Joshua 20:1-9
-
Dornak khua hna (1-9)
20 Jehovah nih Joshua cu hitin a ti:
2 “Israel mi cu hitin chim hna, ‘Moses sinin ka rak in chimh cang hna bantuk in dornak khua kha i thim u.
3 Timh ciammam loin asiloah ruahlopi in* mi a that sualmi cu cuka ah a zam kho. Cuticun thisen phuhlamtu kut in a luat lai.
4 Mah khua hna lak i pakhatkhat ah a zam lai, khua hauka ah a dir lai i khua upa hna sinah a kong kha a chim lai. Mah hnuah khua chung ah an luhter lai i umnak hmun an pek lai. Cun an sinah a um lai.
5 Thisen phuhlamtu nih a rak dawi ahcun mi a thattu kha a kut chung ah an pek awk a si lo. Zeicahtiah a minunghawi kha a rak huat caah si loin ruahlopi in* a thah sualmi a si.
6 Mibu hmaiah biaceih a si hlan tiang mah khua ah a um lai. Ruahlopi in a thah sualmi a si ti a fian ahcun mah lio caan i tlangbawi ngan a simi a thih hlan tiang cuka ah a um lai. Mah hnu lawng ah mi a thattu cu a khua le a inn ah a kir ṭhan kho lai.’”
7 Cucaah Naftali tlangram Galili ah Kedesh, Efraim tlangram ah Shekhem, Judah tlangram ah Hebron tiah auhmi Kiriath-arba kha dornak khua caah a dang tein an chiah hna.*
8 Jeriko nichuahlei Jordan Tiva ral ah Reuben phun nih an comi tlangrawn ramcar ah Bezer, Gad phun nih an comi Gilead ah Ramoth le Manasseh phun nih an comi Bashan ah Golan khua kha an thim hna.
9 Mah khua hna cu Israel mi le an sinah a ummi ramdang mi hna caah thimmi an si. Cuticun timh ciammam loin mi a that sualtu cu mibu hmai i biaceih a si hlanah thisen phuhlamtu kut in a thih nakhnga lo mah khua hna ah a zam kho.
