Joshua 14:1-15
14 Israel mi nih Kanaan ram ah tlangbawi Eleazar, Nun fapa Joshua le Israel phun chung i chungkhar lu pawl nih an phawt hna ning in ram kha an co.
2 Moses sinin Jehovah nih nawl a pek hna ning in phun kua le a cheu nih ram kha camcawhfung zuh in an i phaw.
3 A dang phun hnih le a cheu cu Moses nih Jordan Tiva khattalei ral* ah ro a pek cang hna. Levi mi tu cu an lakah ro a pe hna lo.
4 Josef tefa cu Manasseh le Efraim tiin phun hnih an hung si. Levi mi cu umnak khua le an saṭil le an cawrun caah tlonnak ram dah ti lo cu hmun pek an si lo.
5 Jehovah nih Moses nawl a pekmi ning in Israel mi nih ram cu an i phaw.
6 Judah pa hna cu Gilgal ah a ummi Joshua sinah an va kal. Keniz phun, Jefunneh fapa Kaleb nih hitin a ti: “Kadesh-barnea ah a hmaanmi Pathian sal Moses sinah Jehovah nih nangmah le keimah kong he aa tlaiin a chimmi kha ṭha tein naa cinken ko lai.
7 Jehovah sal Moses nih ram ngiat awkah Kadesh-barnea in a ka thlah lioah kum 40 ka si i ka rak kir tikah ka hmuhmi kha a sining tein ka rak chim.
8 Keimah he a kalṭimi ka unau pawl nih mi kha an lung an zorter hna nain kei cu ka Pathian Jehovah bia kha lungthin dihlak in ka ngaih.
9 Mah ni ah Moses nih ‘Ka Pathian Jehovah bia kha lungthin dihlak in na ngaih caah na ke nih a lamhnak hmun cu nangmah le na fale caah zungzal ro a si lai’ tiah chiatserh in bia aa kam.
10 Israel mi ramcar chung i an vahvaih lioah Jehovah nih Moses kha cutin bia a rak kamh. Jehovah nih a biakam ning in kum 45 chung a ka nunter rih i atu cu kum 85 ka si cang.
11 Moses nih a rak ka thlah lio bantuk in atu ah ka ṭhawng rih ko. Raltuk awkah le a dang thil tuah awkah a hlan bantuk in ka thazaang a um rih ko.
12 Cucaah mah ni ah khan Jehovah nih bia a rak i kam bantuk in hi tlangram hna hi rak ka pe. Cuka i a ummi cu Anak mi an si i kulhnak a ngeimi khua nganpipi ah an um ti kha na theih ko. Asinain Jehovah nih a ka umpi lai caah Jehovah biakam ning in ka ṭhawl hna lai.”
13 Cucaah Joshua nih Jefunneh fapa Kaleb cu thluachuah a pek i Hebron kha ro caah a pek.
14 Keniz phun, Jefunneh fapa Kaleb nih Israel Pathian Jehovah bia kha lungthin dihlak in a ngaih caah Hebron kha a co i nihin ni tiang amah ta a si.
15 Hebron cu Kiriath-arba tiah auh a rak si (Arba cu Anak mi hna lakah mi lianngan a si). Mah hnu cun ram chung ah raldohnak a um ti lo i a dai.
Footnotes
^ Mah cu nichuahlei a si.
