Joshua 24:1-33

  • Joshua nih Israel miphun tuanbia a chim ṭhan (1-13)

  • Jehovah biak awkah forhfialnak (14-24)

    • “Kei le ka innchungkhar tu nih cun Jehovah kha kan biak lai” (15)

  • Joshua nih Israel mi he biakamnak a ser (25-28)

  • Joshua thihnak le vuinak (29-31)

  • Josef ruh kha Shekhem ah an vui (32)

  • Eleazar thihnak le vuinak (33)

24  Joshua nih Israel miphun vialte kha Shekhem ah a pumh hna. Israel upa hna, hruaitu hna, biaceihtu hna le haotu hna kha a auh hna tikah annih cu a hmaanmi Pathian hmaiah an rak dir. 2  Joshua nih mi vialte kha hitin a ti hna: “Israel Pathian Jehovah nih hitin a ti: ‘Hlanliopi ah Abraham le Nahor i an pa Terah le a dang nan pupa hna cu Tiva* khattalei ral ah an rak um i pathian dang hna kha an rak biak. 3  “‘A hnuah nan pupa Abraham cu Tiva* khattalei ral in ka auh i Kanaan ram pumpi kha ka culter. A tefa cu ka karhter. Isak kha ka pek i, 4  Isak cu Jakob le Esau kha ka pek. A hnuah Esau cu Seir Tlang kha ka pek. Jakob le a fale tu cu Izipt ram ah an vung ṭum. 5  A hnuah Moses le Aaron kha ka thlah hna i Izipt ram ah rai ka tlunter. Cun nannih cu kaan chuahpi hna. 6  Nan pale kha Izipt ram in ka chuahpi hna i rili an phanh tikah Izipt mi nih raltuknak rangleng le rang cung ralkap hna he Rili Sen tiang an rak dawi hna. 7  Bawmh hal in an au tikah keimah Jehovah nih anmah le Izipt mi hna karlak ah muihnak kha ka chiah i Izipt mi cu rili ti in ka khuh hna. Izipt ram ah ka tuahmi kha nanmah hrimhrim nih nan hmuh ko. Mah hnuah ramcar ah kum tampi chung nan rak um. 8  “‘Jordan khattalei ral* ah a ummi Amor mi hna ram ah kaan hruai hna. Annih nih an in doh hna nain an ram kha nan co khawh nakhnga nan kut chung ah kaan pek hna i ka hrawh hna. 9  Zippor fapa Moab siangpahrang Balak nih Israel mi kha doh a timh hna. Cucaah nanmah chiatserh awkah Beor fapa Balaam kha a auh. 10  Asinain Balaam bia cu ka ngai lo i atu le atu thluachuah kaan pekter hna. Cuticun a kut chung in kaan khamh hna. 11  “‘Cu hnuah Jordan Tiva kha nan tan i Jeriko khua ah nan phan. Jeriko khuami hna,* Amor mi, Periz mi, Kanaan mi, Hit mi, Girgash mi, Hiv mi le Jebus mi nih an in doh hna nain annih kha nan kut chung ah kaan pek hna. 12  Amor siangpahrang pahnih bantuk in nan va phanh hlan hmanh in an hnabei ka donghter hna* caah nan hmai in an zam. Mah cu nan vainam le nan likuk ruang ah a si lo. 13  Thazaang chuah hau loin nan hmuhmi ram le nan sak lomi khua kha kaan pek hna i cuka ah khua nan sa. Nan cin lomi mitsur dum le oliv kung theitlai kha nan ei.’ 14  “Cucaah Jehovah kha ṭih u law zumhfek tein* le zumhawktlak tein* bia u. Tiva* khattalei ral le Izipt ram ah nan pupa hna nih an rak biakmi pathian hna kha hlonh u law Jehovah kha bia u. 15  Jehovah kha kan biak awk a si lo tiah nan ruah ahcun Tiva* khattalei ral ah nan pupa hna nih an rak biakmi pathian maw kan biak lai, nan umnak ram i Amor mi hna pathian dah kan biak lai ti kha nihin ah i thim u. Kei le ka innchungkhar tu nih cun Jehovah kha kan biak lai.” 16  Mah tikah mizapi nih hitin an leh: “Jehovah kaltak in a dang pathian biak ding cu a ruah hmanh kan ruat ngam lo. 17  Jehovah kan Pathian nih sal kan taannak Izipt ram in kanmah le kan pale kha a kan chuahpi. Kan mithmuh ah thil lianngan hna a tuah i kan khualtlawnnak lam thluangthluan ah le kan rak tanmi ram hna i miphun hna lakah a kan ven zungzal. 18  Hika ram ah a rak ummi Amor mi le a dang miphun vialte kha Jehovah nih a ṭhawl dih hna. Cucaah kannih zong Jehovah kha kan biak lai. Zeicahtiah anih cu kan Pathian a si.” 19  Joshua nih mizapi cu hitin a ti hna: “Jehovah cu nan bia kho taktak lai maw? Zeicahtiah anih cu a thiangmi Pathian a si i amah lawnglawng biak awkah a halmi Pathian a si. Nan nawl buarnak* le nan sualnak kha aan ngaithiam hna lai lo. 20  Jehovah kha nan hlawt i ramdang mi hna pathian kha nan biak ahcun Pathian zong nih thilṭha aan rak tuahpiak ko hna nain aan hlawt ve hna lai i aan hrawh hna lai.” 21  Mah tikah mi nih “Cutin kan tuah lai lo, Jehovah kha kan biak ko lai” tiah an ti. 22  Joshua nih “Jehovah biak awkah nanmah duh tein nan i thimmi a si timi kong ah nanmah thengte hi tehte nan si” tiah a ti hna tikah “Kannih cu tehte kan si” tiah an leh. 23  “Cucaah nan lakah a ummi ramdang mi hna pathian kha hlonh u law nan lungthin kha Israel Pathian Jehovah lei ah mer u” tiah Joshua nih a ti hna. 24  Mah tikah mi nih “Jehovah Pathian kha kan biak lai i a nawl kan ngaih lai” tiah an leh. 25  Mah ni ah Joshua nih mi hna he biakamnak a ser i Shekhem ah nawlbia le phunglam a pek hna. 26  Joshua nih mah bia kha Pathian Nawlbia cauk chung ah a ṭial. Lung nganpi kha a lak i Jehovah hmunthiang pawng ah a ummi thingkung nganpi tang ah a bunh. 27  Joshua nih mizapi cu hitin a ti hna: “Zoh hmanh u, hi lung hi kan caah tehte a si lai. Zeicahtiah Jehovah nih kan sinah a chimmi vialte kha hi lung nih a theih ve. Pathian kha nan hlawt ahcun hi lung hi tehte a si lai.” 28  Mah hnuah Joshua nih mi cu anmahle an comi ram cio ah a kirter hna. 29  Mah thil vialte a can hnuah Jehovah sal, Nun fapa Joshua cu kum 110 a si ah a thi. 30  Gaash Tlang chaklei Efraim tlangram ah a ummi Timnath-serah i a comi ram ah an vui. 31  Israel mi nih Joshua a nun chung le Joshua nakin a nunkhua a sau deuh i Israel mi hna caah Jehovah tuahmi thil vialte a hngalmi upa pawl an nun chung cu Jehovah kha an biak. 32  Israel mi nih Izipt ram in an rak phorhmi Josef ruh kha Shekhem khua i lo pakhat ah an vui. Mah lo cu Shekhem pa Hamor fapale sinin Jakob nih ngun tangka 100 in a rak cawkmi a si. Mah cu Josef tefa hna comi ro a hung si. 33  Aaron fapa Eleazar zong a thi ve. Efraim tlangram ah a fapa Finehas nih a comi Finehas Tlangbo ah an vui.

Footnotes

^ Mah cu Zufrates Tiva a si.
^ Mah cu Zufrates Tiva a si.
^ Mah cu nichuahlei a si.
^ Asiloah “Vawlei ngeitu hna” ti zong a si kho.
^ Asiloah “ṭihnak ka ngeihter hna” ti zong a si kho.
^ Asiloah “soisel awk um loin.”
^ Asiloah “biatak in.”
^ Mah cu Zufrates Tiva a si.
^ Mah cu Zufrates Tiva a si.
^ Asiloah “ralchanhnak.”

Hi cauk i Copyrights