Joshua 19:1-51
19 A pahnihnak camcawhfung cu Simeon phun cung ah a tla. Simeon phun nih an chungkhar ning cio in an comi ram cu Judah phun ram chung ah a si.
2 An comi ram cu Beersheba, Sheba, Moladah,
3 Hazarshual, Balah, Ezem,
4 Eltolad, Bethul, Hormah,
5 Ziklag, Beth-markaboth, Hazar-susah,
6 Beth-lebaoth le Sharuhen an si. Khuapi 13 le khuate hna zong aa tel.
7 Ain, Rimmon, Ether le Ashan an si. Khuapi 4 le khuate hna zong aa tel.
8 Mah khuapi hna pawngkam i khuate vialte, thlanglei Ramah tiah auhmi Baalath-beer tiang aa tel. Mah cu Simeon phun nih an chungkhar ning cio in an comi ram a si.
9 Simeon tefa hna caah ro cu Judah ram chung in lak a si. Zeicahtiah Judah ram cu an caah a kau tuk. Cucaah Simeon tefa hna nih Judah ram chung ah ro an co.
10 A pathumnak camcawhfung cu Zebulun tefa hna cung ah a tla i an chungkhar ning cio in ro an co. An ramri cu Sarid tiang a si.
11 Cuka in nitlaklei Mareal lei ah a kai i Dabbesheth tiang, cun Jokneam hmai horkuang tiang a phan.
12 Cun Sarid in nichuahlei ah a kal. Khisloth-tabor ramri le Daberath tiang a phan i Japhia lei ah a kai.
13 Cuka in nichuahlei Gath-hepher le Ethkazin lei ah a kal thluahmah i Rimmon le Neah tiang a phan.
14 Cun chaklei Hannathon ah aa kuai i Iftahel Horkuang ah a dong.
15 An comi ram ah Kattath, Nahalal, Shimron, Idalah le Bethlehem aa tel. A dihlak ah khuapi 12 a si i khuate hna zong a um rih.
16 Mah cu Zebulun tefa nih an chungkhar ning cio in an comi ro a si. Khuapi hna le khuate hna zong aa tel.
17 A palinak camcawhfung cu Issakhar tefa cung ah a tla i an chungkhar ning cio in ro an co.
18 Ramri ah a ummi khua hna cu Jezreel, Khesulloth, Shunem,
19 Hafarim, Shion, Anaharath,
20 Rabbith, Kishion, Ebez,
21 Remeth, Engannim, Enhaddah le Beth-pazzez an si.
22 Ramri cu Tabor, Shahazumah le Beth-shemesh tiang a phan i Jordan ah a dong. Khuapi 16 le khuate hna zong aa tel.
23 Mah cu Issakhar phun nih an chungkhar ning cio in an comi khuapi hna le khuate hna an si.
24 A panganak camcawhfung cu Asher phun cung ah a tla i an chungkhar ning cio in ro an co.
25 An ramri ah a ummi khua hna cu Helkath, Hali, Beten, Akhshaf,
26 Allam-melek, Amad le Mishal an si. Cun nitlaklei ah Karmel le Shihor-libnath tiang a phan.
27 Cun nichuahlei Beth-dagon ah aa kuai i Zebulun tiang, chaklei ah Iftahel Horkuang tiang a phan. Bethemek le Neiel kha a tan i kehlei kam ah a ummi Kabul tiang a phan.
28 Cun Ebron, Rehob, Hammon, Kanah le Sidon khuapi tiang a kau.
29 Ramri cu Ramah lei ah aa kuai i kulhnak a ngeimi Tair khua tiang a phan. Cuka in Hosah lei ah aa kuai ṭhan i rili ah a dong. Rilikam ah Akhzib,
30 Ummah, Aphek le Rehob khua hna an um. Khuapi 22 le khuate hna zong aa tel.
31 Mah cu Asher phun nih an chungkhar ning cio in an comi khuapi hna le khuate hna an si.
32 A paruknak camcawhfung cu Naftali phun cung ah a tla i an chungkhar ning cio in ro an co.
33 An ramri cu Heleph le Zaanannim i thingkung nganpi in aa thawk i Adaminekeb, Jabneel le Lakkum tiang a phan. Ramri cu Jordan ah a dong.
34 Ramri cu nitlaklei Aznoth-tabor lei ah aa kuai i Hukkok tiang a kau. Thlanglei ah Zebulun ram, nitlaklei ah Asher ram le nichuahlei ah Jordan Tiva i Judah ram he aa tong.
35 Kulhnak a ngeimi khua hna cu Ziddim, Zer, Hammath, Rakkath, Khinnereth,
36 Adamah, Ramah, Hazor,
37 Kedesh, Edrei, Enhazor,
38 Ziron, Migdalel, Horem, Beth-anath, le Beth-shemesh an si. Khuapi 19 le khuate hna zong aa tel.
39 Mah cu Naftali phun nih an chungkhar ning cio in an comi khuapi hna le khuate hna an si.
40 A pasarihnak camcawhfung cu Dan phun cung ah a tla i an chungkhar ning cio in ro an co.
41 An ramri cu Zorah, Eshtaol, Irshemesh,
42 Shaalabbin, Aijalon, Ithlah,
43 Elon, Timnah, Ekron,
44 Eltekeh, Gibbethon, Baalath,
45 Jehud, Beneberak, Gathrimmon,
46 Mejarkon le Rakkon kha a tan i Joppa hmailei tiang a si.
47 Asinain Dan ram cu a bit tuk caah Leshem kha an va doh. An tei hna i khuami kha vainam in an thah dih hna. Khua kha an lak i cuka ah an um. An pupa Dan min kha la in Leshem khua cu Dan tiah a min an thlen.
48 Mah cu Dan phun nih an chungkhar ning cio in an comi khuapi hna le khuate hna an si.
49 Cuticun ram i cheuhnak cu an liim. Israel mi nih Nun fapa Joshua kha an lakah ro an pek ve.
50 Jehovah nih nawl a pek hna ning in Joshua nih a halmi hna khua kha an pek. Mah khua cu Efraim tlangram ah a ummi Timnath-serah a si. Khua cu a dirh ṭhan i cuka ah khua a sa.
51 Mah cu Shiloh i tonnak thlam luhnak, Jehovah hmaiah tlangbawi Eleazar, Nun fapa Joshua le Israel phun chung i chungkhar lu hna nih camcawhfung zuh in an comi ram an si. Cuticun ram i cheuhnak rian cu an liim.
