TULUN-AN NGA ARTIKULO 52
Kon Paano Mo Madaug ang Pagluya sang Buot
“Itugyan ang imo lulan kay Jehova, kag sia magaalay-ay sa imo.”—SAL. 55:22.
AMBAHANON 33 Itugyan ang Imo Lulan kay Jehova
ANG BINAGBINAGON SA SINI NGA ARTIKULO *
1. Kon nagaluya ang aton buot, ano ang mahimo nga epekto sini sa aton?
KADA adlaw, may mga problema kita nga ginabatas. Pero mabudlay batason ang mga problema kon nagaluya ang aton buot. Ngaa? Bangod mahimo kita magbatyag nga wala kita sing pulos kag masubuan kita kon nagaluya ang aton buot. Ang Hulubaton 24:10 kag ang footnote sini nagasiling: “Kon maluya ang imo buot sa tion sang kabudlayan, magaluya man ang imo kusog.” Gani kon nagaluya ang aton buot, nagabatyag man kita nga daw wala na kita sang kusog para batason ang mga problema.
2. Ano ang posible nga mga rason sang pagluya sang aton buot, kag ano ang binagbinagon naton sa sini nga artikulo?
2 Madamo ang posible nga rason sang pagluya sang aton buot. Mahimo magluya ang aton buot kon makasala kita, may kaluyahon kita nga ginapakigbatuan, ukon may balatian kita. Mahimo man magluya ang aton buot kon wala ginhatag sa aton ang pribilehiyo sa pag-alagad nga gusto naton ukon indi interesado sa maayong balita ang kalabanan nga tawo sa aton teritoryo. Binagbinagon naton sa sini nga artikulo ang mga puede naton himuon kon nagaluya ang aton buot.
KON MAKASALA KITA KAG MAY KALUYAHON NGA GINAPAKIGBATUAN
3. Ano ang makabulig sa aton kon ginabasol naton ang aton kaugalingon bangod sang aton mga sala?
3 Mahimo basulon naton ang aton kaugalingon kon makasala kita ukon nadaug kita sang aton kaluyahon. Mahimo pa gani naton pamensaron nga indi kita pagpaistaron ni Jehova sa Paraiso bangod sang aton mga sala. Indi gid maayo ini nga panghunahuna. Ano ang dapat naton hunahunaon kon makasala kita? Ang Biblia nagasiling nga ang tanan nga tawo “nakasala,” magluwas lang kay Jesucristo. (Roma 3:23) Pero wala nagapokus si Jehova sa aton mga sala kag wala niya ginahunahuna nga indi gid kita makahimo sang sala. Sa baylo, isa sia ka mahigugmaon nga Amay nga gusto gid magbulig sa aton. Mapinasensiahon man sia. Kabalo sia nga nabudlayan kita sa aton mga kaluyahon kag ginabasol naton ang aton kaugalingon kon makasala kita, gani gusto niya kita buligan.—Roma 7:18, 19.
Kabalo si Jehova sang mga maayo nga ginhimo naton sang una kag sang mga maayo nga ginahimo naton subong (Tan-awa ang parapo 5) *
4-5. Ano ang ginasiling sang 1 Juan 3:19, 20, nga nakabulig sa duha ka sister nga madaug ang pagluya sang buot?
4 Binagbinaga ang eksperiensia ni Deborah kag ni Maria. * Sang bata pa si Deborah, pirme sia ginapakanubo sang iban. Talagsa lang sia ginadayaw ukon ginapasalamatan. Gani nagbatyag sia nga wala sia sing pulos. Kag kon makahimo sia sang bisan gamay lang nga sala, nagabatyag sia nga wala gid sia sing nahimo nga maayo. Amo man sini ang nabatyagan ni Maria. Ginapakanubo sia sang iya mga paryente, gani pirme sia nagabatyag nga wala sia sing pulos. Bisan pa sang nabawtismuhan na sia, nagbatyag sia nga indi sia bagay mangin isa ka Saksi ni Jehova.
5 Pero, wala nag-untat sa pag-alagad kay Jehova ining duha ka sister. Ano ang nakabulig sa ila? Hanuot sila nga nangamuyo kay Jehova kag gintugyan nila sa iya ang tanan nila nga ginabatyag. (Sal. 55:22) Narealisar nila nga nahangpan kita sang aton mahigugmaon nga Amay. Kabalo sia nga mahimo basulon naton ang aton kaugalingon bangod sang aton indi maayo nga mga naeksperiensiahan. Pero makita man niya ang aton maayo nga mga kinaiya, bisan pa pamatyag naton wala sa aton ini nga mga kinaiya.—Basaha ang 1 Juan 3:19, 20.
6. Kon gin-untatan na sang isa ka tawo ang ginahimo niya nga malain, ano ang posible nga mabatyagan niya kon nahimo niya ini liwat?
6 Kon ginatinguhaan gid sang isa ka tawo nga untatan ang ginahimo niya nga malain, posible magluya ang iya buot kon nahimo niya ini liwat. Normal lang nga makonsiensia kita kon nakasala kita. (2 Cor. 7:10) Pero indi naton dapat pagbasulon ang aton kaugalingon, kag indi naton dapat paghunahunaon nga wala kita sing pulos kag indi gid kita mapatawad ni Jehova. Indi ini matuod. Indi ini maayo nga panghunahuna kay posible kita sini pauntaton sa aton pag-alagad kay Jehova. Suno sa ginbasa naton sa Hulubaton 24:10, magaluya ang aton kusog kon maluya ang aton buot. Gani, mangamuyo kay Jehova nga patawaron ka kag ‘buligan ka nga matadlong ang imo kaangtanan sa iya.’ (Isa. 1:18) Kon sinsero gid ang imo paghinulsol, patawaron ka niya. Dayon, magpabulig sa mga gulang. Mapinasensiahon sila nga magabulig sa imo para mangin maayo liwat ang imo kaangtanan kay Jehova.—Sant. 5:14, 15.
7. Ngaa indi kita dapat maluyahan sing buot kon nabudlayan kita nga himuon ang husto?
7 Amo ini ang ginasiling ni Jean-Luc, nga isa ka gulang sa France, sa mga nagapakigbato sa ila mga kaluyahon: “Para kay Jehova, ang matarong nga tawo amo ang isa nga nagahinulsol sa iya nahimo nga mga sala kag nagatinguha gid nga magbag-o, indi ang isa nga wala nagahimo sang sala.” (Roma 7:21-25) Gani indi paghunahunaa nga wala ka sing pulos kon nabudlayan ka nga pakigbatuan ang imo mga kaluyahon. Tandai nga tanan kita makahimo gid sang sala, gani kinahanglan naton ang wala tupong nga kaayo sang Dios. Ginapakita ini sa aton sang Dios paagi sa gawad.—Efe. 1:7; 1 Juan 4:10.
8. Kon nagaluya ang aton buot, kay sin-o kita makapangayo sang bulig?
8 Palig-unon kita sang aton mga kauturan sa kongregasyon! Handa sila nga mamati kon gusto naton mag-istorya kag mapalig-on nila kita. (Hulu. 12:25; 1 Tes. 5:14) Si Joy, nga isa ka sister sa Nigeria nga nagluya ang buot, nagsiling: “Indi ko gid ini masarangan kon wala ako ginpalig-on sang mga kauturan. Pamatuod sila nga ginasabat ni Jehova ang akon mga pangamuyo. Nakatuon pa gani ako sa ila kon paano palig-unon ang mga nasubuan.” Pero dapat naton tandaan nga indi sa tanan nga tion nabal-an sang aton mga kauturan nga kinahanglan naton ang pagpalig-on. Gani may tion nga dapat kita mismo ang mag-istorya sa hamtong nga utod kag sugiran naton sia nga kinahanglan naton ang bulig.
KON MAY BALATIAN KITA
9. Ngaa makapalig-on gid sa aton ang Salmo 41:3 kag 94:19?
9 Magpabulig kay Jehova. Kon indi maayo ang aton pamatyag, mahimo mabudlayan kita nga maghunahuna sing maayo, ilabi na kon madugay na kita nga nagabalatian. Wala na subong nagamilagro si Jehova para ayuhon kita, pero ginapaumpawan niya kita kag ginapabakod para makabatas kita. (Basaha ang Salmo 41:3; 94:19.) Halimbawa, mahimo niya palig-unon ang aton mga kauturan nga buligan kita sa aton mga ulubrahon sa balay ukon may kinahanglan kita nga baklon. Mahimo niya palig-unon ang aton mga kauturan nga magpangamuyo upod sa aton. Ukon mahimo niya ipahanumdom sa aton ang makapaumpaw niya nga mga ginsiling sa iya Pulong, pareho sang ginpromisa niya nga indi na kita magbalatian sa bag-ong kalibutan kay mangin perpekto na kita.—Roma 15:4.
10. Ano ang nakabulig kay Isang para madaug niya ang pagluya sang buot sang naaksidente sia?
10 Sang naaksidente si Isang, nga isa ka brother sa Nigeria, na-paralyze sia. Ginsilingan sia sang doktor nga indi na gid sia makalakat liwat. “Grabe gid ang akon kasubo,” siling ni Isang. Pero nadaug niya ang pagluya sang iya buot. Ano ang nakabulig sa iya? Nagsiling sia: “Upod sa akon asawa, pirme kami nagapangamuyo kay Jehova kag nagatuon sang iya Pulong. Nagpokus kami sa mga pagpakamaayo, lakip ang paglaum nga mabuhi sing wala sing katapusan sa bag-ong kalibutan sang Dios.”
Makabantala gihapon ang mga maluya na kag mangin malipayon gid sila (Tan-awa ang parapo 11-13)
11. Ano ang ginhimo ni Cindy para mangin malipayon sia bisan pa may malala sia nga balatian?
11 Si Cindy, nga taga-Mexico, may malala nga balatian nga puede niya ikamatay. Ano ang nakabulig sa iya para mabatas niya ini? Sang nagapabulong sia, ginatinguhaan niya nga makapanaksi kada adlaw. Nagsulat sia: “Nakabulig ini sa akon nga magpokus sa iban imbes nga sa akon operasyon, sa sakit nga akon ginabatyag, ukon sa akon sitwasyon. Amo ini ang ginahimo ko: Kon nagaistorya ako sa doktor ukon sa nars, ginapamangkot ko sila parte sa ila pamilya. Dayon ginapamangkot ko sila kon ngaa ginpili nila ining mabudlay nga trabaho. Paagi sa sini, mabal-an ko kon ano nga topiko ang mahimo gusto nila nga istoryahan. Ang pila nagsiling nga talagsa lang gid nagakatabo nga may pasyente nga mamangkot sa ila kon kamusta sila. Madamo ang nagapasalamat kay nagaulikid ako sa ila. Ang pila sa ila naghatag sang ila adres ukon numero sang telepono. Gani sa pinakamabudlay nga tion sang akon kabuhi, ginbuligan ako ni Jehova nga mangin malipayon. Wala ko gid mahunahuna nga mabatyagan ko ini nga kalipay.”—Hulu. 15:15.
12-13. Ano ang ginhimo sang iban nga may balatian ukon maluya na para makabantala sila, kag ano ang resulta?
12 Posible magluya ang buot sang mga may balatian ukon sang mga maluya na bangod limitado na lang ang ila mahimo sa pagbantala. Pero, madamo sa ila ang may makapalig-on nga mga eksperiensia. Sa United States, may isa ka sister nga si Laurel nga 37 ka tuig nga ara sa sulod sang iron lung, ukon isa ka makina nga nagabulig sa iya nga makaginhawa. May kanser man sia, may sakit sia sa panit nga wala nagaayo, kag madamo nga beses sia nga gin-operahan. Bisan pa sa sining mabudlay gid nga sitwasyon, padayon sia nga nagbantala. Ginpanaksihan niya ang mga nars kag ang mga nagaatipan sa iya nga nagakadto sa iya balay. Ano ang resulta? Indi magnubo sa 17 ka tawo ang nabuligan niya nga makatuon parte kay Jehova! *
13 Si Richard, nga isa ka gulang sa France, may panugda para sa mga utod nga indi na makahalin sa ila balay ukon ara sa nursing home. “Ginapanugda ko nga mag-displey sila sang pila naton ka publikasyon. Kon makita ini sang mga nagalabay, mahimo mamangkot sila parte sa sini kag mabantalaan sila. Makapalig-on gid ini sa aton mga utod nga indi na makaupod sa pagpamalaybalay.” Mahimo man makabantala ang mga indi na makahalin sa ila balay paagi sa paghimo sang sulat kag pagpanaksi sa telepono.
KON WALA GINHATAG SA ATON ANG PRIBILEHIYO NGA GUSTO NATON
14. Ano ang ginhimo ni Hari David nga maayo gid nga halimbawa?
14 Mahimo nga indi pag-ihatag sa aton ang pribilehiyo nga gusto naton sa pag-alagad kay Jehova bangod sang pila ka rason. Halimbawa, mahimo may edad na kita, may problema kita sa panglawas, ukon may iban pa nga rason. Makatuon kita kay Hari David. Gusto gid ni David nga sia ang magpatindog sang templo sang Dios. Pero sang ginsilingan sia nga indi sia ang ginpili nga magpatindog sini, ginsuportahan niya ang ginpili sang Dios. Naghatag pa gani si David sing madamo nga bulawan kag pilak para sa proyekto. Maayo gid nga halimbawa si David para sa aton!—2 Sam. 7:12, 13; 1 Cron. 29:1, 3-5.
15. Paano nadaug ni Hugues ang pagluya sang buot?
15 Si Hugues, nga taga-France, nag-untat sa pag-alagad bilang isa ka gulang bangod sang iya problema sa panglawas. Nabudlayan sia nga himuon bisan ang mahapos lang nga mga ulubrahon sa balay. Nagsulat sia: “Sang primero, nagbatyag ako nga wala ako sing pulos kag grabe gid ang pagluya sang akon buot. Pero sang ulihi, narealisar ko nga indi ako dapat magpokus sa mga hilikuton nga indi ko na masarangan nga himuon. Bangod sini, nangin malipayon ako sa paghimo sang akon masarangan sa pag-alagad kay Jehova. Padayon ako nga magabatas. Pareho kay Gideon kag sa iya 300 ka tinawo nga padayon nga nagpakig-away bisan pa kapoy na sila, padayon man ako nga magaalagad.”—Huk. 8:4.
16. Ano ang matun-an naton sa halimbawa sang mga anghel?
16 Maayo gid nga halimbawa ang matutom nga mga anghel. Sa tion sang paggahom ni Hari Ahab, ginpamangkot ni Jehova ang mga anghel kon ano ang ila mapanugda nga paagi para hayluhon ang malain nga hari. Madamo nga anghel ang naghatag sang ila mga panugda. Dayon ginpili sang Dios ang panugda sang isa ka anghel kag ginsilingan sia nga magamadinalag-on ini. (1 Hari 22:19-22) Nagluya bala ang buot sang iban pa nga matutom nga mga anghel? Ginhunahuna bala nila nga kanugon lang sang ila tion sa pagpamensar sang ila ginpanugda? Wala. Mapainubuson gid ang mga anghel kag gusto nila nga si Jehova lang ang padunggan.—Huk. 13:16-18; Bug. 19:10.
17. Ano ang dapat naton himuon kon nasubuan kita bangod wala ginhatag sa aton ang pribilehiyo nga gusto naton?
17 Tandai nga pribilehiyo naton nga tawgon nga mga Saksi ni Jehova kag ibantala ang Ginharian sang Dios. May tion nga mahimo hatagan kita sang pribilehiyo kag may tion man nga mahimo kuhaon sa aton ang aton pribilehiyo. Pero indi ang aton mga pribilehiyo ang ginabasihan sang Dios para mangin hamili kita sa iya. Kon mapainubuson kita, mangin hamili gid kita kay Jehova kag sa aton mga kauturan. Gani mangamuyo kay Jehova nga buligan ka nga mangin mapainubuson pirme. Pamalandungi ang madamo nga halimbawa sang mapainubuson nga mga alagad ni Jehova nga mabasa sa Biblia. Kag mangin handa sa pag-alagad sa imo mga kauturan sa bug-os mo nga masarangan.—Sal. 138:6; 1 Ped. 5:5.
KON INDI INTERESADO SA MAAYONG BALITA ANG MGA TAWO
18-19. Kon indi interesado sa maayong balita ang mga tawo sa inyo teritoryo, ano ang puede mo himuon para mangin malipayon ka sa pagbantala?
18 Nagaluya bala ang buot mo kon kaisa bangod indi interesado sa maayong balita ang mga tawo sa inyo teritoryo ukon wala ka sing maabtan nga tawo sa kalabanan nga balay? Ano ang puede mo himuon para mangin malipayon ka gihapon ukon mangin mas malipayon pa gid? May pila ka panugda sa kahon nga “ Ang mga Puede Mo Himuon Para Mangin Mas Malipayon Ka Pa Gid sa Imo Pagbantala.” Importante man ang husto nga pagtamod sa pagbantala. Ano ang buot silingon sini?
19 Tandai nga ang panguna nga rason kon ngaa nagabantala kita amo ang pagpakilala sa mga tawo sang ngalan sang Dios kag pagsugid sa ila sang parte sa iya Ginharian. Maathag nga ginsiling ni Jesus nga pila lamang ang magasunod sa iya. (Mat. 7:13, 14) Kon nagabantala kita, kaupod naton si Jehova, si Jesus, kag ang mga anghel. Isa gid ini ka kadungganan. (Mat. 28:19, 20; 1 Cor. 3:9; Bug. 14:6, 7) Tandaan man naton nga ginabuyok ni Jehova ang mga tawo nga gusto mag-alagad sa iya. (Juan 6:44) Gani bisan pa indi interesado mamati ang aton ginabantalaan, may posibilidad nga mamati na sia sa sunod naton nga pag-istorya sa iya.
20. Ano ang ginatudlo sa aton sang Jeremias 20:8, 9 parte sa pagdaug naton sa pagluya sang buot?
20 Madamo kita sing matun-an kay manalagna Jeremias. Mabudlay gid ang teritoryo nga gin-asayn sa iya. Gin-insulto sia kag ginyaguta sang mga tawo “sa bug-os nga adlaw.” (Basaha ang Jeremias 20:8, 9.) Isa ka bes, nagluya gid ang iya buot kag gusto na niya mag-untat sa pagbantala. Pero wala sia mag-untat. Ngaa? Ang “pulong ni Jehova” nangin pareho sang kalayo sa iya tagipusuon, kag indi niya ini mapunggan. Mangin pareho man kita sa iya kon tun-an naton kag pamalandungan ang Biblia kada adlaw. Gani mangin mas malipayon pa gid kita sa aton pagbantala, kag mahimo nga mas madamo nga tawo ang mamati sa aton.—Jer. 15:16.
21. Ano ang himuon naton para madaug naton ang pagluya sang buot?
21 “Ang pagluya sang buot ang isa sa mga ginagamit ni Satanas para pauntaton kita sa pag-alagad,” siling ni Deborah nga ginsambit kaina. Pero mas gamhanan si Jehova kay Satanas bisan ano pa ang iya himuon. Gani kon nagaluya ang imo buot, mangamuyo kay Jehova. Buligan ka niya para indi mo pagbasulon ang imo kaugalingon kon makasala ka, kag para madaug mo ang imo mga kaluyahon. Buligan ka niya nga makabatas kon may balatian ka. Buligan ka niya nga mangin husto ang imo pagtamod sa mga pribilehiyo. Kag buligan ka niya nga mangin malipayon sa imo pagbantala. Ipabutyag sa imo Amay sa langit ang tanan mo nga kabalaka, kag buligan ka niya para madaug mo ang pagluya sang buot.
AMBAHANON 41 Palihug Pamatii ang Akon Pangamuyo
^ par. 5 May mga tion nga nagaluya ang aton buot. Binagbinagon naton sa sini nga artikulo kon ano ang mga puede naton himuon kon matabo ini. Matun-an naton nga madaug naton ang pagluya sang buot kay buligan kita ni Jehova.
^ par. 4 Gin-islan ang pila ka ngalan.
^ par. 12 Basaha ang sugilanon sang kabuhi ni Laurel Nisbet sa Enero 22, 1993, nga Awake!
^ par. 69 MGA PIKTYUR: Sang nagluya ang buot sang isa ka sister, gindumdom niya ang mga ginhimo niya sang una sa iya pag-alagad, kag nangamuyo sia kay Jehova. Sigurado sia nga dumdumon ni Jehova ang iya mga ginhimo sang una kag ang iya mga ginahimo subong.
