‘Impakaammok ti Naganmo’

“Imparangarangko ti naganmo kadagiti tattao nga intedmo kaniak manipud iti lubong. . . . Impakaammok kadakuada ti naganmo ket ipakaammokto dayta.”​—JUAN 17:6, 26.

Ania ti Kaipapananna? Inusar ni Jesus ti nagan ti Dios bayat ti ministeriona. No agbasa idi ni Jesus iti Kasuratan, kas masansan nga ar-aramidenna, ibalikasna ti personal a nagan ti Dios. (Lucas 4:16-21) Insurona nga ikararag dagiti pasurotna: “Ama, masantipikar koma ti naganmo.”​—Lucas 11:2.

Kasano nga Impakita Dayta Dagiti Nagkauna a Kristiano? Insalaysay ni apostol Pedro kadagiti lallakay iti Jerusalem a nangala ti Dios manipud iti nasnasion iti “ili a maipaay iti naganna.” (Aramid 15:14) Dagiti apostol ken ti dadduma pay inkasabada a “tunggal maysa nga umawag iti nagan ni Jehova maisalakanto.” (Aramid 2:21; Roma 10:13) Inusarda met ti nagan ti Dios kadagiti mismo a sinuratda. Ti Tosefta, a koleksion ti paglintegan dagiti Judio a nakompleto idi agarup 300 C.E., kinunana maipapan iti inaramid dagiti kontra iti Nakristianuan a sursurat: “Pinuoranda dagiti libro ti Ebanghelio ken ti liblibro dagiti minim [maipagarup a dagiti Judio a Kristiano]. Pinuoranda amin dagita sadinoman ti pakasarakanda, . . . agraman dagiti nakailanadan ti Nagan ti Dios.”

Siasinoda Ita ti Mangan-annurot iti Dayta? Kastoy ti nadakamat iti pakauna ti Revised Standard Version ti Biblia, nga inautorisaran ti National Council of the Churches of Christ iti United States: “Iti Judaismo sakbay ti panawen Kristiano, naisardeng ti panangusar iti aniaman a personal a nagan para iti kakaisuna a Dios, a kas ket tay adu ti sabali a dios malaksid kenkuana, ket saanen a maitutop nga usaren dayta ti amin a Kristiano a relihion.” Gapuna, nasuktan ti nagan ti Dios iti titulo nga “APO.” Itay laeng nabiit, imbilin ti Vatican kadagiti obispona: “Kadagiti kanta ken lualo, saanen a rumbeng nga usaren ken baliksen ti nagan ti Dios iti tetragrammaton a pormana a YHWH.” *

Siasino ita ti mangar-aramat ken mangipakpakaammo iti personal a nagan ti Dios? Idi tin-edyer pay ni Sergey, nakabuya idiay Kyrgystan iti maysa a pelikula a nangdakamat iti nagan ti Dios a Jehova. Saannan a nangngegan dayta a nagan iti simmaganad a 10 a tawen. Ngem idi immakar idiay United States, dua a Saksi ni Jehova ti simmarungkar kenkuana ket impakitada ti nagan ti Dios manipud iti Biblia. Naragsakan ni Sergey a makaammo nga adda gayam grupo a mangus-usar iti nagan a Jehova. Makapainteres ta iti Webster’s Third New International Dictionary, nadepinar ti nagan a Jehova kas “ti kangatuan a Dios ken ti kakaisuna a Dios a bigbigbigen ken daydayawen dagiti Saksi ni Jehova.”

[Footnote]