Joshua 21:1-45
21 Levi mi chungkhar lu hna cu tlangbawi Eleazar, Nun fapa Joshua le Israel phun chung i chungkhar lu hna sinah an ra.
2 Mah cu Kanaan ram Shiloh ah a si. Annih nih “Kan umnak ding caah khua le kan saṭil caah tlonnak ram pek ding in Jehovah nih Moses sinin nawl a rak in pek hna” tiah an ti.
3 Cucaah Jehovah nawl peknak ning in Israel mi nih an comi ro chung in khua hna le saṭil tlonnak ram kha Levi mi cu an pek hna.
4 Camcawhfung an zuh tikah Kohath chungkhar cung ah a tla. Tlangbawi Aaron tefa a simi Levi mi hna nih Judah phun, Simeon phun le Benjamin phun comi ro chung in khua 13 kha camcawhfung zuh in an hmuh.
5 A taangmi Kohath mi hna nih Efraim phun, Dan phun le Manasseh phun a cheu comi ro chung in khua 10 kha an hmuh.
6 Gershon mi hna nih Issakhar phun, Asher phun, Naftali phun le Bashan ah a ummi Manasseh phun a cheu comi ro chung in khua 13 kha an hmuh.
7 Merari mi hna nih an chungkhar ning cio in Reuben phun, Gad phun le Zebulun phun comi ro chung in khua 12 kha an hmuh.
8 Cuticun Jehovah nih Moses sinin nawl a rak pek hna bantuk in Israel mi nih cu khua hna le saṭil tlonnak ram hna kha Levi mi cu camcawhfung zuh in an pek hna.
9 Judah phun le Simeon phun comi ro chung in a tanglei khua hna hi an pek hna.
10 Camcawhfung cu Levi phun, Kohath chungkhar Aaron tefa cung ah a tla hmasa bik i hi khua hna hi an hmuh.
11 Judah tlangram ah a ummi Hebron tiah auhmi Kiriath-arba (Arba cu Anak pa a si) le a pawngkam i saṭil tlonnak ram kha an pek hna.
12 Asinain a pawngkam lo hna le a khuate hna cu Jefunneh fapa Kaleb kha ro caah an pek.
13 Tlangbawi Aaron tefa an pekmi khua hna cu mi a that sualtu caah dornak khua a simi Hebron le a saṭil tlonnak ram, Libnah le a saṭil tlonnak ram,
14 Jattir le a saṭil tlonnak ram, Eshtemoa le a saṭil tlonnak ram,
15 Holon le a saṭil tlonnak ram, Debir le a saṭil tlonnak ram,
16 Ain le a saṭil tlonnak ram, Juttah le a saṭil tlonnak ram, Beth-shemesh le a saṭil tlonnak ram an si. Judah phun le Simeon phun comi ram chung in cu khua 9 cu an pek hna.
17 Benjamin phun comi ram chung in Gibeon le a saṭil tlonnak ram, Geba le a saṭil tlonnak ram,
18 Anathoth le a saṭil tlonnak ram, Almon le a saṭil tlonnak ram kha an pek chih hna. Khua 4 a si.
19 Cu khua 13 cu an saṭil tlonnak ram hna he Aaron tefa tlangbawi pawl kha an pek hna.
20 Levi phun Kohath chungkhar lakah a taangmi hna cu Efraim phun comi ram chung in khua hna kha camcawhfung zuh in an pek hna.
21 Mi a that sualtu caah dornak khua a simi, Efraim tlangram ah a ummi Shekhem le a saṭil tlonnak ram, Gezer le a saṭil tlonnak ram,
22 Kibzaim le a saṭil tlonnak ram, Beth-horon le a saṭil tlonnak ram kha an pek hna. Khua 4 a si.
23 Dan phun comi ram chung in Elteke le a saṭil tlonnak ram, Gibbethon le a saṭil tlonnak ram,
24 Aijalon le a saṭil tlonnak ram, Gathrimmon le a saṭil tlonnak ram kha an pek hna. Khua 4 a si.
25 Manasseh phun a cheu comi ram chung in Taanakh le a saṭil tlonnak ram, Gathrimmon le a saṭil tlonnak ram kha an pek hna. Khua 2 a si.
26 Kohath chungkhar chung i a taangmi hna nih saṭil tlonnak ram he an hmuhmi khua cu 10 a si.
27 Levi phun Gershon chungkhar nih Manasseh phun a cheu comi ram chung in an hmuhmi khua hna cu mi a that sualtu caah dornak khua a simi, Bashan ah a ummi Golan le a saṭil tlonnak ram, Beesh-terah le a saṭil tlonnak ram an si. Khua 2 a si.
28 Issakhar phun comi ram chung in Kishion le a saṭil tlonnak ram, Daberath le a saṭil tlonnak ram,
29 Jarmuth le a saṭil tlonnak ram, Engannim le a saṭil tlonnak ram kha an pek hna. Khua 4 a si.
30 Asher phun comi ram chung in Mishal le a saṭil tlonnak ram, Abdon le a saṭil tlonnak ram,
31 Helkath le a saṭil tlonnak ram, Rehob le a saṭil tlonnak ram kha an pek hna. Khua 4 a si.
32 Naftali phun comi ram chung in mi a that sualtu caah dornak khua a simi, Galili ah a ummi Kedesh le a saṭil tlonnak ram, Hammoth le a saṭil tlonnak ram, Kartan le a saṭil tlonnak ram kha an pek hna. Khua 3 a si.
33 Gershon mi nih an chungkhar ning cio in khua 13 le a saṭil tlonnak ram hna kha an hmuh.
34 Levi phun chung in a taangmi Merari chungkhar nih Zebulun phun comi ram chung in an hmuhmi khua hna cu Jokneam le a saṭil tlonnak ram, Kartah le a saṭil tlonnak ram,
35 Dimnah le a saṭil tlonnak ram, Nahalal le a saṭil tlonnak ram an si. Khua 4 a si.
36 Reuben phun comi ram chung in Bezer le a saṭil tlonnak ram, Jahaz le a saṭil tlonnak ram,
37 Kedemoth le a saṭil tlonnak ram, Mephaath le a saṭil tlonnak ram kha an pek hna. Khua 4 a si.
38 Gad phun comi ram chung in mi a that sualtu caah dornak khua a simi, Gilead ah a ummi Ramoth le a saṭil tlonnak ram, Mahanaim le a saṭil tlonnak ram,
39 Heshbon le a saṭil tlonnak ram, Jazer le a saṭil tlonnak ram kha an pek hna. Khua 4 a si.
40 Levi phun chung in a taangmi Merari mi hna nih an chungkhar ning cio in an hmuhmi khua cu 12 a si.
41 Israel miphun comi ram chung in Levi mi hna khua cu a dihlak ah 48 a si i saṭil tlonnak ram zong aa tel.
42 Mah khua pakhat cio i a velchum ah saṭil tlonnak ram a um dih.
43 Jehovah nih an pupa hna sinah pek awkah chiatserh in bia aa kammi ram vialte cu Israel mi kha a pek hna. Israel mi nih ram cu an lak i cuka ah khua an sa.
44 Mah leng ah Jehovah nih an pupa hna sinah chiatserh in bia aa kam bantuk in ram pumpi ah daihnak a pek hna. An ral ahohmanh nih an tei kho hna lo. Jehovah nih an ral vialte kha an kut chung ah a pek hna.
45 Jehovah nih Israel miphun sinah a sermi biakamnak ṭha vialte cu a tling lomi pakhat hmanh a um lo. A dihlak in a tling dih.
