
