Joshua 3:1-17
-
Israel mi nih Jordan kha an tan (1-17)
3 Joshua cu zingka tein a tho i Israel mi vialte he Shittim in an i thawh. Jordan Tiva an phanh tikah tan colh loin cuka ah an riak.
2 Nithum hnuah haotu pawl cu riahhmun ah an i chawk i,
3 mi kha hitin nawl an pek hna: “Levi mi tlangbawi pawl nih nan Pathian Jehovah biakamnak kuang an putmi kha nan hmuhle cangka nan riahhmun in i thawh u law zul hna u.
4 Asinain dong 2,000 hrawng* hlat in zul hna u. Cu nakin naih deuh hna hlah u. Mah lawng ah nan kal bal lonak hi lam ah kalnak kha nan hngalh lai.”
5 Joshua nih mizapi cu “Thaizing ah Jehovah nih khuaruahhar thil aan tuahpiak hna lai caah nanmahle nanmah i thianh u” tiah a ti hna.
6 Cun Joshua nih tlangbawi pawl cu “Biakamnak kuang kha i zawn u law mizapi hmai in kal u” tiah a ti hna. Cucaah biakamnak kuang cu an i zawn i a hmai in an kal.
7 Mah hnuah Jehovah nih Joshua cu hitin a ti: “Nihin thawk in Israel mi vialte hmaiah kaan hlorh lai. Cuticun Moses sinah ka rak um bantuk in na sin zong ah ka um ve lai ti kha an hngalh lai.
8 Biakamnak kuang a putu tlangbawi pawl kha ‘Jordan Tiva chung nan ṭumle cangka tikam ah dir u’ tiah nawl na pek hna lai.”
9 Joshua nih Israel mi kha “Ra u law nan Pathian Jehovah bia hi ngai u” tiah a ti hna.
10 Cun hitin a ti chap: “A nungmi Pathian cu nan sinah a um i Kanaan mi, Hit mi, Hiv mi, Periz mi, Girgash mi, Amor mi le Jebus mi cu nan hmai in a ṭhawl hrimhrim hna lai ti kha hitihin nan hngalh lai.
11 Zoh hmanh u! Vawleicung pumpi Uktu Bawipa biakamnak kuang cu nan hmai in Jordan Tiva a tan lai.
12 Atu Israel phunkhat ah mi pakhat tiin pa 12 thim hna u.
13 Vawleicung pumpi Uktu Bawipa Jehovah biakamnak kuang a putu tlangbawi pawl kepha nih Jordan Tiva ti a lamhle cangka tiva hnalei in a luangmi ti cu a cat lai i vanpang bantuk in a dir lai.”
14 Jordan Tiva tan awkah mi cu an thlam in an rak chuah tikah biakamnak kuang a putu tlangbawi pawl cu a hmaiah an kal.
15 Biakamnak kuang a putu tlangbawi hna cu Jordan Tiva ah an phan i ti an lamhle cangka, (atu bantuk rawl ṭuan caan ah Jordan Tiva cu tiva kuang in ti a liam tawn)
16 tiva hnalei in a luangmi ti cu a cat. Lamhlatpi ah a ummi Zarethan pawng i Adam khua ah ti cu vanpang bantuk in a dir. Arabah Rili tiah auhmi Cite Rili* lei ah a luangmi ti cu a reu dih. Ti cu a luan ti lo caah mi cu khattalei ral ah a ummi Jeriko khualei ah an kal.
17 Leiro cung in an tan lioah Jehovah biakamnak kuang a putu tlangbawi pawl cu Jordan Tiva laifang, leiro cung ah an dir. Israel miphun dihlak nih Jordan Tiva an tan dih hlan tiang an dir.
