Joshua 8:1-35
8 Jehovah nih Joshua cu hitin a ti: “Ṭih le phang in um hlah. Ralkap vialte kha i kalpi hna law Ai khua cu va do u. Ai siangpahrang, a mi pawl, a khua le a ram cu kaan pek cang.
2 Jeriko le a siangpahrang bantuk in Ai khua le a siangpahrang cu na hrawh dih ve lai. Asinain hranchaw le saṭil pawl cu nanmah caah nan i lak khawh. Khua kha a hnulei in a thli tein bawh awkah ralkap na chiah hna lai.”
3 Joshua le ralkap vialte cu Ai khua doh awkah an i thawh. Joshua nih a ṭhawngmi ralkap 30,000 kha a thim hna i zan ah a thlah hna.
4 Cun hitin nawl a pek hna: “Khua kha a hnulei in nan bawh lai. Khua in aa hlat tuknak ah um hlah u, nan dihlak in timhcia tein um u.
5 Keimah le ka sin i a ummi vialte nih khua cu kan va naih lai. A hlan bantuk in kanmah doh awkah an rak chuah tikah kan zamtak hna lai.
6 Mah tikah ‘A hlan bantuk in an zam ṭhan cang’ tiah an ti lai i kan hnu in an rak kan dawi lai. An hmai in kan zam lai i khua in a hlatnak tiang kan i dawiter hna lai.
7 Mah tikah nan bawh hnanak hmun khan nan chuak lai i khua cu nan lak lai. Jehovah nan Pathian nih nan kut ah aan pek hna lai.
8 Khua kha nan lakle cangka mei in nan khangh lai. Jehovah bia ning in nan tuah lai. Mah hi nawl kaan pekmi hna cu a si.”
9 Joshua nih a thlah hna i ralkap pawl cu bawh an i timhnak hmun ah an kal. Cu hmun cu Ai khua nitlaklei, Bethel le Ai khua karlak ah a si. Cu zan ah Joshua cu a taangmi ralkap pawl he an riak.
10 A thaizing ah Joshua cu zingka tein a tho i ralkap pawl kha a pumh hna. Amah le Israel upa hna nih ralkap kha Ai khualei ah an hruai hna.
11 A sin i a ummi ralkap vialte cu Ai khualei ah an i thawh i khua chaklei ah riahhmun an khuar. Anmah le Ai khua cu horkuang lawng nih a dan hna.
12 Mah lioah ralkap 5,000 hrawng cu Joshua nawl pekmi ning in Ai khua nitlaklei, Bethel le Ai karlak ah khua kha doh awkah timhcia tein an bawh.
13 Ralkap tam deuh cu khua chaklei ah riahhmun an khuar i a bawhtu ralkap hna cu khua nitlaklei ah an um. Mah zan ah Joshua cu horkuang ah a va ṭum.
14 Mah kha Ai siangpahrang nih a hmuhle cangka khuami pawl he Israel mi doh awkah ramcar a langhnak hmun ah zingka tein an ra zokzok. Asinain khua hnulei ah a bawhtu ralkap an um ti kha a hngal lo.
15 Ai khuami nih an rak doh hna tikah Joshua le Israel mi cu ramcar lei ah a kalmi lam ning in an tli.
16 Khuami vialte cu anmah dawi awkah fial an si. Cucaah Joshua cu an dawi thluahmah i khua in aa hlatnak ah an phan.
17 Ai khua le Bethel khua i pa vialte nih Israel mi cu an dawi hna i khua hauka kha khar loin an kaltak.
18 Jehovah nih Joshua cu “Naa putmi fei kha Ai khualei ah hler tuah. Cu khua cu na kut ah kaan pek lai” tiah a ti. Cucaah Joshua nih aa putmi fei kha khualei ah cun a hler.
19 A kut a hler tikah a bawhtu ralkap pawl cu khulrang in an chuak i khua chung ah an lut, khua kha an lak i mei in an khangh colh.
20 Ai mi pawl cu an hnulei an hei zoh tikah an khua in meikhu a kaimi kha an hmuh. Cucaah an lau tuk i tliknak an thei ti lo. Ramcar lei ah a tlimi Israel mi cu a dawitu hna lei ah an rak kir ṭhan.
21 A bawhtu ralkap hna nih khua an lak cang i khua in meikhu a kaimi kha Joshua le Israel mi nih an hmuh tikah an rak kir ṭhan i Ai mi kha an doh hna.
22 Khua a latu ralkap pawl cu Ai mi doh awkah khua chung cun an hung chuak. Mah tikah Ai mi cu Israel ralkap phuhnih karah an taap. Israel mi nih an thah hna i a nungmi, a luatmi pakhat hmanh an um lo.
23 Asinain Ai siangpahrang tu cu a nung in an tlaih i Joshua sinah an ratpi.
24 Israel mi nih a rak dawitu Ai mi pawl kha ramcar ah pakhat hmanh taang loin vainam in an thah dih hna hnuah khua chung ah an kir i a taangmi kha an thah hna.
25 Mah ni ah Ai mi dihlak, nu he, pa he a thimi cu 12,000 an si.
26 Ai mi pawl thah an si dih hlan tiang* Joshua nih fei aa putnak a kut cu a chia lo.
27 Jehovah nih Joshua nawl a pek bantuk in Israel mi nih saṭil le hranchaw cu an i lak hna.
28 Joshua nih Ai khua kha mei in a khangh i a rawkmi thilpon ah a ser. Mah cu nihin ni tiang a um rih.
29 Joshua nih Ai siangpahrang cu a thah i zanlei tiang tung cung ah a thlai. Nitlak lai ah a ruak cu a ṭhumhter hna, khua hauka ah an hlonh i a cung ah lungpon nganpi an pon. Cu lungpon cu nihin ni tiang a um rih.
30 Cun Joshua nih Israel Pathian Jehovah caah Ebal Tlang ah biakṭheng pakhat a ser.
31 Jehovah sal Moses nih Israel mi nawl a pek hna bantuk in le Moses Nawlbia cauk ah aa ṭial bantuk in “Thir in remh lomi lung kha hmang in biakṭheng” a ser. Cuka ah Jehovah caah khangh thawinak le hawikomhnak thawinak kha a pek.
32 Cun Israel mi hna hmaiah Moses nih a rak ṭialmi Nawlbia kha Joshua nih lung cung ah a ṭial ṭhan.
33 Israel mi vialte, upa hna, haotu hna le biaceihtu hna cu Jehovah biakamnak kuang a putu Levi mi tlangbawi hna lei hoih in biakamnak kuang i khattalei veve ah an dir. Cuka ah Israel mi lawng si loin ramdang mi zong an dir ve. Israel mi cu thluachuah pek an si nakhnga (Jehovah sal Moses nih nawl a rak pek hna bantuk in) Gerizim Tlang hmaiah a cheu, Ebal Tlang hmaiah a cheu tiin an dir.
34 Cu hnuah Joshua nih Nawlbia cauk ah aa ṭialmi ning in thluachuahnak siseh, chiatserhnak siseh Nawlbia vialte kha thangpi in a relpiak hna.
35 Nu, ngakchia le an sinah a ummi ramdang mi hna i telin Israel mibu hmaiah Joshua nih Moses nawlbia vialte kha pakhat hmanh taang loin aw thangpi in a relpiak hna.
Footnotes
^ Asiloah “hrawh cikcek an si hlan tiang.”
