Joshua 17:1-18
17 Cun camcawhfung an zuh tikah Josef fater Manasseh phun nih ro kha an co. Manasseh fater le Gilead pa a simi Makhir cu a ral a ṭhami ralkap a si caah Gilead le Bashan kha a co.
2 Cun Manasseh tefa a taang rihmi Abiezer, Helek, Asriel, Shekhem, Hepher le Shemida tefa hna zong nih an chungkhar ning cio in camcawhfung zuh in ro an hmuh. Annih cu Josef fapa, Manasseh tefa chung i chungkhar lu an si.
3 Asinain Manasseh fapa, Makhir fapa, Gilead fapa, Hepher fapa, Zelofehad tu cu fapa a ngei lo, fanu lawnglawng a ngei. A fanule an min cu Malah, Noah, Hoglah, Milkah le Tirzah an si.
4 Annih cu tlangbawi Eleazar, Nun fapa Joshua le haotu hna sinah an ra i “Kannih zong kan unau hna lakah ro pek ve ding in Jehovah nih Moses kha nawl a rak pek” tiah an ti. Cucaah Jehovah nawl pek ning in an pa unau hna lakah ro a pek ve hna.
5 Manasseh phun nih Jordan Tiva khattalei ral* ah a ummi Gilead le Bashan lawng si loin a dang hmun pahra zong an co chap.
6 Zeicahtiah Manasseh phun chung i nu hna nih an unau hna lakah ro an co ve. Manasseh phun chung i a taangmi hna nih Gilead kha an co.
7 Manasseh ramri cu Asher in Shekhem lei a hoihmi Mikh-methath tiang a si. Cun thlanglei En-Tappuah khuami hna umnak ram lei ah a kal.
8 Tappuah ram cu Manasseh phun ta a si, asinain Manasseh ramri ah a ummi Tappuah khua cu Efraim phun ta a si.
9 Cun ramri cu Kanah Tivarek i thlanglei ah a ṭum. Manasseh khua lakah Efraim khua hna zong an um. Manasseh ramri cu tivarek chaklei ah a si i rili ah a dong.
10 Thlanglei cu Efraim ta a si, chaklei cu Manasseh ta a si i ramri cu rili a si. Chaklei ah Asher ram le nichuahlei ah Issakhar ram he aa tong.
11 Issakhar le Asher ram chung ah Manasseh phun nih an comi khua hna cu Beth-shean, Ibleam, Dor le tlang a tamnak khua pathum a simi Endor, Taanakh le Megiddo an si. Cuka khuami hna le a pawngkam khua hna zong kha an co.
12 Asinain Manasseh tefa hna nih cuka khua hna kha an la kho lo i Kanaan mi hna cu cuka ram ah an i benh chih ko.
13 Israel mi cu an hun ṭhawn tikah Kanaan mi kha sal ah an ser hna. Kanaan mi kha an dihlak in an ṭhawl hna lo.
14 Josef tefa hna nih Joshua kha “Jehovah nih nihin ni tiang thluachuah a kan pek caah mi tampi kan si cang. Cu a si ah zeicah camcawhfung zuh in hmun pakhat lawng na kan pek i ram pakhat lawng na kan coter?” tiah an ti.
15 Joshua nih “Mi nan tam tuk i Efraim tlangram cu nan caah a bit tuk ahcun Periz mi hna le Repha mi hna ram i tupi kha va vat u law va um u” tiah a ti hna.
16 Josef tefa nih hitin an ti: “Tlangram cu kan caah a bi tuk. Horkuang chung i Beth-shean le a pawngkam khua hna le Jezreel Horkuang chung ah a ummi Kanaan mi vialte cu thir nam bunhmi raltuknak rangleng* an ngei.”
17 Mah tikah Joshua nih Josef tefa a simi Efraim phun le Manasseh phun kha hitin a ti hna: “Nannih cu mi tampi nan si i nan ṭhawng tuk. Cucaah hmun pakhat lawng nan co lai lo.
18 Tlangram zong kha nan co lai. Tupi a si nain nan vah lai i mah cu nan ramri a donghnak a si lai. Kanaan mi cu an ṭhawng i thir nam bunhmi raltuknak rangleng* an ngei nain nan dawi khawh ko hna lai.”
