Joshua 16:1-10
16 Josef tefa hna nih camcawhfung zuh in an comi ram cu Jeriko khua pawng i Jordan Tiva in Jeriko nichuahlei i cerhti put tiang, Jeriko hmai i a ummi ramcar kha tan in Bethel tlangram tiang aa tel.
2 Luz khua pawng i Bethel in Arkhi mi hna ramri a simi Ataroth tiang a kau.
3 Cun nitlaklei Jaflet mi hna ramri lei ah a ṭum i thlanglei Beth-horon le Gezer tiang a phan. Ramri cu rili ah a dong.
4 Josef tefa a simi Manasseh le Efraim phun nih ram kha an co.
5 Efraim tefa nih an chungkhar ning cio in an comi ram i ramri cu hitihin a si: Nichuahlei ah Ataroth-addar in chaklei Beth-horon tiang a si i,
6 rili tiang a phan. Chaklei ramri cu Mikh-methath khua ah a si. Cun ramri cu nichuahlei Taanath-shiloh ah aa kuai i Janoah khua kha a tan.
7 Janoah in Ataroth le Naarah lei ah a ṭum. Jeriko khua kha a tan i Jordan tiang a phan.
8 Ramri cu Tappuah in nitlaklei Kanah Tivarek ah a lan thluahmah i rili ah a dong. Mah cu Efraim phun nih an chungkhar ning cio in an comi ro a si.
9 Manasseh phun comi ram chung in Efraim tefa nih an comi khuapi le khuate hna zong a um rih.
10 Asinain Gezer khua ah a ummi Kanaan mi kha an ṭhawl hna lo. Cucaah Kanaan mi cu Efraim mi hna lakah nihin ni tiang an um i sal ah an cang.
