Joshua 4:1-24
-
Hngalh camcinnak caah lung hna (1-24)
4 Israel miphun dihlak nih Jordan Tiva an tan dihle cangka Jehovah nih Joshua cu hitin a ti:
2 “Phun pakhat ah mi pakhat tiin pa 12 thim hna,
3 ‘Tlangbawi pawl an dirnak Jordan Tiva laifang in lung 12 kha la u, i put u law tuzan nan riahnak ding hmun ah chia u’ tiah nawl pe hna.”
4 Cucaah Joshua nih Israel phun pakhat ah mi pakhat tiin a thimmi pa 12 cu a auh hna i,
5 hitin a ti hna: “Jordan Tiva laifang i nan Pathian Jehovah biakamnak kuang hmaiah va kal u law Israel phun zat in lung pakhat cio kha nan liang ah i khinh u.
6 Mah cu nan caah hngalhter ṭhantu a si lai. A hnuah nan fale nih ‘Mah lung hi zeicah nan chiah?’ tiah an in hal hna ahcun,
7 ‘Mah lung cu Israel miphun caah hngalh camcinnak caah a si. Zeicahtiah tlangbawi pawl nih Jehovah biakamnak kuang i zawnh in Jordan Tiva an tan tikah kuang hmaiah ti cu a cat’ tiah nan chimh hna lai.”
8 Israel mi nih Joshua nawl pek ning in an tuah. Jehovah nih Joshua nawl a pekmi ning in Israel phun zat in lung 12 kha Jordan Tiva laifang khan an lak, an riahnak ding hmun ah an put i an chiah.
9 Joshua zong nih biakamnak kuang a putu tlangbawi pawl an dirnak Jordan Tiva laifang ah lung 12 a phun ve, cu lung hna cu nihin ni tiang a um rih.
10 Jehovah nih Joshua sinin nawl a pekmi hna kha an tuah dih hlan tiang biakamnak kuang a putu tlangbawi hna cu Jordan Tiva laifang ah an dir. Moses nih Joshua nawl a pekmi ning tein an tuah. Mah lioah mi cu khulrang in an kal.
11 Mi vialte nih an tan dih hnuah Jehovah biakamnak kuang a putu tlangbawi hna zong nih an tan ve. Mah kha mi nih an zoh.
12 Reuben phun, Gad phun le Manasseh phun a cheu cu Moses nih a fial hna ning in a dang Israel mi hna hmaiah raltuk awkah timhcia tein an tan.
13 Raltuk awkah timhcia a simi ralkap 40,000 hrawng cu Jeriko ramcar lei ah Jehovah hmai in an tan.
14 Mah ni ah Jehovah nih Joshua cu Israel mi vialte hmaiah a hlorh. Israel mi nih Moses an rak upat tuk bantuk in Joshua zong kha a nun chung vialte an upat tuk ve.
15 Jehovah nih Joshua cu,
16 “Tehte Khaannak kuang* a putu tlangbawi hna kha Jordan Tiva in rak chuah awkah nawl pe hna” tiah a ti.
17 Cucaah Joshua nih tlangbawi pawl kha “Jordan Tiva in rak chuak u” tiah nawl a pek hna.
18 Jehovah biakamnak kuang a putu tlangbawi hna cu Jordan Tiva laifang in an rak chuak i an kepha nih tiva tlang a lamh tikah ti cu a hlan bantuk tein a luang ṭhan i tiva kuang in a liam ṭhan.
19 Israel mi cu thla khatnak thla, a nihranak ni ah Jordan Tiva in an hung chuak i Jeriko nichuahlei ramri ah a ummi Gilgal ah an riak.
20 Jordan Tiva in an lakmi lung 12 kha Joshua nih Gilgal ah cun a phun.
21 Mah hnuah Joshua nih Israel mi kha hitin a ti hna: “Hmailei ah nan fale nih ‘Mah lung hi zeicah nan phun?’ tiah an in hal hna ahcun,
22 ‘Israel mi nih Jordan Tiva kha leiro in kan rak tan.
23 Jehovah nan Pathian nih Rili Sen kan tan dih hlan tiang ti kha a roter bantuk in Jordan Tiva kan tan dih hlan tiang ti kha Jehovah nih a roter ve.
24 Vawleicung mi vialte nih Jehovah ṭhawnnak cu zeitluk in dah a ngan ti an hngalh nakhnga le Jehovah nan Pathian kha nan ṭih zungzal nakhnga cutin a rak tuah’ tiah nan chimh hna lai.”
Footnotes
^ Mah cu biakamnak kuang a si. Biafang Fianternak ah zoh.
