Joshua 6:1-27
6 Jeriko khuami hna nih Israel mi an luh khawh nakhnga lo hauka kha fek tein an hrenh. Ahohmanh an lut, an chuak lo.
2 Jehovah nih Joshua cu hitin a ti: “Zoh hmanh, Jeriko le a siangpahrang le a ṭhawngmi a ralkap pawl cu na kut chung ah kaan pek cang.
3 Na ralkap vialte he khua cu vel u, nikhat voikhat in niruk chung vel u.
4 Tuukawng ki pasarih aa putmi tlangbawi pasarih cu biakamnak kuang hmai in kal hna seh. A nisarihnak ni ah cun khua kha voi sarih nan vel lai i tlangbawi pawl nih tuukawng ki kha an tum lai.
5 Tuukawng ki tum thawng nan theihle cangka mi vialte cu raldohnak au thawng in an au lai. Mah tikah khua kulhnak vanpang cu a cim dih lai i mi cu an hmai zawn cio in khua chung ah an lut lai.”
6 Cucaah Nun fapa Joshua nih tlangbawi pawl cu hmunkhat ah a auh hna i hitin a ti hna: “Biakamnak kuang kha i zawn u. Tuukawng ki pasarih aa putmi tlangbawi pasarih cu Jehovah biakamnak kuang hmaiah kal u.”
7 Cun mizapi cu “I thawh u law khua kha vel u. Hriamtlaimi ralkap hna cu Jehovah biakamnak kuang hmaiah kal u” tiah a ti hna.
8 Joshua nih a chimh hna ning in tuukawng ki pasarih aa putmi tlangbawi pasarih cu Jehovah hmaiah an kal. Tuukawng ki kha an tum i Jehovah biakamnak kuang a putu tlangbawi pawl nih an zulh hna.
9 Hriamtlaimi ralkap hna cu tuukawng ki a tummi tlangbawi hna hmaiah an kal. A dang ralkap cu biakamnak kuang hnulei in an kal. Mah lioah tuukawng ki cu ngol loin an tum.
10 Joshua nih mi kha hitin nawl a pek hna: “Au hlah u, zei bia hmanh chim hlah u. ‘Au u’ tiah nawl kaan pek hna hlan tiang bia kaakhat hmanh chim hlah u. Nawl kaan pek tik hna lawng ah au u.”
11 Cun Jehovah biakamnak kuang kha pu in khua kha voikhat a velter hna. Mah hnuah riahhmun ah an rak kir ṭhan i an riak.
12 A thaizing zingkate ah Joshua cu a tho. Tlangbawi pawl nih Jehovah biakamnak kuang cu an i zawn.
13 Hriamtlaimi ralkap pawl cu a hmai bik ah an kal. Cun tuukawng ki pasarih aa putmi tlangbawi pasarih cu tuukawng ki tum buin an kal i an hnu in Jehovah biakamnak kuang a putu nih an zulh hna. A dang ralkap phukhat nih Jehovah biakamnak kuang kha a hnu in an rak zulh ve.
14 A nihnihnak ni zong ah khua cu voikhat an vel hnuah riahhmun ah cun an kir ṭhan. Cuticun niruk chung an tuah.
15 A nisarihnak ni ah khua a dei cangka in an tho i an vel tawn ning in khua cu an vel. Cu ni tu ahcun khua cu voi sarih an vel.
16 Tlangbawi pawl nih tuukawng ki kha a voi sarihnak an tum tikah Joshua nih mi kha hitin a ti hna: “Au u, zeicahtiah Jehovah nih khua cu aan pek cang hna!
17 Khua le a chung ah a ummi vialte cu hrawh cikcek an si lai; Jehovah ta an si dih. Hlawhhlangnu Rahab nih kan thlahmi mi-ngiatu kha a rak thuh hna caah amah le a innchung ah a ummi hna lawng an nunnak zuah an si lai.
18 Hrawh cikcek awk a simi thil kha nan duh i nan lak sual nakhnga lo hlatpi in hrial hna u, cutin a si lo ahcun Israel riahhmun cu hrawh cikcek awkah a cang lai i harnak a tlung lai.
19 Asinain ngun, sui le dar le thir in sermi thil vialte cu Jehovah caah a thiangmi an si. Cucaah Jehovah chawhlawn khonnak inn ah chiah an si lai.”
20 Tuukawng ki tum thawng an theih tikah mi cu an au. Raldohnak au thawng in an aule cangka khua kulhnak vanpang cu a cim dih. Mah hnuah mi cu an hmai zawn cio in khua chung ah an lut i khua cu an lak.
21 Khua chung ah a ummi nu le pa, mino le upa, caw, tuu le laa vialte kha vainam in an thah dih hna.
22 Joshua nih ram a rak ngiatu pa pahnih kha “Hlawhhlangnu inn ah va kal u law chiatserh in bia nan rak kamh bantuk in amah le a sinah a ummi vialte cu rak chuahpi hna u” tiah a ti hna.
23 Cucaah mi-ngiatu hna cu an va kal i Rahab, a nu, a pa, a unau hna le amah he aa pehtlaimi a chungkhar dihlak kha an chuahpi hna. Israel riahhmun leng tiang him tein an ratpi hna.
24 Mah hnuah khua le a chung ah a ummi vialte kha mei in an khangh dih hna. Asinain ngun, sui le dar le thir in sermi thil hna cu Jehovah inn i chawhlawn khonnak ah an chiah.
25 Hlawhhlangnu Rahab le a pa chungkhar le amah he aa pehtlaimi vialte lawng kha Joshua nih an nunnak a zuah hna. Jeriko khua ngiat awkah Joshua nih a thlahmi pa hna kha a rak thuh hna caah nihin ni tiang Israel mi lakah a um ve.
26 Mah lioah Joshua nih “Jeriko khua a dirh ṭhantu cu Jehovah hmaiah chiatserh si ko seh. A hram a bunh tikah a fater a sung lai i khua hauka a bunh tikah a fa hniang a sung lai” tiah chiat a ser.*
27 Jehovah cu Joshua sinah a um i vawleicung pumpi ah a min a thang.
Footnotes
^ Asiloah “mi kha chiat a serter hna” ti zong a si kho.
