1, 2. (a) Ano nga importante nga asaynment ang nabaton ni Solomon? (b) Ano ang ginakabalak-an ni David parte kay Solomon?

GINSUGO si Solomon nga pangunahan ang isa sa pinakaimportante nga proyekto sa kasaysayan, ang pagpatindog sang templo sa Jerusalem. Ang templo dapat “matahom gid . . . , agod ang katahom sini mahibaluan kag mangin bantog ini sa tanan nga kadutaan.” Labaw sa tanan, ang templo mangin “balay ni Jehova nga matuod nga Dios.” Nagsiling si Jehova nga si Solomon ang magapanguna sa sini nga proyekto.—1 Cron. 22:1, 5, 9-11.

² May pagsalig si Hari David nga buligan sang Dios si Solomon, pero “bata pa kag wala pa sing eksperiensia” si Solomon. May kaisog bala sia nga pangunahan ang pagpatindog sang templo? Indi ayhan mabudlayan sia kay bata pa sia kag wala pa sing eksperiensia? Para mangin madinalag-on si Solomon, dapat magpakaisog sia kag sugdan ang proyekto.

3. Ano ang mahimo natun-an ni Solomon sa iya amay parte sa kaisog?

³ Mahimo gid nga madamo sing natun-an si Solomon sa iya amay parte sa kaisog. Sang pamatan-on pa si David, ginpatay niya ang mga sapat nga talunon nga nagtaban sang karnero sang iya amay. (1 Sam. 17:34, 35) Nagpakita man sia sing dalayawon nga kaisog  sang nagpakig-away sia sa higante nga beterano na sa inaway. Paagi sa bulig sang Dios kag sang mahining nga bato, napierde ni David si Goliat.—1 Sam. 17:45, 49, 50.

4. Ngaa dapat magpakaisog si Solomon?

⁴ Nagakaigo gid nga ginpalig-on ni David si Solomon nga magpakaisog kag patindugon ang templo! (Basaha ang 1 Cronica 28:20.) Kon indi magpakaisog si Solomon, mahimo nga indi gid niya masugdan ang proyekto, kag mas malain pa ini sangsa mapaslawan sia nga matapos ang templo.

5. Ngaa kinahanglan naton ang kaisog?

⁵ Pareho ni Solomon, kinahanglan naton ang bulig ni Jehova para mangin maisog kita kag matapos ang aton hilikuton. Gani binagbinagon naton ang pila ka halimbawa sang nagpakita sang kaisog sang una. Dayon pamalandungan naton kon paano naton mapakita ang kaisog kag mahimo naton ang aton hilikuton.

6. Ano ang masiling mo parte sa kaisog ni Jose?

⁶ Binagbinaga ang kaisog nga ginpakita ni Jose sang ginsulay sia sang asawa ni Potifar nga maghimo sang seksuwal nga imoralidad. Mahimo nga nahibaluan ni Jose nga mabutang sa katalagman ang iya kabuhi kon mangindi sia. Pero sa baylo nga magpadala sa pagsulay, nagpakita sia sang kaisog kag nagpalagyo sia dayon.—Gen. 39:10, 12.

7. Ilaragway ang kaisog nga ginpakita ni Rahab. (Tan-awa ang piktyur sa umpisa sini nga artikulo.)

⁷ Ang isa pa ka halimbawa sang kaisog amo si Rahab. Sang nagkadto sa iya balay sa Jerico ang mga espiya sang Israel, mahimo nga indi niya sila pagbuligan kon nagpadala sia sa kahadlok. Pero bangod nagsalig sia kay Jehova, maisog nga gintago niya ang duha ka lalaki kag ginbuligan niya sila nga makapalagyo. (Jos. 2:4, 5, 9, 12-16) Nagpati si Rahab nga si Jehova ang matuod nga Dios, kag nagsalig sia nga ihatag Niya ang ila duta sa mga Israelinhon. Wala sia nagpadala sa kahadlok sa iban, pati na sa hari sang Jerico kag sa iya mga tinawo. Sa baylo, nangin maisog sia gani naluwas sia kag ang iya pamilya.—Jos. 6:22, 23.

8. Paano nakabulig sa mga apostoles ang kaisog ni Jesus?

⁸ Ang matutom nga mga apostoles ni Jesus nagpakita sing maayo nga halimbawa sang kaisog. Nakita nila ang kaisog ni Jesus. (Mat. 8:28-32; Juan 2:13-17; 18:3-5) Kag nakabulig ini sa ila nga mangin maisog man. Sang ginpamatukan sila sang mga Saduceo, wala sila mag-untat sa pagpanudlo parte kay Jesus.—Binu. 5:17, 18, 27-29.

9. Suno sa 2 Timoteo 1:7, sin-o ang nagahatag sa aton sang kaisog?

⁹ Sanday Jose, Rahab, Jesus, kag ang mga apostoles nagpakita sing kaisog kag nagpahulag ini sa ila nga maghimo sing maayo. Maisog sila indi bangod sobra ang ila pagsalig sa kaugalingon, kundi nagsalig sila kay Jehova. May mga sitwasyon man nga kinahanglan naton ang kaisog. Sa baylo nga magsalig sa aton kaugalingon, dapat kita magsalig kay Jehova. (Basaha ang 2 Timoteo 1:7.) Binagbinagon naton ang duha ka bahin sang aton kabuhi nga kinahanglan ang kaisog: sa aton pamilya kag sa kongregasyon.

10. Ngaa kinahanglan sang mga pamatan-on nga Cristiano ang kaisog?

¹⁰ Madamo nga sitwasyon nga kinahanglan sang mga pamatan-on nga Cristiano ang kaisog nga alagaron si Jehova. Makatuon sila sa halimbawa ni Solomon kag mahimo nila sundon ang iya kaisog sa paghimo sing maayo nga mga desisyon para mahuman ang templo. Dapat sila buligan kag tuytuyan sang ila mga ginikanan, pero may importante nga mga desisyon nga sila mismo ang dapat maghimo. (Hulu. 27:11) Kinahanglan ang kaisog para makadesisyon sila sing maayo parte sa ila kaupdanan, kalingawan, moral nga katinlo, kag pagpabawtismo. Kinahanglan ini kay ginapamatukan nila si Satanas nga nagayaguta sa Dios.

11, 12. (a) Paano nangin maayo nga halimbawa si Moises sang kaisog? (b) Paano mailog sang mga pamatan-on si Moises?

 ¹¹ Ang isa ka importante nga desisyon nga dapat himuon sang mga pamatan-on amo ang parte sa ila mga tulumuron. Sa pila ka pungsod, ang mga pamatan-on ginapilit nga unahon ang pagkuha sing mas mataas nga edukasyon kag ang pagpangita sing trabaho nga daku ang sueldo. Sa iban nga pungsod nga indi maayo ang ekonomiya, nagabatyag ang mga pamatan-on nga ang panguna nila nga obligasyon amo ang pag-obra para buligan ang ila pamilya. Diin man sa sini ang imo sitwasyon, binagbinaga ang halimbawa ni Moises. Bangod ginpadaku sia sang anak nga babayi sang Paraon, puede kuntani nga himuon niya nga tulumuron ang mangin bantog ukon magmanggaranon. Hunahunaa kon paano sia ginapilit sang iya pamilya, mga manunudlo, kag mga manuglaygay nga mga Egiptohanon nga himuon ini! Sa baylo nga sundon sila, maisog nga nanindugan si Moises sa matuod nga pagsimba. Sang ginbiyaan ni Moises ang kamanggaran sang Egipto, maisog sia nga nagsalig kay Jehova. (Heb. 11:24-26) Gani ginpakamaayo sia ni Jehova, kag sigurado nga pakamaayuhon pa gid sia sa palaabuton.

¹² Kon maisog nga unahon sang mga pamatan-on ang espirituwal nga mga tulumuron kag ang intereses sang Ginharian, pakamaayuhon man sila ni Jehova. Buligan niya sila nga maaman ang mga kinahanglanon sang ila pamilya. Sang unang siglo, gin-una sang pamatan-on nga si Timoteo ang espirituwal nga mga tulumuron. Mahimo mo man ini. *—Basaha ang Filipos 2:19-22.

13. Paano nakabulig ang kaisog para malab-ot sang isa ka pamatan-on ang iya mga tulumuron?

¹³ Kinahanglan sang isa ka utod nga babayi sa Alabama, U.S.A., ang kaisog para maghimo sang espirituwal nga mga tulumuron. Nagsulat sia: “Halin sang gamay pa ako, tama gid sa akon ka mahuluy-on. Nabudlayan ako magbantala kay nahuya ako mag-istorya sa mga indi ko kilala, kay bisan gani sa Kingdom Hall, daw indi ako mag-istorya sa mga tawo.” Sa bulig sang iya mga ginikanan kag sang iban pa sa kongregasyon, nalab-ot sini nga pamatan-on ang iya tulumuron nga mangin regular payunir. Nagsiling sia: “Sa kalibutan ni Satanas, ang mas mataas nga edukasyon, kabantugan, kuarta, kag madamo nga pagkabutang amo ang ginatinguhaan. Sa masami, imposible ini nga matigayon. Sa baylo, nagaresulta lang ini sa stress kag kasakit. Pero indi gid matupungan ang akon kalipay sa pag-alagad kay Jehova kag nahibaluan ko nga amo ini ang pinakamaayo nga himuon.”

14. Ano ang pila ka sitwasyon nga kinahanglan sang mga ginikanan nga Cristiano ang kaisog?

¹⁴ Kinahanglan man sang mga ginikanan nga Cristiano ang kaisog. Halimbawa, mahimo nga pirme ka silingan sang imo amo nga dapat ka mag-obertaym kon gab-i kag Sabado kag Domingo, pero tion ini nga ginpain mo para sa pangpamilya nga pagsimba, pagbantala, kag Cristianong mga miting. Kinahanglan ang kaisog para mangindi kag mangin maayo nga halimbawa sa imo kabataan. Ukon basi ang pila ka ginikanan sa inyo kongregasyon nagapasugot sa ila kabataan nga mag-entra sa mga aktibidades nga indi mo gusto entrahan sang imo bata. Mahimo nga pamangkuton ka sini nga mga ginikanan kon ngaa wala mo ginapasugtan ang imo bata. Mangin maisog ka bala kag mataktikanhon sa pagpaathag sang imo rason?

15. Paano makabulig sa mga ginikanan ang Salmo 37:25 kag Hebreo 13:5?

¹⁵ Nagapakita kita sang kaisog kon ginabuligan naton ang aton kabataan nga unahon ang espirituwal nga mga tulumuron. Halimbawa, ang pila ka ginikanan mahimo nagapangalag-ag nga palig-unon ang ila bata nga magpayunir, mag-alagad sa lugar nga mas daku ang kinahanglanon, mag-alagad sa Bethel, ukon  magboluntaryo sa konstruksion. Mahimo nga nabalaka ang mga ginikanan nga indi sila maatipan sang ila bata kon magtigulang na sila. Pero, ang maalamon nga mga ginikanan nagapakita sang kaisog kag nagasalig sa mga saad ni Jehova. (Basaha ang Salmo 37:25; Hebreo 13:5.) Kon ang mga ginikanan nagapakita sang kaisog kag nagasalig kay Jehova, ginabuligan nila ang ila bata nga himuon man ini.—1 Sam. 1:27, 28; 2 Tim. 3:14, 15.

16. Paano ginbuligan sang pila ka ginikanan ang ila kabataan nga unahon ang espirituwal nga mga tulumuron, kag ano ang benepisyo sini?

¹⁶ Ginbuligan sang isa ka mag-asawa sa Estados Unidos ang ila kabataan nga unahon ang espirituwal nga mga tulumuron. Ang bana nagsiling: “Antes pa makahibalo maghambal kag maglakat ang amon kabataan, ginaistoryahan na namon sila parte sa amon kalipay sa pagpayunir kag pag-alagad sa kongregasyon. Subong, amo man sini ang ila tulumuron. Bangod gin-una sang amon kabataan ang espirituwal nga mga tulumuron, nabuligan sila sini nga madaug ang impluwensia sang sistema ni Satanas kag magpokus sa pag-alagad kay Jehova.” Ang isa ka utod nga may duha ka bata nagsulat: “Madamo nga ginikanan ang nagapanikasog gid kag nagagasto sing daku para malab-ot sang ila kabataan ang ila handum may kaangtanan sa sports, kalingawan, kag edukasyon. Mas daku ang benepisyo kon magpanikasog kita kag gamiton naton ang aton kuarta para buligan ang aton kabataan nga malab-ot ang mga tulumuron nga makabulig sa ila nga indi madula ang ila maayo nga kaangtanan kay Jehova. Nalipay gid kami nga nalab-ot sang amon kabataan ang ila espirituwal nga mga tulumuron kag kaupod nila kami samtang ginahimo nila ini.” Makasigurado ka nga pakamaayuhon sang Dios ang mga ginikanan nga nagabulig sa ila kabataan nga unahon ang espirituwal nga mga tulumuron.

17. Maghatag sing mga halimbawa sang kaisog sa Cristianong kongregasyon.

¹⁷ Kinahanglan man ang kaisog sa kongregasyon. Halimbawa, kinahanglan sang mga gulang ang kaisog kon nagaasikaso sa mga nakahimo sang serioso nga sala ukon nagabulig sa mga naospital nga delikado ang kabuhi. Ang pila ka gulang nagaduaw sa mga prisuhan para buligan ang mga priso sa ila espirituwal nga kinahanglanon. Kamusta naman ang mga utod nga dalaga? Madamo  subong sing kahigayunan nga mapasangkad nila ang ila ministeryo paagi sa pagpayunir, pagsaylo sa lugar nga mas daku ang kinahanglanon, pagboluntaryo sa mga proyekto sang Local Design/Construction, kag pag-aplay sa School for Kingdom Evangelizers. Ang iban gani nakaeskwela sa Gilead School.

18. Paano mapakita sang tigulang nga mga utod nga babayi ang kaisog?

¹⁸ Pagpakamaayo sa kongregasyon ang tigulang nga mga utod nga babayi. Palangga gid naton ini nga mga utod! Posible nga ang pila sa ila indi na pareho sang una ang mahimo sa pag-alagad sa Dios, pero mapakita nila gihapon ang kaisog kag may mabulig man sila. (Basaha ang Tito 2:3-5.) Halimbawa, kinahanglan sang tigulang nga utod nga babayi ang kaisog kon pangabayon sia nga istoryahon ang pamatan-on nga utod nga babayi parte sa maugdang nga pamayo. Indi niya pag-akigan ang pamatan-on, pero mahimo niya sia buligan nga binagbinagon kon paano ang iya pamayo makaapekto sa iban. (1 Tim. 2:9, 10) Ang gugma kag kabalaka sang mga tigulang may maayo nga epekto.

19. (a) Paano mangin maisog ang bawtismado nga mga utod nga lalaki? (b) Paano makabulig ang Filipos 2:13 kag 4:13 sa mga utod nga lalaki nga mangin maisog?

¹⁹ Ang bawtismado nga mga utod nga lalaki dapat man magpakaisog kag magbulig. Pagpakamaayo sa kongregasyon ang maisog nga mga lalaki nga handa magbaton sang dugang nga responsibilidad. (1 Tim. 3:1) Pero, ang iban nagapangalag-ag. Mahimo nga ang isa ka utod may nahimo nga sala sang una, kag nagabatyag sia nga indi sia takus mangin ministeryal nga alagad ukon gulang. Ukon mahimo nagabatyag ang isa nga indi niya masarangan ang asaynment. Kon amo sini ang imo ginabatyag, mabuligan ka ni Jehova nga magpakaisog. (Basaha ang Filipos 2:13; 4:13.) Dumduma nga nagbatyag sang una si Moises nga indi niya masarangan ang asaynment nga ginhatag sa iya. (Ex. 3:11) Pero ginbuligan sia ni Jehova, kag sang ulihi, nangin maisog si Moises sa pagtuman sang iya asaynment. Matigayon man sang bawtismado nga utod nga lalaki ini nga kaisog paagi sa hanuot nga pagpangamuyo sa Dios kag pagbasa sang Biblia adlaw-adlaw. Makabulig man ang pagpamalandong sa mga halimbawa sang nagpakita sang kaisog. Dapat mangin mapainubuson sia kag mahimo niya pangabayon ang mga gulang nga hanason sia, kag dapat handa sia pirme magbulig sa kongregasyon. Mga bawtismado nga utod nga lalaki, ginapalig-on namon kamo nga magpakaisog kag magbulig sa kongregasyon!

20, 21. (a) Ano ang ginpasalig ni David kay Solomon? (b) Sa ano kita makasalig?

²⁰ Ginpahanumdom ni Hari David si Solomon nga mangin kaupod niya si Jehova tubtob mahuman ang templo. (1 Cron. 28:20) Nagtudok sa hunahuna kag tagipusuon ni Solomon ang ginsiling sang iya amay, gani bisan bata pa sia kag wala pa sing eksperiensia, wala ini nakaupang sa iya. Nagpakita sia sing dalayawon nga kaisog kag ginsugdan ang proyekto. Sa bulig ni Jehova, natapos niya ang matahom gid nga templo sa sulod sang pito ka tuig kag tunga.

²¹ Pareho sang ginhimo ni Jehova kay Solomon, buligan man niya kita nga magpakaisog kag mahimo ang aton hilikuton sa aton pamilya kag sa kongregasyon. (Isa. 41:10, 13) Kon nagapakita kita sang kaisog sa aton pagsimba kay Jehova, makasalig kita sa iya pagpakamaayo subong kag sa palaabuton. Gani, “magpakaisog . . . kag himua” ang imo hilikuton.