Joshua 1:1-18
1 Jehovah sal Moses a thih hnuah Jehovah nih Moses a bawmtu Nun fapa Joshua* kha hitin a ti:
2 “Ka sal Moses cu a thi cang. Atu tho law hi miphun, Israel mi hna he Jordan Tiva kha tan in ka pekmi hna ram ah va lut u.
3 Moses bia ka rak kamh bantuk in na ke nih a lamhnak hmun paohpaoh kha kaan pek lai.
4 Na ram cu ramcar in Lebanon* tiang, Zufrates* tivapi tiang, nitlaklei ah Rilipi* tiang a kau lai i Hit mi hna ram vialte aa tel lai.
5 Na nun chung paoh cu ahohmanh nih an in tei kho lai lo. Moses sinah ka rak um bantuk in na sin zong ah ka um lai. Kaan kaltak lai lo i kaan hlaw lai lo.
6 Ṭhawng ngai le ralṭha ngai in um ko. An pupa hna sinah pek awkah chiatserh in bia kaa kammi ram an co nakhnga a hruaitu ding cu nangmah hi na si.
7 “Ṭhawng ngai le ralṭha ngai in um ko. Ka sal Moses nih aan chimhmi nawlbia vialte kha ṭha tein zul. Kehlei ah siseh, orhlei ah siseh pial hlah. Cuticun zei thil paoh fimkhur tein na tuah khawh lai.
8 Hi Nawlbia cauk chung bia hi chim loin um hlah. Aa ṭialmi vialte hi ṭha tein na zulh khawh nakhnga chunzan in rel law ruat.* Cuticun na nunnak ah hlawhtlinnak na hmu lai i fimkhur tein thil na tuah khawh lai.
9 Nawl kaan pek cang, a si ko lo maw? Ṭhawng ngai le ralṭha ngai in um ko. Ṭih le phang in um hlah. Zeicahtiah Jehovah na Pathian nih na kalnak hmun paoh ah aan umpi lai.”
10 Joshua nih haotu hna kha hitin nawl a pek hna:
11 “Riahhmun ah va kal u law mizapi cu ‘Riahcaw i tim u, zeicahtiah nithum chung ah Jordan Tiva kha nan tan lai i Jehovah nan Pathian nih aan pekmi hna ram cu nan co lai’ tiah nawl va pe hna u.”
12 Cun Joshua nih Reuben phun, Gad phun le Manasseh phun a cheu kha hitin a ti hna:
13 “Jehovah sal Moses nih nawl a rak in pekmi hna hi philh hlah u: ‘Jehovah nan Pathian nih dinhnak aan pek hna i hi ram zong hi aan pek cang hna.
14 Nan nupile, nan fale le nan saṭil hna cu Moses nih Jordan Tiva i hikalei ral* ah aan pekmi hna ram ah an um lai. Asinain a ṭhawngmi ralkap dihlak cu nan unau hna hmai in raltuk awkah timhcia tein Jordan Tiva kha nan tan lai.
15 Jehovah nih dinhnak aan pek hna bantuk in nan unau pawl zong a pek hna i Jehovah nan Pathian nih a pekmi hna ram an co dih hlan tiang nan bawmh hna lai. Mah hnuah Jehovah sal Moses nih Jordan Tiva nichuahlei i aan pekmi hna ram ah nan kir lai i nan um lai.’”
16 Annih nih Joshua cu hitin an ti: “Nawl na kan pekmi vialte cu kan tuah lai i na kan thlahnak paoh ah kan kal lai.
17 Moses nawl kan ngaih bantuk in na nawl zong kan ngai lai. Jehovah na Pathian cu Moses sinah a um bantuk in na sin zong ah um ve ko seh.
18 Na nawlbia a ralchanh i na bia a ngai duh lomi paoh cu thah si hna seh. Ṭhawng ngai le ralṭha ngai in um ko.”
