Joshua 13:1-33
13 Joshua cu a kum a upa i a tar cang. Cucaah Jehovah nih hitin a ti: “Na kum a upa i na tar cang, asinain lak rih lomi ram tampi a um rih.
2 A taangmi ram hna ah Filistin mi hna ram vialte, Geshur mi hna ram vialte,
3 (Izipt nichuahlei Nile tiva ṭe in chaklei Ekron ramri tiang cu Kanaan mi hna ram tiah rak ruah a si) Filistin bawi panga ukmi Gaza, Ashdod, Ashkelon, Gath, Ekron le thlanglei ah Avvim mi hna ram,
4 Kanaan mi hna ram vialte, Sidon mi hna khua a simi Mearah, Amor ramri Aphek tiang,
5 Gebal mi hna ram, Hermon tlanghram ah a ummi Baal-gad in Lebo-hamath* tiang, nichuahlei Lebanon ram vialte,
6 Lebanon in Misrephoth-maim tiang tlangram vialte le Sidon mi hna umnak ram vialte aa tel. Cuka rammi hna cu Israel mi hna hmai in ka ṭhawl hna lai. Nawl kaan pekmi ning in cu ram cu Israel mi kha na cheuh hna lai i ro caah na pek hna lai.
7 Atu ah ram hi na cheu lai i phun kua le Manasseh phun a cheu cu ro caah na pek hna lai.”
8 A dang Manasseh phun cheu, Reuben phun le Gad phun cu Jordan Tiva nichuahlei ral ah Jehovah sal Moses nih a pekmi hna ro kha an co. An comi ram cu,
9 Arnon Horkuang kam ah a ummi Aroer khua in horkuang laifang ah a ummi khua, Medeba tlangrawn vialte, Dibon khua tiang,
10 Heshbon in a ukmi Amor siangpahrang Sihon i a khua vialte, Ammon mi hna ramri tiang a si.
11 Cun Gilead ram, Geshur le Maakath mi hna ram le Hermon Tlang hrawn vialte, Bashan ram vialte le Salekah tiang,
12 Ashtaroth le Edrei in a ukmi Bashan siangpahrang Og ram vialte zong aa tel. (Og cu hmanung bik a taangmi Repha mi lakah aa tel ve.) Moses nih cuka rammi cu a tei hna i a ṭhawl hna.
13 Asinain Israel mi nih Geshur mi le Maakath mi kha cu an ṭhawl hna lo. Cucaah Geshur mi le Maakath mi cu nihin ni tiang Israel mi hna lakah an um ve.
14 Moses nih Levi phun lawng kha ro a pe hna lo. Israel Pathian Jehovah nih bia a kamh hna ning in mei in thawimi pekchanhnak cu an ro a si.
15 Mah hnuah Moses nih Reuben phun kha an chungkhar ning cio in ro a pek hna.
16 An ram cu Arnon Horkuang* kam ah a ummi Aroer khua in horkuang laifang ah a ummi khua, Medeba pawng i tlangrawn vialte,
17 Heshbon le a pawngkam ah a ummi tlangrawn khua vialte, Dibon, Bamoth-baal, Bethbaal-meon,
18 Jahaz, Kedemoth, Mefath,
19 Kiriathaim, Sibmah le horkuang pawng tlang ah a ummi Zereth-shahar,
20 Beth-peor, Pisgah tlangpang, Beth-jeshimoth,
21 tlangrawn khua vialte le Heshbon in a ukmi Amor siangpahrang Sihon ram vialte aa tel. Moses nih Sihon le Midian bawi a simi Evi, Rekem, Zur, Hur le Reba kha a tei hna. Mah bawi hna cu Sihon ram ah a ummi a kut tang siangpahrang an si.
22 Israel mi nih vainam in an thahmi hna lakah Beor fapa khuachia thiamnak a ngeimi Balaam zong aa tel ve.
23 Reuben phun i an ramri cu Jordan Tiva a si. Cuka i khuapi hna le khuate hna kha Reuben phun nih an chungkhar ning cio in an co.
24 Cun Moses nih Gad phun kha an chungkhar ning cio in ro a pek hna.
25 An ram ah Jazer, Gilead khua vialte le Rabbah hmaiah a ummi Aroer tiang a kaumi Ammon ram a cheu,
26 Heshbon khua in Ramath-mizpeh le Betonim khua tiang, Mahanaim in Debir khua ramri tiang,
27 Heshbon siangpahrang Sihon ukmi horkuang chung ah a ummi Beth-haram, Beth-nimrah, Sukkoth le Zaphon zong aa tel. An ramri cu Khinnereth Rili a thlanglei kam in aa thawk i Jordan Tiva nichuahlei thluangthluan aa tel.
28 Mah khuate hna le khuapi hna cu Gad phun nih an chungkhar ning cio in an comi ro a si.
29 Cun Moses nih Manasseh phun a cheu kha an chungkhar ning cio in ro a pek hna.
30 An ram ah Mahanaim in Bashan ram vialte, Bashan siangpahrang Og ukmi ram vialte, Bashan ah a ummi Jair khuate vialte le khua 60 aa tel.
31 Cun Manasseh fapa Makhir tefa hnarcheu kha an chungkhar ning cio in Gilead ram a cheu le Bashan siangpahrang Og ukmi ram chung in Ashtaroth le Edrei khua kha a pek hna.
32 Mah cu Jeriko khua nichuahlei Jordan Tiva khattalei ral i Moab ramcar ah Moses nih a pekmi hna ro an si.
33 Asinain Levi phun tu cu Moses nih ro a pe hna lo. Israel Pathian Jehovah nih bia a kamh hna ning in Pathian cu an ro a si.
