Joshua 10:1-43
10 Joshua nih Ai khua a lak i a hrawh cikceknak kong, Ai khua le a siangpahrang cu Jeriko le a siangpahrang bantuk in a hrawhnak kong le Gibeon mi cu Israel mi he daihnak an ser i an lakah an umnak kong kha Jerusalem siangpahrang Adonizedek nih a theih.
2 Mah tikah a lau tuk. Zeicahtiah Gibeon cu siangpahrang ukmi khua bantuk in khua lianngan a si i Ai khua nakhmanh in a ngan deuh. Khua chung pa dihlak zong ralkap an si.
3 Cucaah Jerusalem siangpahrang Adonizedek nih Hebron siangpahrang Hoham, Jarmuth siangpahrang Piram, Lakhish siangpahrang Japhia le Eglon siangpahrang Debir kha hitin bia a cah hna:
4 “Gibeon mi cu Joshua le Israel mi hna he daihnak an ser cang caah va do hna u sih. Rak ka bawm u.”
5 Cucaah Amor siangpahrang panga a simi Jerusalem siangpahrang, Hebron siangpahrang, Jarmuth siangpahrang, Lakhish siangpahrang le Eglon siangpahrang cu an ralkap hna he hmunkhat ah an i pum. Cun Gibeon khua kha doh awkah an i thawh i khua cu an kulh.
6 Gibeon mi hna nih Gilgal ah a ummi Joshua kha hitin bia an cah: “Na salle hi rak kan kaltak hlah. Khulrang in ra law rak kan khamh. Tlang cung ah a ummi Amor siangpahrang dihlak cu kanmah doh awkah an i pumh caah rak kan bawm hram ko.”
7 Cucaah Joshua cu a ṭhawngmi ralkap hna le ralkap dihlak he Gilgal in aa thawh.
8 Jehovah nih Joshua kha “Ṭih hna hlah. Annih cu na kut chung ah kaan pek cang hna. Ahohmanh nih an in tei kho lai lo” tiah a ti.
9 Joshua cu Gilgal in zan khuadei a kal hnuah an ral pawl kha an i ruah lo liopi ah a va doh hna.
10 Jehovah nih Israel mi hna hmaiah Amor mi cu an lung a tuaiter hna. Cucaah Israel mi nih Gibeon ah mi tampi an thah hna. Beth-horon lei kalnak lam ah an dawi hna i Azekah le Makkedah tiang an thah hna.
11 Israel mi hna sinin an zam i Beth-horon ṭumnak an phanh tikah Jehovah nih Azekah tiang rial nganpipi a tlakter i an thi. Israel mi hna vainam ruang ah a thimi nakin rial ruang ah a thimi cu an tam deuh.
12 Jehovah nih Amor mi a sunghter hna ni ah Joshua cu Israel mi hna hmaiah Jehovah sinah hitin thla a cam:
“Nika, Gibeon cung ah dir tuah,Thlapa, Aijalon horkuang cung ah dir tuah!”
13 Israel mi nih an ral pawl an tei dih hna hlan tiang nika cu a dir i thlapa cu aa thawn lo. Mah kong cu Jashar cauk ah aa ṭial a si lo maw? Nika cu vanlai ah a dir i nikhat chung pumpi tlak aa tim lo.
14 Jehovah nih mi pakhat bia a ngaihmi, hi bantuk ni hi a hlanah siseh, a hnuah siseh a um bal lo. Jehovah nih Israel mi cu ral a dohpiak hna.
15 Cu hnuah Joshua cu Israel mi vialte he Gilgal i an riahhmun ah an kir.
16 Mah lioah siangpahrang panga cu an zam i Makkedah ah a ummi lungkua chung ah an i thup.
17 “Siangpahrang panga cu Makkedah i lungkua chung ah an i thup” timi thawng kha Joshua nih a theih.
18 Cucaah hitin a ti: “Lungkua kha lung nganpipi in phit u law mi kha cawnghter hna u.
19 Asinain a taangmi tu cu cuka ah dir loin nan ral pawl kha dawi hna u law that hna u. An khua chung ah luhter hna hlah u. Jehovah nan Pathian nih nan kut chung ah aan pek cang hna.”
20 Joshua le Israel mi nih mi tampi an thah hna. Ralhau a ngeimi khua ah a lut i a luatmi mi tlawmte dah ti lo cu an hrawh dih hna.
21 Mah hnuah Israel ralkap vialte cu Makkedah ah riahhmun a khuarmi Joshua sinah him tein an rak kir. Ahohmanh nih Israel mi hna ralchanh in zei bia hmanh an chim ngam lo.
22 Cun Joshua nih “Lungkua kha ong u law siangpahrang panga kha rak chuahpi hna u” tiah a ti.
23 Cucaah siangpahrang panga Jerusalem siangpahrang, Hebron siangpahrang, Jarmuth siangpahrang, Lakhish siangpahrang le Eglon siangpahrang cu lungkua chung in an rak chuahpi hna.
24 Joshua sin an ratpi hna tikah Joshua nih Israel mi vialte kha a pumh hna. Cun a sinah a rak kalmi ralkap haotu hna kha “Ra u law siangpahrang hna an hngawng hi lam u” tiah a ti hna. Cucaah an ra i siangpahrang hna hngawng kha an lamh hna.
25 Cun Joshua nih “Ṭih le phang in um hlah u. Ṭhawng ngai le ralṭha ngai in um u. Zeicahtiah nan dohmi nan ral vialte kha Jehovah nih hitin a tuah hna lai” tiah a ti hna.
26 Cun Joshua nih siangpahrang panga kha a thah hna i tung pakhat cio ah zanlei tiang a thlai hna.
27 Ni a hun tlak tikah an ruak kha tung cung in ṭhumh awk le an rak i thuhnak lungkua chung ah hlonh awkah Joshua nih nawl a pek hna. Cun lungkua kha lung nganpipi in an phih i mah cu nihin ni tiang a um.
28 Cu ni ah Joshua nih Makkedah khua cu a lak i a siangpahrang le khuami vialte kha pakhat hmanh taang loin vainam in a thah hna i a hrawh cikcek hna. Makkedah siangpahrang cu Jeriko siangpahrang bantuk in a thah ve.
29 Cun Joshua cu Israel mi vialte he Makkedah in Libnah ah an kal i Libnah khua kha an doh.
30 Jehovah nih Libnah le a siangpahrang cu Israel mi hna kut ah a pek hna. Israel mi nih khuami dihlak kha pakhat hmanh taang loin vainam in an thah hna. Libnah siangpahrang kha Jeriko siangpahrang bantuk in an thah ve.
31 Cun Joshua le Israel mi vialte cu Libnah in Lakhish ah an kal. Cuka ah riahhmun an khuar i khua kha an doh.
32 Jehovah nih Lakhish khua cu Israel mi kut ah a pek hna i a nihnihnak ni ah an lak. Khuami vialte kha Libnah khuami bantuk in vainam in an thah dih hna.
33 Gezer siangpahrang Horam cu Lakhish bawmh awkah aa thawh. Asinain Joshua nih amah le a mi pawl kha pakhat hmanh taang loin a thah dih hna.
34 Cun Joshua cu Israel mi vialte he Lakhish in Eglon ah an kal. Cuka ah riahhmun an khuar i khua kha an doh.
35 Mah ni ah khua cu an lak. Khuami dihlak kha Lakhish khuami bantuk in vainam in an thah hna i an hrawh cikcek hna.
36 Cun Joshua le Israel mi vialte cu Eglon in Hebron ah an kal i khua cu an doh.
37 Khua kha an lak i a siangpahrang, a pawngkam khua hna le khuami dihlak kha pakhat hmanh taang loin vainam in an thah hna. Eglon khuami bantuk in Hebron khuami cu a hrawh cikcek hna.
38 A donghnak ah Joshua le Israel mi vialte cu Debir lei ah an i mer i khua kha an doh.
39 Debir khua, a siangpahrang le a pawngkam khua kha a lak dih hna. Khuami vialte cu pakhat hmanh taang loin vainam in an thah hna i an hrawh cikcek hna. Debir khua le a siangpahrang cu Hebron, Libnah le a siangpahrang bantuk in a hrawh hna.
40 Joshua nih tlangram, Negeb, Shefelah le tlangpang ah a ummi hmun vialte cu a lak hna. An siangpahrang dihlak zong pakhat hmanh taang loin a tei hna. Israel Pathian Jehovah nawl peknak ning in mi vialte cu a thah dih hna.
41 Joshua nih Kadesh-barnea in Gaza tiang, Goshen hmun vialte le Gibeon tiang a tei dih.
42 Israel Pathian Jehovah cu Israel mi hna lei in ral a doh caah Joshua nih mah siangpahrang vialte le an ram hna cu voikhat te ah a tei dih hna.
43 Mah hnuah Joshua cu Israel mi vialte he Gilgal i riahhmun ah an rak kir.
