‘Addaanda iti Ayat iti Maysa ken Maysa’

“Mangtedak kadakayo iti baro a bilin, nga ayatenyo ti maysa ken maysa; kas iti panagayatko kadakayo, kasta met nga ayatenyo ti maysa ken maysa. Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.”​—JUAN 13:34, 35.

Ania ti Kaipapananna? Imbaga ni Kristo nga agiinnayat koma dagiti pasurotna no kasano nga inayatna ida. Kasano nga inaramidna dayta? Inayatna amin a tao, aniaman ti puli wenno seksoda, uray no saan a kasta ti kaugalian idi panawenna. (Juan 4:7-10) Gapu iti ayat, insakripisio ni Jesus ti tiempo, pigsa, ken personal a pagnam-ayanna tapno matulonganna ti sabsabali. (Marcos 6:30-34) Kamaudiananna, impakita ni Kristo ti ayat iti kasayaatan a pamay-an a kabaelanna. “Siak ti nasayaat a pastor,” kinunana. “Ti nasayaat a pastor isukona ti kararuana maigapu kadagiti karnero.”​—Juan 10:11.

Kasano nga Impakita Dayta Dagiti Nagkauna a Kristiano? Idi umuna a siglo, “kabsat” ti awag dagiti Kristiano iti maysa ken maysa. (Filemon 1, 2) Amin a tattao iti nasnasion ket naakseptar iti kongregasion Kristiano, ta mamatida nga “awan ti pagdumaan ti Judio ken Griego, ta adda ti isu met laeng nga Apo iti isuamin.” (Roma 10:11, 12) Kalpasan ti Pentecostes 33 C.E., dagiti adalan a taga-Jerusalem “inlako[da] dagiti sanikua ken dagiti kukuada ket dagiti naglakuanda imbunongda kadagiti amin, kas iti pakasapulan ti asinoman.” Apay? Tapno makapagbayag sadiay dagiti kabbaro a nabautisaran ket maitultuloyda nga ‘ipamaysa ti dumngeg iti sursuro dagiti apostol.’ (Aramid 2:41-45) Apay a natignay nga agsakripisio dagiti adalan? Dandani 200 a tawen kalpasan ti ipapatay dagiti apostol, insurat ni Tertullian ti komento ti dadduma maipapan kadagiti Kristiano: “Kasta unay ti panagiinnayatda iti maysa ken maysa . . . ken situtulokda pay ketdi a matay maigapu iti kakabsatda.”

Siasinoda Ita ti Mangan-annurot iti Dayta? Kuna ti libro a The History of the Decline and Fall of the Roman Empire (1837) nga iti napalabas a ginasgasut a tawen, dagidiay agkunkuna a Kristiano “nakarkaro pay ti panangdangranda iti maysa ken maysa ngem iti panagsagaba nga impalak-am kadakuada dagiti di manamati.” Natakuatan ti maysa a nabiit pay a surbey idiay U.S. nga ad-adda a manangidumduma dagiti relihioso a tattao, a kaaduan kadakuada ti agkunkuna a Kristiano. Masansan nga awan bibiang dagiti mannakimisa kadagiti karelihionanda iti sabali a pagilian, isu a saanda a matulongan ida wenno saanda a matignay a tumulong kadakuada no agkasapulan dagita.

Iti las-ud ti dua a bulan idi 2004, uppat nga agsasaruno a napipigsa a bagyo ti dimmalapus iti Florida. Ti mangimatmaton iti Emergency Operations Committee ti Florida siniguradona nga umiso ti pakausaran dagiti suplay. Kinunana nga awanen ti grupo a mas organisado ngem kadagiti Saksi ni Jehova, ket intukonna nga ipaayanna ida ti aniaman a kasapulanda. Idi 1997, maysa a grupo dagiti Saksi ni Jehova ti nangitugot kadagiti agas, taraon, ken kawes idi napanda idiay Democratic Republic of Congo kas pangsaranayda iti kakabsatda a Kristiano ken dadduma pay nga agkasapulan. Agdagup iti maysa a milion a doliar (U.S.) ti gatad nga indonar dagiti padada a Saksi idiay Europa.