Joshua 9:1-27
9 Jordan nitlaklei tlangram ah a ummi, Shefelah ah a ummi, Rilipi* kam ah a ummi le Lebanon Tlang a hmailei ah a ummi siangpahrang vialte nih mah thawngpang kha an theih. Annih cu Hit mi, Amor mi, Kanaan mi, Periz mi, Hiv mi le Jebus mi siangpahrang an si i,
2 Joshua le Israel mi doh awkah an ṭangṭi.
3 Joshua nih Jeriko khua le Ai khua a teinak kong kha Gibeon mi hna zong nih an theih.
4 Cucaah fimkhur tein thil an tuah. Riahcaw kha a ṭet cangmi sawngkhoi le a kek i belh chommi saphawcua hlun chung ah an rawn i an laa kha an phorhter hna.
5 A ṭet i a hlunmi phanah an i danh i a tlekmi thil kha an i hruk. An i kenmi changreu cu a car i a maan dih.
6 Annih cu Gilgal i riahhmun ah an ra i Joshua le Israel mi kha “Kannih cu lamhlapi in a rami kan si. Zaangfahnak in kanmah he biakamnak ser u” tiah an ti hna.
7 Asinain Israel mi nih Hiv mi hna cu “Kan pawngkam ah a ummi zong nan si kho ko. Zeitindah nanmah he biakamnak cu kan ser khawh lai?” tiah an ti hna.
8 Annih nih Joshua cu “Kannih cu na sal kan si ko” tiah an ti.
Mah tikah Joshua nih “Ahote dah nan si? Khoika in dah nan rat?” tiah a hal hna.
9 Hitin an leh: “Nan Pathian Jehovah min ruang ah lamhlapi in na salle hi kan ra. Zeicahtiah a minthannak kong, Izipt ram ah a tuahmi thil vialte kong le,
10 Jordan khattalei ral* i Amor siangpahrang pahnih Heshbon siangpahrang Sihon le Ashtaroth ah a ummi Bashan siangpahrang Og a hrawh hnanak kong kha kan theih.
11 Cucaah upa pawl le khuami pawl nih ‘Nan khuallam caah riahcaw i phorh u law va tong hna u. Cun “Kannih cu nan sal kan si lai; zaangfahnak in kanmah he biakamnak ser u” tiin nan va ti hna lai’ tiah an kan fial.
12 Inn in kan rak i thawh lioah cun kan i phorhmi changreu hi a lumte an si rih. Atu cu zoh hmanh u, an car i an maan dih cang.
13 Hi saphawcua hna hi kan rawn lioah cun a tharte an si, atu cu an kek dih cang. Kan thilpuan le kan phanah zong kan khuallam a sau tuk caah an ṭet dih cang.”
14 Israel mi nih an riahcaw tlawmpal kha an lak i an zohpiak hna. Asinain Jehovah tu cu zeihmanh an hal lo.
15 Joshua nih anmah he daihnak a ser i kaan that hna lai lo tiah biakamnak a ser. Hruaitu hna zong nih cutin chiatserh in bia an kamh ve hna.
16 Anmah he biakamnak an ser in nithum hnuah annih cu an pawngkam lamnaihte ah a ummi an si ti kha an theih.
17 Israel mi cu an i thawh i a nithumnak ni ah an khua cu an va phan. An khua cu Gibeon, Khefirah, Be-eroth le Kiriath-jearim an si.
18 Hruaitu hna nih Israel Pathian Jehovah min in chiatserh in bia an rak kamh cang hna caah anmah kha an do hna lo. Cucaah Israel mi nih hruaitu hna kha an phunzai hnawh hna.
19 Hruaitu vialte nih mibu kha hitin an ti hna: “Israel Pathian Jehovah min in chiatserh in bia kan kamh cang hna caah harnak kan pek hna awk a si ti lo.
20 Chiatserh in bia kan kamh cang hna caah an nunnak kan zuah hna a hau. Cuticun Pathian thinhunnak cu kan cung ah a tlung lai lo.”
21 Gibeon mi pawl bia an rak kamh hna bantuk in hitin an ti chap: “An nunnak cu kan zuah hna lai nain mibu caah thing hlamtu le ti thantu an si lai.”
22 Joshua nih Gibeon mi kha a auh hna i hitin a ti hna: “Lamnaihte ah a ummi nan si ko nain ‘Lamhlapi in kan ra’ tiah zeicah nan kan hlen?
23 Nannih cu chiatserh nan si cang. Atu thawk in sal nan si zungzal lai i ka Pathian inn caah thing hlamtu le ti thantu nan si lai.”
24 Annih nih Joshua kha hitin an ti: “Hi ram vialte hi nanmah pek awk le hi rammi vialte hi nan hmai in hloh dih awkah nan Pathian Jehovah nih a sal Moses nawl a rak peknak kong kha na salle hi fiang tein an kan chimh. Cucaah kan nunnak kong ah kan thin a phang i hitihin kan tuahmi a si.
25 Na kut chung ah kan um ko. A ṭha, a dik na ti ning paoh in tuah ko.”
26 Joshua nih cuticun a tuah; Israel mi hna kut in a khamh hna i an that hna lo.
27 Asinain Joshua nih cu ni thawk in mibu ca le Pathian thimmi hmun ah chiahmi Jehovah biakṭheng caah thing hlamtu le ti thantu ah a ser hna. Nihin ni tiang mah rian kha an ṭuan.
