Magtuon sa Pulong sang Dios

Paano Mo Makilala ang Matuod nga Relihion?

Makita sa sini nga artikulo ang mga pamangkot nga mahimo ginapaligban mo kag kon diin sa Biblia mabasa ang mga sabat. Nalipay gid ang mga Saksi ni Jehova nga buligan ka sa pagbinagbinag sini.

1. Isa lamang bala ang matuod nga relihion?

Gintudlo ni Jesus sa iya mga sumulunod ang isa lamang ka relihion, ang matuod nga relihion. Pareho ini sa dalan nga nagapadulong sa kabuhi. Parte sini nga dalan, si Jesus nagsiling: “Pila lamang ang nakatultol sini.” (Mateo 7:14) Ginabaton lamang sang Dios ang pagsimba nga nabase sa kamatuoran sang Biblia. Ang matuod nga mga sumilimba nahiusa sa isa ka pagtuo.—Basaha ang Juan 4:23, 24; 14:6; Efeso 4:4, 5.

2. Ngaa madamo nga relihion ang nagapangangkon nga Cristiano?

Ginpatiko sang butig nga mga propeta ang Cristianismo para sa ila kaugalingon nga interes. Gintagna ni Jesus nga magapakunokuno sila nga “karnero,” pero ang matuod daw mabangis sila nga mga lobo. (Mateo 7:13-15, 21, 23) Nagdamo ang butig nga mga Cristiano labi na sang napatay na ang mga apostoles ni Jesus.—Basaha ang Binuhatan 20:29, 30.

3. Ano ang pila ka tanda sang matuod nga relihion?

Ginakilala sang matuod nga mga sumilimba ang Biblia subong Pulong sang Dios. Ginatuman nila ang mga prinsipio sini. Gani wala ginabase sang matuod nga relihion ang ila panudlo sa ideya sang mga tawo. (Mateo 15:7-9) Ginakabuhi sang matuod nga mga sumilimba ang ila ginatudlo.—Basaha ang Juan 17:17; 2 Timoteo 3:16, 17.

Ginadayaw sang matuod nga relihion ang ngalan sang Dios, nga Jehova. Ginpakilala ni Jesus ang ngalan sang Dios. Ginbuligan niya ang mga tawo nga makilala ang Dios kag gintudluan sila nga mangamuyo nga pakabalaanon ang ngalan sang Dios. (Mateo 6:9) Ano nga relihion sa inyo lugar ang nagapakilala sa ngalan sang Dios?—Basaha ang Juan 17:26; Roma 10:13, 14.

 4. Paano mo makilala ang matuod nga mga sumilimba?

Ginawali sang matuod nga mga Cristiano ang Ginharian sang Dios. Ginpadala sang Dios si Jesus para iwali ang Ginharian. Ang Ginharian sang Dios amo lamang ang paglaum sang katawhan. Ginwali ini ni Jesus bisan dali na lang sia mapatay. (Lucas 4:43; 8:1; 23:42, 43) Ginsugo niya ang iya mga sumulunod nga iwali man ini. Kon may mag-istorya sa imo parte sa Ginharian sang Dios, ano ang iya relihion?—Basaha ang Mateo 10:7; 24:14.

Ang mga sumulunod ni Jesus indi bahin sining malaut nga kalibutan. Wala sila nagaentra sa pulitika ukon sa kinagamo sang mga tawo. (Juan 17:16) Wala man nila ginailog ang makahalalit nga mga buhat kag paggawi sining kalibutan.—Basaha ang Santiago 1:27; 4:4.

5. Ano ang panguna nga tanda sang matuod nga mga Cristiano?

Ang matuod nga mga Cristiano may gugma sa isa kag isa. Natun-an nila sa Biblia nga respetuhon ang tanan nga rasa. Indi pareho sa butig nga relihion, wala ginasuportahan sang matuod nga mga sumilimba ang inaway sang mga pungsod. (Miqueas 4:1-4) Ginagamit nila ang ila tion kag pagkabutang para buligan kag tudluan ang iban.—Basaha ang Juan 13:34, 35; 1 Juan 4:20, 21.

Bilang isa ka grupo, ginapakita sang mga Saksi ni Jehova nga ginabase nila sa Biblia ang ila mga panudlo, ginadayaw ang ngalan sang Dios, kag ginawali ang Iya Ginharian nga amo lamang ang paglaum sang katawhan. Nagapakita man sila sing gugma kag wala nagasuporta sa inaway.—1 Juan 3:10-12.

Para sa dugang nga impormasyon, basaha ang kapitulo 15 sini nga libro, Ano Gid ang Ginatudlo Sang Biblia?, nga ginhimo sang mga Saksi ni Jehova.

[Retrato sa pahina 16]

“Ginapahayag nila sing dayag nga nakilala nila ang Dios, apang ginapanghiwala nila sia paagi sa ila mga buhat.”—Tito 1:16