Joshua 18:1-28
18 Israel mi vialte cu Shiloh ah an i pum. Ram kha an lak dih cang caah cuka hmun ah tonnak thlam kha an bunh.
2 Asinain camcawhfung zuh in ram covo cheuh rih lomi Israel phun sarih an um.
3 Cucaah Joshua nih Israel mi kha hitin a ti hna: “Nan pupa hna Pathian Jehovah nih aan pekmi hna ram kha va co awkah zei can tiang dah a caan nan thawn rih lai?
4 Phun pakhat ah mi pathum in thim hna u law ka thlah hna lai. Ram pumpi ah an va i chawk lai i phun pakhat cio nih nan co dingmi khuaram hmanthlak kha an suai lai. Cu hnuah ka sinah an rak kir ṭhan lai.
5 Cun ram kha cheu sarih ah an cheu lai. Judah phun cu thlanglei i an ram ah an um ko lai i Josef tefa hna zong chaklei i an ram ah an um ko lai.
6 Nannih tu cu khuaram hmanthlak suai u law ṭhen sarih in ṭhen u, ka sinah ratpi u law kan Pathian Jehovah hmaiah nan caah camcawhfung kaan zuhpiak hna lai.
7 Asinain Levi phun cu nan lakah ro pek an si lai lo, Jehovah tlangbawi an sinak cu an ro a si; Gad phun, Reuben phun le Manasseh phun a cheu cu Jordan Tiva nichuahlei ah Jehovah sal Moses nih a rak pekmi hna ro kha an co cang.”
8 Khuaram a suai dingmi pa hna cu kal an i tim. Mah tikah Joshua nih “Ram pumpi ah va i chawk u law khuaram kha va suai u, cun ka sinah rak kir ṭhan u law Shiloh ah Jehovah hmaiah camcawhfung kaan zuhpiak hna lai” tiah a ti hna.
9 Cucaah an i thawh i ram pumpi ah an va i chawk, khuaram kha an suai i ṭhen sarih ah an ṭhen. Cuka ah a ummi khua hna kha cazin an tuah i cauk chung ah an ṭial. Cun Shiloh i riahhmun ah a ummi Joshua sinah an rak kir ṭhan.
10 Joshua nih Shiloh ah Jehovah hmaiah camcawhfung a zuhpiak hna i an covo ning cio in Israel mi kha ram cu a phawt hna.
11 Camcawhfung cu Benjamin phun cung ah a tla. An chungkhar ning cio in an comi ram cu Judah ram le Josef ram karlak ah a si.
12 Chaklei kam ramri cu Jordan Tiva in aa thawk. Chaklei Jeriko tlangpang in nitlaklei tlang tiang a kai i Beth-aven ramcar tiang a phan.
13 Cuka in Bethel tiah auhmi Luz khua i thlanglei tlangpang lei ah a kal, cun thlanglei Beth-horon a thlanglei ah a ummi tlang cung i Ataroth-addar lei ah a ṭum.
14 Nitlaklei ramri cu cuka in aa thawk. Beth-horon lei a hoihmi tlang in thlanglei ah aa kuai i Judah khua Kiriath-jearim tiah auhmi Kiriath-baal ah a dong. Mah cu nitlaklei ramri a si.
15 Thlanglei ramri cu Kiriath-jearim a donghnak in aa thawk i nitlaklei ah a kal; cun Neftoah cerhti put lei ah a kal.
16 Cuka in Hinnom Fapa Horkuang lei ah a hoihmi tlanghram tiang a ṭum, mah cu Repha Horkuang chaklei ah a ummi a si. Cun Hinnom Horkuang lei ah a ṭum, thlanglei Jebus tlangpang in a lan i Enrogel cerhti put tiang a ṭum.
17 Cun chaklei kam ah a kai i Enshemesh tiang a phan. Cuka in Adummim kainak hmaiah a ummi Geliloth lei ah a kal i Reuben fapa Bohan lung lei ah a ṭum.
18 Cun Arabah hmaiah a ummi chaklei tlangpang ah a kai i Arabah ah a ṭum.
19 Cu hnu cun Beth-hoglah i chaklei tlangpang lei ah a kal i Jordan Tiva a thlanglei bik ah a ummi Cite Rili* chaklei rili fonghlei ah a dong. Mah cu thlanglei ramri a si.
20 Nichuahlei ramri cu Jordan Tiva a si. Mah cu Benjamin tefa hna nih an chungkhar ning cio in an comi ram i a velchum ramri a si.
21 Benjamin phun nih an chungkhar ning cio in an comi khua hna cu Jeriko, Beth-hoglah, Emek-keziz,
22 Beth-arabah, Zemaraim, Bethel,
23 Avvim, Perah, Ofrah,
24 Khefar-ammoni, Ofni le Geba an si. Khuapi 12 le khuate hna zong aa tel.
25 Gibeon, Ramah, Beeroth,
26 Mizpah, Khefirah, Mozah,
27 Rekem, Irpeel, Taralah,
28 Zelah, Ha-elef, Jerusalem tiah auhmi Jebus, Gibeah le Kiriath an si. Khuapi 14 le khuate hna zong aa tel.
Mah cu Benjamin tefa hna nih an chungkhar ning cio in an comi ro a si.
Footnotes
^ Mah cu Rili Thi a si.
