Joshua 5:1-15
5 Israel mi nih Jordan Tiva an tan dih hlan tiang Jehovah nih ti a roternak kong kha Jordan nitlaklei ah a ummi Amor siangpahrang hna le rilikam ah a ummi Kanaan siangpahrang hna nih an theih tikah an lung a zor i Israel mi pawl doh awkah ralṭhatnak an ngei ti lo.
2 Mah lio caan ah Jehovah nih Joshua kha “Ṭeklung in namte ser hna law Israel pa pawl kha a voihnihnak cuarpar tan hna” tiah a ti.
3 Cucaah Joshua nih ṭeklung in namte a ser hna i Gibeath-haaraloth* timi hmun ah Israel pa pawl kha an cuarpar a tan hna.
4 Joshua nih cuarpar a tan hnanak a ruang cu hihi a si: Izipt ram in a rak chuakmi pa vialte, ralkap vialte cu ramcar i an vahvaih lioah an thi dih cang.
5 Izipt ram in a chuakmi vialte cu cuarpar tan an rak si cang. Asinain Izipt ram in an chuah hnu ramcar chung ah hrinmi pawl cu cuarpar tan an si rih lo.
6 Izipt ram in a chuakmi Jehovah nawl a ngai lomi ralkap vialte an thih dih hlan tiang Israel mi cu ramcar ah kum 40 chung an rak vakvai. Jehovah nih kanmah pek awkah kan pupa hna sinah bia aa kammi hnuk le khuaihliti a luangmi ram kha annih cu ka hmuhter hna lai lo tiah Jehovah nih chiatserh in bia aa kam.
7 Cucaah anmah kha a hlawt hna i ram cu an fale tu kha a pek hna. An fale cu an vahvaih lioah cuarpar tan an si lo caah Joshua nih cuarpar a tan hna.
8 An miphun ning in cuarpar tan an si dih hnuah an dam ṭhan hlan tiang riahhmun ah cun an i din.
9 Cun Jehovah nih Joshua cu “Nihin ni ah Izipt mi nih an in nehsawh hnanak cu kaan lakpiak cang hna”* tiah a ti. Cucaah mah hmun cu Gilgal* tiah nihin ni tiang an auh.
10 Israel mi cu Jeriko ramcar ah a ummi Gilgal ah an caam rih. Mah thla ni 14nak zanlei ah Lanhtak Puai an tuah.
11 Lanhtak Puai a thaizing thawk in cuka ram chuak theitlai kha an ei. Thilnu phulh lo changreu le fangreu zong kha an ei.
12 Cuka ram chung chuak theitlai an ei thawk in manna an hmu ti lo. Israel mi pawl ei awkah manna a um ti lo. Mah kum thawk in Kanaan ram chung chuak theitlai kha an ei.
13 Joshua cu Jeriko khua pawng a um lioah khua a hei zoh i vainam aa putmi pa pakhat a hmaiah a dir ko kha a hmuh. Joshua cu a sinah a va kal i “Kanmah lei maw na si, kan ral lei dah?” tiah a hal.
14 Mah tikah “Na ruah bantuk in a si lo, kei cu Jehovah ralbawi in a rami ka si” tiah a ti. Joshua cu a kun, a bawk i “Ka bawipa, na salpa hi zeidah chimh na ka duh?” tiah a hal.
15 Jehovah ralbawi nih Joshua kha “Na dirnak hmun hi hmunthiang a si caah na phanah kha i phoih” tiah a ti tikah Joshua nih a phanah kha aa phoih colh.
