Joshua 23:1-16
23 Jehovah nih Israel mi kha an pawngkam ral hna sinin dinhnak a pek hnanak cu caan sau nawn a si cang. Joshua zong a kum a upa i a tar ngaingai cang.
2 Joshua nih upa hna, hruaitu hna, biaceihtu hna le haotu hna i telin Israel mi vialte kha a auh hna i hitin a ti hna: “Kei cu ka kum a upa cang i ka tar cang.
3 Nan caah hi miphun dihlak hi nan Pathian Jehovah nih zeitindah a rak tuah hna ti kha nan hmuh cang. Jehovah nan Pathian cu nan ral aan dohpiaktu hna a si.
4 Jordan Tiva in nitlaklei i Rilipi* tiang ka hrawhmi miphun hna le a taang rihmi miphun hna i an ram kha nan phun ning cio in co awkah camcawhfung zuh in kaan phawt cang hna.
5 Mah miphun pawl nan hmai in a dawitu cu Jehovah nan Pathian a si. Annih kha aan ṭhawlpiak hna i Jehovah nan Pathian nih bia aan kamh hna bantuk in an ram kha nan co.
6 “Moses Nawlbia cauk chung i aa ṭialmi vialte kha nan ngaih i nan zulh khawh nakhnga ralṭhatnak nan ngeih a hau. Kehlei ah siseh, orhlei ah siseh pial hlah u.
7 A taang rihmi miphun hna he i cawh in um hlah u. An pathian min kha nan chim lai lo, an min chalh in chiat nan ser lai lo. Nan bia hna lai lo i nan kunpiak hna lai lo.
8 Nihin ni tiang nan tuah bantuk hin nan Pathian Jehovah sinah i bek u.
9 Jehovah nih a ṭhawngmi le a liannganmi miphun hna kha nan hmai in a ṭhawl hna lai. Nihin ni tiang nanmah aan tei khotu ahohmanh an um rih lo.
10 Jehovah nan Pathian nih a biakam ning in ral aan dohpiak hna caah nan lak i mi pakhat nih mi thongkhat kha a dawi khawh hna lai.
11 Jehovah nan Pathian kha daw u, cuticun nanmahle nanmah kha i kilveng zungzal u.
12 “Asinain Pathian kha nan mertak i nan sinah a taang rihmi miphun hna he nan i cawh ahcun, anmah he nan i ṭhium i nan i hawikomh ahcun,
13 Jehovah nan Pathian nih mah miphun hna hi nan hmai in a ṭhawl ti hna lai lo ti kha hngal u. Jehovah nan Pathian nih aan pekmi hna hi ram ṭha in nan loh dih hlan tiang annih cu nan caah rap le thang bantuk, nan hnakpang tuknak hrihrual bantuk le nan mit a chuntu hling bantuk an si lai.
14 “Kei cu ka thi dengmang cang.* Jehovah nan Pathian nih nan sinah a tuahmi biakamnak ṭha vialte cu a tling lomi pakhat hmanh a um lo ti kha nan lungthin dihlak le nan nunnak* dihlak in nan hngalh ko. A dihlak in a tling dih, a tling lomi pakhat hmanh a um lo.
15 Jehovah nan Pathian nih nan sinah a tuahmi biakamnak ṭha vialte cu a tlin dih bantuk in Jehovah nih bia aa kammi thil ṭhalo vialte zong nan cung ah a tlunter khawh i Jehovah nan Pathian nih aan pekmi hna hi ram ṭha in aan hloh dih khawh hna.
16 Jehovah nan Pathian nih zulh awkah nawl aan pekmi hna biakamnak kha nan buar i pathian dang kha nan biak i nan kunpiak hna ahcun Jehovah thinhunnak cu nan cung ah a alh lai. Aan pekmi hna hi ram ṭha hin khulrang in nan rawk lai.”
Footnotes
^ Mah cu Mediterranean Rili a si.
^ A hrampi, “Vawleicung thilnung vialte phung bang in ka kal ve cang lai.”
^ Biafang Fianternak ah zoh.
